InfoHub Logo

Erte, erte, ertede bir jyl úsh júz alpys bes kún boıyna tyrs etip jańbyr tambapty. Jer betindegi máýelep ósken aǵash ta, qulpyrǵan ásem gúlder, jaıqalyp turǵan ósimdikterdiń japyraqtary shyjyǵan ystyqtyń saldarynan sarǵaıyp solypty. Budan bylaıǵy jerde tiri júrýdiń qıyndyǵyn bilgen qustar sý tabýdyń amalyn qarastyrý úshin kóp bolyp jınalyp keńes qurypty. Sonda qustyń biri:

— Teńiz jaǵalaýyna barsaq kebersigen tumsyǵymyzdyń sýǵa tıýi sózsiz ǵoı, biraq ol tym alys, endi ne istese bolar eken, — depti. Aq tyrna:

— Onyń sharasy jeńil! Teńiz jaǵalaýynan shoqyp bir aryq alsaq, sýdyń ózi aǵyp keledi, — depti.

Qustar bul aqyldy jón kórip, teńiz jaǵalaýyna aryq alýǵa barmaqshy bolypty. Tek bir torǵaı ǵana janym qınalmasyn dep tóbe jaǵyn appaq qyp boıap alypty da qustarǵa:

— Qylshyldaǵan jas emes, qyrqyljyńnyń birimin, basym da aǵardy!

Bul jumysqa qaıtyp at salyspaqpyn? — depti.

Qustar oǵan qalsań qal degennen basqa eshteńe aıta almapty.

Sóıtip qustar teńiz jaǵasynan tumsyqtarymen shoqyp aryq alýǵa japa-tarmaǵaı attanypty. Olardyń shoqı-shoqı tumsyqtary qanap ketipti. Shyjyǵan ystyq kún qanattaryn kúıdirermen bolypty. Olar ystyqtan pysynap ólýge aınalǵanda ǵana sýy bar salqyn jerge baryp, az tynystap alyp, jumystaryn qaıta jalǵastyrady eken. Olar sóıtip jeti kún-jeti tún japaly shaıqas jasap, teńiz jaǵasynan aryq tartyp kelipti. Sý aǵyp ótken alqap jasyl túske enip, gúl-sheshekter qulpyra ashylypty. Buny kórip shattanǵan qustar shattyq ánin shyrqap sharq uryp, qýanyshtaryn saltanat etipti.

Basyn aq borymen boıaǵan manaǵy torǵaı ǵana ishqusta bolyp jabyrqaıdy eken. Qanat qaǵyp sharyqtaýǵa, án shyrqaýǵa onyń dáti barmapty. Basqalar mazaqtap kúleme dep basyn da kótere almapty. Qansha jýyp arpalyssa da, basyndaǵy aq bordy da ketire almapty. Sondyqtan jurt ony qazirge deıi «aqbas torǵaı» dep ataıdy.

---