InfoHub Logo

Ertede, bir baqa men qoıan kókoraı tekshede oınap júripti. Olar oınap júrip ádemi, kip-kishkene altyn kúbi taýyp alypty. Sonda baqa turyp:

— Muny men taptym, aldymen men kórdim, men alamyn, - depti.

Sóıtip, olar qyzyl keńirdek bolyp talasypty. Sálden soń sózin toqtatyp, baqaǵa násıhat aıtypty.

— Biz talasýdy qoıaıyq, etekten taý basyna qaraı jarysaıyq, qaısymyz kúbige buryn jetip ishine sekirip tússek, kúbini sonymyz alaıyq, jarysatyn kúnimiz erteń bolsyn depti, — qoıan.

Óziniń júıriktigin, baqanyń shabandyǵyn ábden biletin qoıan, ózin sózsiz utyp alamyn ǵoı dep kúpirshilik oılaıdy. Baqa da, jaryssa, óziniń utylatyndyǵyn ábden biledi de, qýlyq oılaıdy. Ol túr-túsi ózimen bip-birdeı eki dosyn shaqyryp keledi, bireýin taý basyndaǵy kúbiniń ishine túsirip, bireýin orta jolǵa turǵyzyp, ózi etekke túsedi.

Erteńinde tań sáride qoıan keledi. Olar jarysqa túsedi. Baqa bir-eki shorshyǵansha, qoıan kóp uzap shyǵady. Qoıan jol ortaǵa kelgende, oılamaǵan jerden baqanyń óziniń aldynda ketip bara jatqanyn kórip ish tartyp qalady. Ol «Men báribir basyp ozamyn dep oılap ushyrta jóneledi. Sol boıynda taý basyna jetkende áldeqashan kúbiniń ishinde otyrǵan baqany kóredi. Sóıtip bul jarysta qoıan utylyp altyn kúbiden qur qalady.

Baqa altyn kúbini utyp alǵanymen, ony etekke alyp túsire almaıdy.

Sóıtip, áńki-táńki bolyp otyrǵanda ushyp kele jatqan bir saryalaqaz onan «nege daǵdaryp otyrsyń» dep suraıdy. Baqa kúbini etekke jetkize almaı otyrǵanyn aıtyp, etekke jetkizip bere alasyń ba dep suraıdy. Qaz: «Buny jetkizip berýime bolady. Biraq altyn kúbiniń teń jarymyn maǵan beresiń», — deıdi. Basqa tabar aılasy bolmaǵan soń, baqa buǵan kónedi. Qaz altyn kúbini etekke alyp túsip, ekige bóledi. Ol ádemi altyn kúbiniń ózine tıgen synyǵyn talqandap, omyraýyna seýip alady.

Saryala qazdyń baýyrynyń altyndaı sary bolýy osydan eken.

---