InfoHub Logo

Bir kúni arystan, qasqyr jáne túlki - úsheýi serik bolyp, ańǵa shyǵypty. Keshke deıin jortyp júrip, bir qoıan, bir qyrǵaýyl jáne bir elik ustap alypty.

         Kesh bata úsheýi tamaqtanýǵa otyrypty. Arystan oljany qalaı bólisip jeýdiń amalyn tappastan:

         — Myna oljany sen bólshi, – dep, qasqyrǵa buıyrady.

         — Jaraıdy, – depti qasqyr jalaqtap. Sonan keıin jemtiktiń qasyna otyra qalypty. Sybanyp jiberip, bóle bastaıdy. – Mynaý qoıan judyryqtaı eken. Muny tutam ishekti túlki jesin. Qyrǵaýyl qylshyqty eken, muny qylǵynsam da men jeıin. Taqsyr arystan, boıyń da, jasyń da úlken ǵoı, elikke eshkimniń talasy joq, tart sybaǵańdy aldyńa.

         Oljany bulaısha bólgen qasqyrdyń qylyǵy arystannyń ashýyn qozdyrypty. Burqyldap turyp, qasqyrdy salyp kep jiberedi. Sonda qasqyrdyń bir kózi aǵyp túsipti.

         Arystan endi túlkige burylyp:

         — Al, endi sen bólip kórshi oljany, – dep buıyrypty.

         — Jaraıdy, taqsyr, – dep, túlki oljalaryn bólýge kirisipti, – Qoıanǵa aýyz tolmasa da kóńilge toq qoı, taqsyr. Bul ózińniń tis qandyryp, til basaryń bolsyn. Qyrǵaýyl qylshyqty bolǵanymen, qumar as qoı, bul túski asyń bolsyn. Al jalǵyz elik búkil eldi toıdyra ma, azýly aýyz asaýǵa laıyq, keshke qaraı jersiń. Al, biz ózińnen artylǵan qalǵan-qutqandy jep-aq júrek jalǵarmyz. Túlkiniń oljany bulaı bólgeni arystanǵa erekshe unap ketedi de:

         — Oý, túlkijan, oljany bulaı bólýdi sen qaıdan úırenip júrsiń? Óte durys bólis! – dep súısinedi.

         Sonda túlki:

         — Taqsyr, bul ádildikti men qasqyrdyń aǵyp túsken kózinen úırendim, – depti.

---