InfoHub Logo

Ertede bir sarań baı bolypty. Onyń adam balasynda joq jalǵyz qula tulpary bar eken. Baı qula tulparynyń tuqymyn ósirip, dańqyn asyra túskisi kelipti. Sóıtip, qula tulpardyń qasyna bir bıeni qosyp, joıqyn teńizdiń ortasyndaǵy adam aıaǵy baspaıtyn ıen aralǵa alyp baryp tastapty. Tulpar qasqyrǵa da, adamǵa da aldyrmaıtyn tarpań eken.

         Arada biraz jyldar ótedi. Tulpardyń tuqymy kóbeıip, úıir-úıir jylqy bolypty. Jylqysynyń qansha ekenin kórgisi kelgen baı aralǵa kelse, shaqar tulpar mańyna jolatpaı qoıypty. Buǵan qyzyqqan baı ustamaq bolǵan kezde, tulpar teýip óltiripti. Keremet tulparlar tuqymynyń aralda ekenin estigen urylar qula tulpardy úıirimen aıdap ketýdi kózdep, aralǵa barypty.

         Áýelden tarpań, onyń ústine uzaq jyl boıy adam kórmeı, taǵy bop ketken qula tulpar urylardy kóre sala qarsy shabady. Aldyna kelgenin tistep, artyna shyqqanyn teýip, mańyna jolatpaıdy.

         Qula tulparmen alysyp, ábden qaljyraǵan urylar aldyrmaıtynyna kózderi jetken soń, sadaqpen atady. Sadaq oǵy tulpardyń aıaǵyna tıip, aqsatady. Jaralanǵan aqsaq qula burynǵydan beter qutyrady. Urylar tobyna qasqyrdaı tıip, taptaı bastaıdy. Amaly taýsylǵan urylar bir shuńqyrǵa túsip, jan saýǵalamaq bolady.

         Aqsaq qula muny kórgen soń, ózinen órbigen úıir-úıir tuqymyn ilestirip keledi de qaraqshylardy taptap óte shyǵady. Ońaı olja tappaq bolǵan urylar janshylyp qalypty.

         Sóıtip, qula tulpar úıirimen jabaıylanyp ketipti. Odan keıin jalpaq dalaǵa tarapty. Sol jabaıy jylqynyń tuqymy qulan eken.

---