InfoHub Logo

Asan qaıǵy men balasy Abat aýyldan júz qadamdaı qashyqtap ketkende ákesi artynan aıqaılap:

— Áı, Abat-aý! — degen eken. Sonda Abat:

— Ia, túsindim, — depti. Joldastary Abattan ákesiniń ne degenin surapty. «Onyń jolda kezdesetin bir sózi qalǵan eken. Ol sózi «jańbyrly kúni janbaýyraımen júrme, atyń taıyp jyǵylady» degen ǵoı», — depti. Jigitter ákesinen baryp surasa, solaı degen sóz bolyp shyǵady. Olaı bolsa, Abattyń ózi de ákesinen kem emes, tapqyr, oıshyl ekeni ańǵarylady. Bolmasa Asan qaıǵydan jurt:

— Aseke, dúnıede kim myrza, kim qoryqpaıdy, kim qyzǵanbaıdy? — dese, bárine de:

— Abat qoryqpaıdy, Abat qyzǵanbaıdy, Abat myrza, —  dep jaýap beredi eken. onyń da sebebi bar.

Jurt Abattan:

— Siz nelikten myrza boldyńyz? — dese, ol bylaı dep jaýap beripti:

— Men dalada kóp júremin, talaı jerdi aralaımyn, súıtip júrip molalardyń ústinen shyǵamyn. Sonda bir kezde dańqy shyqqan óte baı adamdardyń súıegi shyǵyp, qýrap jatady. Jarly adamnyń da súıegi jatady. Osyny kórip: «baı bolsań da ólip, osyndaı súıegimiz qurıdy eken ǵoı. Tirshilikte ózine-ózi qımaı, ishpeı-jemeı jıǵan mal, eshkimge aýystyrǵysy kelmegen dúnıe bári de adam úshin qur áýre esebinde qalady eken. Olaı bolsa, tirlikte baı bolyp, mal jınamaı, sarań bolyp ataǵyń shyqpaı-aq, halyq qatarynda kún kórýge bolady» dep oılaımyn, — degen eken.

— Bolmasa, qoryqpaıtynym bylaı, — dep aıtady, — jol júrip kele jatyr edik. Biz qyryq shaqty atty edik, júrip kele jatqanda  rtamyzdan bir qoıan kók buta arasynan tap bola ketti. Qoıandy qoralap tura qaldyq. Jigitter ózderiniń naızasyn ońtaılanyp turdy. Qoıan qamaǵan bizden qutyla almastaı bolǵan sıaqty. Ólim-ómir arasynda turǵan qoıan qutylýdyń bir-aq jolyn izdedi. Ol sol turǵan jigitterdiń bireýiniń ústinen ata jóneldi. Kúni boıy ańdyp turǵan biz óldige, qutylmasqa sanap turdyq. Ánsheıinde «qorqaq qoıan» sol mezgilde óziniń oıyn qorytsa kerek. Ajal kelmese, qutylýǵa bolady eken. Olaı bolsa, ajal kelmese, jasanǵan jaýdan da qorqýǵa bolmaıdy. Sondyqtan men batyrlyqty sodan bastadym, — degen eken.

---