InfoHub Logo

Aıaq astynan Aqmyrzanyń ishkilikti qoıyp, el qatarly jibi túzý jan bolyp shyǵa kelgeni — qydyryp barǵan jerde aıta júrerlikteı ájeptáýir jańalyq edi.

Onyń osy bir qubylysyna qýanǵandaı, biraz kúnnen beri aýa raıy da ashylyp, aspan móldirep, aınala-tóńirek jadyrap tur. Kóktem kesh týsa da, alty aı qys miz baqpaı jatqan qalyń qar tez erip, jas kók qaýlap boı kóterip qalǵan. Erteli-kesh aıalaı esken jel altyn kúreń baqtaǵy jemis aǵashtarynyń býyn-býynyn bosatyp, búrshik ata bastaǵan.

Ol jumystan kelgen soń esik aldyndaǵy sákide japadan-jalǵyz otyratyn ádet tapty. Eski kúpáıkesiniń jaǵasyna moınyn tyǵyp alyp, temekisin burqyratyp ún-túnsiz oıǵa shomady. Ne oılaıdy? Kóńilin jaılaǵan qandaı muń-sheri bar? Ol tek bir ózine ǵana aıan. Áıteýir, kútpegen jerden túıilip, úıirilip kele qalatyn kóktemgi jańbyrly bulttardaı qalyń oı ishki dúnıesin torlap alatyny anyq.

Keıde onyń janyna balalarynyń bireýi kelip otyrady. Jaýtańdap ákesiniń júzine qaıta-qaıta qaraıdy. Ókpelegen adamdaı únsiz tomsyraıyp otyrǵan ákesine ishteı aıaýshylyq bildiredi.

Aqmyrza týmysynda kishkentaı jaratylǵan jan edi. Jaǵy qýshıyp, kózi shúńireıip, ústindegi kúpáıkesi baǵzy bir zamandardaǵy batyr babasynan qalǵan shekpen sıaqty qolpyldap júretin. Kishkentaı adamnyń muńǵa batqany rasynda da aıanyshty-aq. Biraq amal qansha...

* * *

Jyly da jaıma-shýaq kúnder tizilip óte berdi. Ol búgin aýyl ústinen taspıyqtaı tizilip ushyp bara jatqan tyrnalardy kórdi. Alǵashynda baıqamaǵan eken. Tyraýlaǵan tanys úndi qulaǵy shalsa da, aspanǵa qaramaı tura beripti. Esik aldynda oınap júrgen kishi uly Kelesbaı qýanyp:

— Kóke, tyrnalardy qarashy! Tyrnalar ushyp barady! — dep aıqaılaǵanda ǵana selt etip, zeńgir aspanǵa qarap kóz tikken.

Tyrnalar tym-tym bıikte ushyp barady eken. Qylaýsyz ashyq aspan tósinde baıaý ǵana qalyqtaıdy. Tipti qanattaryn da qaqpaıtyn sekildi. Jer betindegi qybyr-qybyr usaq tirshilikke bıiktik ataýlynyń qasıetin uqtyrǵysy kelgendeı, tákappar kúıde samǵap barady.

Kirshiksiz ashyq aspanǵa tesilip uzaq qaraǵandyki me, kózi jasaýrap sala berdi. “Qaı jaqtan ushyp kelesińder, qasıetti qustar, — dep oılady ol tolqyp, — endi qaıda ushyp bara jatyrsyńdar?.. Senderdi kórmegeli de kóp ýaqyt ótipti-aý!.. ”

— Kóke, nege jylap tursyz? — dedi kenet Kelesbaı.

Aqmyrza alaqanymen janaryna úıirilip qalǵan jasty tez súrtip:

— Jaı ánsheıin, — dedi. Úni qarlyǵyp shyqty. — Jaı ánsheıin, aspanǵa kóp qaraǵandiki bolar...

— Al men aspanǵa qanshama qarasam da, kózimnen jas shyqpaıdy, — dedi uly maqtanyp. — Qansha qara deseńiz de, qaraı berem!

— Qoı ári... kóziń aýyrady.

— Túk te aýyrmaıdy. Taǵy da qaraıyn ba?! — dep Kelesbaı kógildir aspanǵa sińip kórinbeı ketken tyrnalardyń sońynan jáne kóz tikti.

Qora jaqta velosıpediniń dóńgelegin aspanǵa qaratyp qoıyp, shuqylap jóndep jatqan Táshkenbaı:

— Kóke, oǵan “qoı” deseńiz qaıta eregisip ketedi! — dep eskertti.

— Á, solaı ma?..

Sosyn: “Áı, bunyń mineziniń solaı ekenin men nege bilmeımin, a?.. ” dep oılady ókinip.

— Aldyńgúni de aýyldyń ústimen tyrnalar ushyp ótken, — dedi Kelesbaı. — Arysbek aıtady, aq tyrnalar da bolady deıdi. Sol ras pa, a, kóke?

— Ia, aq tyrnalar da bolady.

— Siz óz kózińizben kórdińiz be, a?

— Joq. Men aq tyrnalardy kórgen emespin.

— Olardyń mekeni qaı jaqta bolady eken, a?

— Bilmeımin. Alys jaqtarda bolatyn shyǵar...

Jańaǵy ushyp ótken tyrnalar Aqmyrzanyń kóńilin kók teńizdeı tolqytyp ketip edi. Kókoraı shalǵynda jalań aıaq júgirip júretin balalyq shaǵy esine túsken. Sosyn Kelesbaıdyń aıaǵyna qarady. Báteńkesiniń tabany sógileıin degen be, qalaı ózi?.. Ar jaǵynan bas barmaǵy kórinip tur ǵoı.

— Aıaq kıimiń tozaıyn depti-aý, — dedi oǵan. — Mektepke de osymen baryp júrsiń be?

Kelesbaı aıaǵyna bir, kókesine bir qarady da, úndemeı qaldy. Al Táshkenbaı velosıpedin jóndep bitken bolýy kerek, zýyldata aıdap kóshe jaqqa shyǵyp ketti.

— Kóke, — dedi kenet Kelesbaı birtúrli jaýtańdaı qarap. — Táshkenbaıdyń bátińkesi de joq. Áli kúnge botı kıip júr.

Aqmyrza oǵan ne aıtaryn bilmeı tosylyp qaldy da, aqyryn ǵana shashynan sıpap qoıdy. Sosyn temekisin tutatyp, sákige baryp otyrdy. “Qamar qaıda qarap júr, — dedi ishteı toryǵyp. — Balalardyń báriniń kıimi tozyp ketipti. Birsypyra jańalap berý kerek eken. Ótken aıda aılyqty keshiktirip edi... Osy joly ýaqytymen qolǵa tıse, sol kúni-aq bárin dúkenge ózim ertip aparaıynshy... ”

Sóıtip oılaýy muń eken, arqasynan bir aýyp júk túskendeı, jeńildep qaldy. İshteı aılyq alatyn kúnge qansha ýaqyt qalǵanyn eseptedi. Áli biraz kútý kerek eken...

Aqmyrza garajda mehanık bolyp isteýshi edi, jalaqysy jaman emes-ti. Biraq buryndary sonyń qanshasyn úıge ákeletini, qanshasyn iship qoıatyny esinde joq. Áıteýir, aılyq alǵan kúni aıaǵyn ár jerden áltek-táltek basyp áreń kelip, bosaǵadan attaı bere qulap júrgende, Qamar kúıinip, endi qaıtyp birge turmastaı bolatyn. Eh, Qamar, Qamar... Sende ne jazyq bar? Bes balanyń beıneti azdaı, kúıeýiń taǵy masyl bolsa, kúıinbegende qaıtesiń...

Qazir de qabaǵynda bir salqyn syz bar. Jumystan soń esik aldynda jalǵyzsyrap otyratyn Aqmyrzanyń tusynan úı sharýasymen olaı-bylaı ótkende kóz salmaýǵa tyrysady. Taǵy da sol qurǵyrdy ańsap, ańqasy keýip otyr ma dep oılaıdy-aý, sirá. Áli de senbeıtin bolǵany-aý...

* * *

Búgin Qamar úıdegi kórpe-jastyqtyń bárin dalaǵa shyǵaryp jaıyp, kirgizip edi. Sodan ba, úı-ishi jańaryp qalǵandaı tap-taza, kún shýaǵyna malynǵandaı ádemi bir qalypqa enipti. Balalar da kóńildi, oıynshyl bolyp alǵan. Aralary bir jasqa tolar-tolmas kishkentaı eki uly — Zadarıa men Montaı qaıta-qaıta talasyp, shataq shyǵara bergen soń, aqyry Qamardan taıaq jep, ekeýi eki buryshta jatyp uıyqtap qaldy. Kelesbaı kózi kirtıip, saǵat túngi on jarymǵa deıin televızor kórdi. Kúnde bir nárseni buzyp, qaıta jóndemese kóńili kónshimeıtin Táshkenbaı búgin de aýyzǵy úıde daladan taýyp kelgen temir qorabyn shuqylap ashyp, ishinen oraýly jezin alyp qoıdy. Úlkeni Arysbek ǵana túpki bólmede uzaq otyryp sabaqqa daıyndaldy. Sabaqqa deıdi-aý, tósekke jatar aldynda Aqmyrza onyń janyna baryp, ne oqyp otyr eken dep qarap edi. Mekteptiń oqýlyǵy emes, basqa bir qalyńdaý kitap eken. Arysbek qysylyp qalyp, kitaptyń betin alaqanymen jaýyp, ne aıtpaq edińiz degendeı, kókesine qıyla qarady. Aqmyrza ne desin... Únsiz qarap turdy da, burylyp kelip óziniń ornyna jatty.

Úıdiń búgingi jumysyn bitirip, Qamar da tósegine kelip qısaıdy. Jaryqty sóndirgen soń, qarańǵy bólmede óli tynyshtyq ornady. Janyndaǵy kishkentaılarynyń kórpesin qymtap jatyp Qamar aqyryn ǵana kúrsinip qoıdy...

— Qamar, — dedi álden soń Aqmyrza ún qatyp. — Men... men ishkilikti birjolata qoıdym... Endi tatyp almaımyn.

Qamar úndemedi. Taǵy da tym-tyrys tynyshtyq basty.

— Senbeı jatyrsyń ba?

— Qaıdam... — dedi Qamar ekiushtylaý.

— Tatyp almaımyn dedim ǵoı...

— Bizge de jaqsy bolar edi. Birjolata tastashy sol báleni... — Ol bul joly ish tartyp, ózimsinip aıtty.

— Kel, qasyma jatshy.

— Ts-s... balalar oıanyp keter. Qazir baram ǵoı...

Ekeýi, kópten saǵynysyp qalǵan jandardaı, jyly tósekte tátti tabysty. Qamar kúıeýiniń ıyǵyna basyn qoıyp jatty. Onyń shashy Aqmyrzanyń tanaýyn qytyqtady. Azdap aıran ıisi seziledi... Aqmyrza onyń moınynan qushaqtap, shashynan qushyrlana ıiskep qoıdy.

— Aqan, — dedi Qamar kenet basyn kóterip, kúıeýiniń júzine tesile qarap. — Shynymen qoıdyń ǵoı? Aıtshy. Shynym deshi...

— Imandaı shynym...

Qamar endi onyń moınynan ózi tas qyp qushaqtap, betine betin taqady. “Aqan deıdi-aý... — dep oılady Aqmyrza ishinen. — Bul sózdi Qamar aıtpaǵaly qaı zaman... ”

Aqan dep ol ekeýi alǵash qosylǵan jyldary aıtýshy edi. Úılengenderine bir jarym jyl bolǵanda Arysbek dúnıege keldi. Sol kúni Aqmyrza qurdastaryna óziniń qýanyshyn jýyp, ókirtip turyp ishti. Sodan soń-aq ol bulaısha erkeletýdi múlde umytqan-dy. Ózi de, ishseń — ishe tús degendeı, kileń bir arystaı uldardy týa berdi ǵoı... Biraq ol baıǵusta ne kiná bar? Aqmyrza araq ishsin dep týdy ǵoı deımisiń osy balalardy? Al bul bolsa, áýeli uldarynyń qýanyshy úshin dep ishti, sosyn bári ul bolyp ketti dep ishti. Áıteýir, ishetin adamǵa syltaý kóp-aq...

— Qamash, shynyńdy aıtshy, sen men týraly ne oılap júrdiń?

Qamar birden jaýap qata qoımaı, biraz únsiz jatty da:

— Oılanýǵa ýaqytym boldy deımisiń?.. — dedi ekiushtylaý jaýap qatyp. — Balalar óssin dedim. Solar qatarynan qalmasyn dep keńse sypyrdym, eldiń jibin ıirip, shulyǵyn toqyp berip te aqsha taptym... Arysbegim er jetip, kelin túsirsem, qutylarmyn bul tozaqtan dedim...

— Oıbo-oı, oǵan deıin ne zaman?!

— Er jetip qaldy ǵoı. Bıyl segizinshi bitirgen soń ýchılıshege túsemin dep júrkúnim.

— Qoıshy-eı, segizinshini bitirip qaldy ma? Men ony jetinshide oqıdy dep júrsem.

— Jetinshiń ne... Keshe dáý atamnyń úıindegi appaq apam aıtady; mal qoralap júrip Maqannyń úıiniń tusynda ysqyryp turǵanyn kórdim deıdi.

— Bóten bireýdiń úıiniń janynda ysqyryp nesi bar-eı onyń. İshi tolyp bara jatsa, ózimizdiń esiktiń aldynda turyp-aq ysqyra bermeı me.

— Sen áli túsingen joqsyń ba?.. Maqannyń osylarmen jasty qyzy bar ǵoı.

— E-e...

— Áne, solaı... Biz de endi kempir-shal boldyq. A-a...

Ol tátti esinep aldy da, kózin jumyp qalǵyp bara jatty. Aqmyrzanyń esine Táshkenbaıdyń botı kıip júrgeni tústi.

— Qamar... a, Qamar, — dep áıelin ıyǵynan túrtti. — Balalardyń ústindegi kıimi tozyp ketipti ǵoı.

— Y-y...

— Aılyq alǵan kúni bárine birsypyra kıim satyp alaıyqshy.

— Ym-m...

— Kimge ne kerek, sonyń bárin erteń maǵan bir paraq qaǵazǵa jazyp berip qoıshy.

Qamar ún qatpady. Basyn Aqmyrzanyń ıyǵyna súıegen kúıi alańsyz uıyqtap ketipti.

Ol kópke deıin kirpik aıqastyra almaı, qarańǵy úıde kózi baqyraıyp jatty da qoıdy. Táshkenbaıdyń botı kıip júrgenin, Arysbektiń er jetip qalǵanyn oılady. Endi Maqannyń orta boıly, dóńgelek júzdi kelinshegi kóz aldyna elestedi. “Qyz bala sheshesine tartyp týady” deýshi edi ǵoı...

Sóıtip jatyp kózi ilinip ketti.

* * *

Alma aǵashtar túgel gúldedi. Tabıǵat uzatylatyn qyzdaı jasanyp, qulpyryp shyǵa keldi. Olardyń biraz jyldan beri jóndeý kórmegen eski tamynyń ózi de appaq gúlderdiń arasynan áp-ádemi bolyp kórinedi. Kelesbaı pysyqsynyp kúnde sypyryp júrgendikten aýlanyń ishi muntazdaı. Apasynyń maqtaǵanyna kóńili ósip, bar ynta-shyntasymen isteıdi jumysty. Úı ishinde buryn-sońdy bolmaǵan bir kóńildilik bar.

Búgin Aqmyrza jumystan, Táshkenbaı sabaqtan kele sala ekeýi mal qoranyń qıyn oıdy. Ákesi kúrep, qol arbaǵa salyp berip turdy. Uly tanaýyn pysyldatyp, qaıta-qaıta tartyp qoıyp júrip tasydy. Al kishkentaı Zadarıa men Montaı da kózderi kúlimdep, jymyń-jymyń etedi. Biraq Táshkenbaı jumys istep júrgenin bildirip, sabyr saqtap úndemeı tura berdi. Qıdy aparyp tógip kelgen soń ǵana:

— Kóke dese, Arysbek shıbarqyt shalbar alsam ba dep júrgen, — dedi murnyn bir tartyp qoıyp.

— E, alamyn dese — alsyn.

— Ol júz som turady ǵoı.

— Meıli, eki júz som bolsa da, alsyn. Kóńili sony qalasa, ózi unatsa, kısin de júrsin.

— Eger aqsha jetpeı qalsa, men Arysbektiń eski bátińkesin kıip júre turam.

Aqmyrzanyń qolynan kúregi túsip kete jazdady. Nege ekeni, Táshkenbaıdyń myna sózi júregin shym etkizdi. Oǵan ańtaryla qarap turdy da:

— Jetedi, — dedi aqyryn ǵana ún qatyp. — Jetedi... bárińe de jetedi. Kimge ne kerek, bárin alyp beremin.

Sony kútip turǵandaı-aq Zadarıa men Montaı jarysa:

— Maǵan mashına!

— Maǵan da! — dep qaldy.

Kókesinen kóńildi jaýap estı sala, ekeýi de qýanyp:

— Ý-r-ra — dep aıqaı salyp, máz bolyp júgire jóneldi. Olar oınap ketken soń Táshkenbaıdyń bir nárse aıtqysy keldi. Óz-ózinen qysylyp, kókesine qaıta-qaıta kózi jáýdirep qaraı berdi.

— Kóke, — dedi sálden keıin. — Naýbaıhanashynyń unyn ózine qaıtaraıyqshy.

— Qaıdaǵy un? — Kenet Aqmyrzanyń óziniń de esine túse ketti. — Á-á! Ol ne, surap kelip júr me?

— Jo-o, ózi suramaıdy ǵoı. Biraq balasy kúnde mazaqtaıdy.

— Ne deıdi ol?

— Sizdi... sizdi ury deıdi.

— Ury deı me?! Ótirik aıtady ol. Biz urlap alǵan joqpyz, qaryzǵa surap aldyq. Solaı dep aıt. Aılyq alǵan kúni unyn ózine qaıtaramyz.

Aqmyrza qı kúrep júrip qysta bolǵan sol bir oqıǵany esine aldy. Naýbaıhanaǵa ústi jabyq mashınamen otyz shaqty qap un kelgen. Túsirisetin adam tappaı zyr qaǵyp júrgen naýbaıhanashy Ikram-ákáǵa garaj jaqtan azdap qyzýlaý kele jatqan Aqmyrza jolyǵyp qaldy da, ol kómektes dep jata kep jabysty. Qamar úıde un qalmady dep qulaǵynyń etin jep júrgen. Bir qabyn qaryzǵa surap alǵysy keldi. Biraq ondaı oı sanasyna keıin oralyp edi ǵoı. Áýeli naýbaıhanashydan tamaq jibitetin birdeme tabylyp qalar dep dámetken. “Birdeme” degeni óz-ózinen túsinikti, árıne. Sóıtip, bir mashına undy aq ter, kók ter bolyp júrip tasysyn. Arqasyndaǵy qapty túsire berip Ikramǵa qarap:

— Qalaı? — dep qoıady.

— Ýı, bárákálla, bárákálla! Myń ıashań! — deıdi ol.

Aqmyrzanyń kútkeni “myń jas” emes. Júz jasasa da qudaıyna dán rıza. Al qazir oǵan “júz gram” bolsa tipti qatyp keteıin dep tur. Sondyqtan da arqasyndaǵy qapty túsire berip taǵy da:

— Qalaı? — deıdi jymyńdap.

— Ýı, bárákálla! Myń ıashań! — deıdi Ikram rıza bolyp.

Al Aqmyrza yza bolyp: “Áı bárákeldeń de, myń jasyń da bar bolǵyr, — deıdi ishteı kúıinip. — Bizge “júz” de jetedi!”

— Tańdaı jibitpeımiz be?! — dedi aqyry.

— Ýı, Ahmyrza, máћázin jabylyp qaldy ǵýı... Úıde arah joh...

— Tabamyn degen kisi tabady ǵoı. “Qalmentorgqa” barsań... alasyń da qaıtasyń.

(Aýylda araqty on bes somnan úıinde jasyryp satatyn Qalmen degen kisi bar edi.)

— Haıda-an?! — dedi Ikram daýsyna ókinish aralasyp. — Oǵan sonsha ahshany haıdan tabam?

— Áı, — dedi Aqmyrza alaqanyna juqqan undy qaǵyp turyp. — Endeshe, bir qap un ber.

Qaryzǵa dep ádeıi qasarysyp aıtpady. Ikram kózi jypylyqtap turyp qaldy da:

— Býlmaıdy ǵoı, — dedi.

— Bolmasa, men boldyraıyn, — dedi Aqmyrza qısyq sóılep. Sóıtti de “áýp” dep bir qap undy arqasyna salyp, úıine qaraı myqshyńdap jónele berdi.

— Áı, Ahmyrza, toqta endi! Munyń halaı?! — dep aıqaılady Ikram. Biraq sońynan qýyp, qaptyń ushyna jarmasqan joq. — Áı, Ahmyrza, Ahmyrza-a... — dep basyn shaıqap qala berdi.

Keıin, bir qap undy ortalap qalǵanda, osy áńgimeni Qamar esitip, qatty ókpelep edi. Táshkenbaıdyń da aıtyp turǵany sol oqıǵa ǵoı.

* * *

Kún tipti ysyp ketti. Jerdiń ylǵaly keýip, kóshe boılap ári ótken, beri ótken mashınalardyń izinen shań kóteriletin boldy. Kelesbaı da esik aldyn sypyramyn dep burqyratyp-aq jiberedi keıde. Alma aǵashtarynyń gúli erteli-kesh tógilip, taýsylyp bitti. Aqmyrzanyń balalary bul joly ákesiniń aılyq alatyn kúnin asyǵa kútti. Kim ne alǵysy keletinin aıtyp kúnde keshki tamaq ústinde ý-shý bolyp qalady. Bir paraq qaǵazǵa dúkennen alatyn nárselerdiń tizimi jasaldy. Ony jazyp júrgen Kelesbaı.

Torkóz dápterdiń bir paraǵyna iri-iri áriptermen:

1. Arysbekke — shıbarqyt shalbar (ımportnyı)

2. Táshkenbaıǵa — bátińke (39 razmer)

3. Maǵan — tápishki (orysshasy tapochka), kóılek

4. Zadarıaǵa — mashına

5. Montaıǵa da mashına (ekeýine birdeı alý kerek, áıtpese, meniki jaqsy, meniki jaqsy dep talasyp qalady)

6. Apama —... dep jazyp, apasyna qaraǵanda, ol:

— Áı, meni kelesi aılyqqa qaldyryńdar. Keler joly ne alarymyzdy bilmeı ańqıyp qalmaıyq, — dep kúldi. Sóıtip, ázirge bári de osy tizimge toqtaldy.

Búgin, mine, Aqmyrzanyń aılyq alatyn kúni. Balalar ádettegiden tys tatý, kóńildi júr. Birese Kelesbaı, birese Táshkenbaı velosıpedke minip, kósheniń bas jaǵyna deıin zýyldatyp baryp qaıtady. Kókem kele jatqan joq pa eken dep biraz qarap turady da, keıin qaıtady. Garaj jaqqa barýǵa búgin birtúrli uıalady.

Nege ekeni, Aqmyrza kúndegi keletin ýaqytynan keshigip jatty. Aqyry, Táshkenbaıdyń shydamy taýsylyp, mekteptiń art jaǵynda dop teýip júrgen balalarǵa qosylyp oınaýǵa ketti.

Kún batýǵa taqady. Kókem qashan keledi dep biraz qyńqyldap alǵan soń, Zadarıa men Montaı da jalyǵyp, úıge kirip ketti. Arysbek sákide otyryp kitap oqydy. Tek Kelesbaı ǵana tózimdilik tanytyp, qaqpanyń aldynda turyp uzaq kútti.

Bir kezde osylaı qaraı dedektep júgirip kele jatqan Táshkenbaıdy kórdi. Qýanǵannan júregi atsha týlap, Zadarıa men Montaıdy aıqaılap shaqyrýǵa da shamasy kelmeı qaldy. Adam bireýdi uzaq kútip júrip, kenetten qýanyshty habar estise sasqalaqtap, esi shyǵyp ketedi ǵoı. Kelesbaı da sóıtti. Táshkenbaıdyń aldynan júgirip shyǵyp:

— Kókem... kókem kele jatyr ma? — dep surady alqynyp.

Ol úndegen joq. Baqsa, Táshkenbaı jylap keledi eken. Túkke túsinbegen Kelesbaı:

— Saǵan ne boldy, a? Tóbelesip qaldyń ba? — dedi tosylyp. — Ne boldy, a, Táshken?.. Kókem qaıda?

Táshkenbaı onyń tusyna jete bergende sál toqtap, kóz jasyn jeńiniń ushymen súrtip turyp:

— Kókem... kókem mas, — dedi býlyǵa sóılep. — Ana jaqta... Maqannyń úıiniń janynda sharbaqqa súıenip tur...

Kelesbaıdyń alyp-ushqan kóńili sý sepkendeı basylyp, talaı kúngi qýanyshyn áp-sátte bireý tonap alyp ketkendeı, ishki álemi qulazyp sala berdi... “Qalaısha?.. Qalaısha?.. Bizdi aldaǵany ma sonda?.. — dedi erinderi dirildep. Kókem endi ishpeımin dep edi ǵoı... Bizdi... bizdi búgin mágázinge ertip aparamyn dep edi ǵoı... ”

Kelesbaıdyń da kózine jas úıirildi. Tap qazir onyń mynaý aýyldy, mynaý jápireıgen úıdi tastap, basqa bir aly-y-ys jaqqa ketip qalǵysy keldi.

Aqmyrza sharbaqqa súıenip, táltirektep úıine jetkende, esik aldynda qaz-qatar tizilip turǵan balalaryn kórdi. Bári de únsiz, jabyrqaý kúıde budan kóz almaı qarap qalypty. Ol teńselip ketip, qaıta túzeldi. Kóziniń aldy buldyrap taǵy da qarady. “Bular neǵyp tur-eı?! — dep oılady. — Tyrnalar sıaqty tizilip?.. Óı, ákeń... ”

Kenet, shynynda da, balalary appaq tyrnalarǵa aınalyp, aspanǵa ushyp bara jatqandaı kórindi. “Áı, — dedi ol qolyn sozyp, — áı, qaıda barasyńdar? Toqtańdar, toqta... ”

Aspan aınalyp jerge túskendeı, dúnıe shyrkóbelek bop ketti. Áne, áne, Aqmyrzanyń balalary aq tyrnalarǵa aınalyp, alystap ushyp barady. Jo-joq, usha almaı jantalasyp júr. Birese kókke umtylady, birese jerge soǵylady. “Áı, áı, ne boldy senderge? Qaıda... qaıda ketpek bolyp jantalastyńdar? Óz uıalaryńdy tastap qaı jaqqa ushyp ketpekshisińder?! Toqtańdar, toqta... ”

Aqmyrza olarǵa qarap qolyn sozǵan kúıi jerge gúrs etip qulap tústi.

---