InfoHub Logo

Osy jyldan bastap kolej oqytýshylary biliktiligin kóterip, biliktilik sanaty berilgennen keıin laýazymdyq jalaqysynyń 30-dan 50 paıyzyna deıin qosymsha aqy alatyn bolady.

Bul týraly QR Bilim jáne ǵylym mınıstri Ashat Aımaǵambetov tehnıkalyq jáne kásiptik bilim berýdiń 80 jyldyǵyna arnalǵan is-shara barysynda málimdedi.

Vedomstvo basshysynyń aıtýynsha, buǵan deıin biliktilik sanattary úshin qosymsha tólemderdi tek mektep muǵalimderi alǵan bolatyn. «Pedagog mártebesi týraly» Zańnyń qabyldanýymen kolej pedagogteri de biliktilik sanaty berilgennen keıin aı saıyn qosymsha aqy alatyn bolady.

«Memleket basshysynyń qoldaýymen 2020 jyldyń qańtar aıynan bastap kolej pedagogteriniń jalaqysy artty, aldaǵy jyldary da arta túspek. Biliktilik sanaty úshin pedagogterge qosymsha aqy tóleý máselesi kóp jyldar boıy kóterilgen bolatyn. Eger mektepterde muǵalimder biliktilik sanattary úshin qosymsha aqy alsa, kolejderde mundaı úrdis bolǵan joq. Endi kolej pedagogteri de aı saıyn laýazymdyq jalaqysynyń 30-dan 50 paıyzyna deıin qosymsha aqy alatyn bolady. Óz kezeginde kolej dırektorlary men dırektor orynbasarlarynyń atqarǵan jumysynyń tıimdiligine baılanysty óz jalaqysynyń 100 paıyzyna deıin qosymsha aqy alý múmkindigi bar. Bul áriptesterimizdiń jumysqa degen ynta-jigeri men jumystyń tıimdiligin arttyra túspek», — dep atap ótti mınıstr.

Kolejderdi suranysqa ıe 100 mamandyq boıynsha jańǵyrtý jáne bilikti mamandar daıarlaýdyń halyqaralyq tájirıbesin engizý maqsatynda «Jas maman» respýblıkalyq jobasy iske asyrylyp jatqany belgili.

Mınıstrdiń aıtýynsha, atalǵan baǵdarlama sheńberinde qazaqstandyq kolejderge tehnıkalyq qural-jabdyqtar satyp alyp qana qoımaı, bilim berý baǵdarlamalaryn da jańartý josparlanǵan.

«Jas maman» — Elbasynyń bastamasymen júzege asyrylyp jatqan teńdessiz baǵdarlama ekenin aıta ketken jón. Ol elimizdiń 180 kolejinde júzege asyryla bastady. Osy rette tek tehnıkalyq qural-jabdyq satyp alý ǵana emes, sonymen qatar bilim berý baǵdarlamalaryn jańartý da josparlanǵan», — dedi vedomstvo basshysy.

Mınıstr óz sózinde QR Parlamenti Májilisi depýtattary tobynyń bastamasymen TjKBB júıesin damytý úshin normalar engizilgen Zań jobasy qaralyp jatqanyna toqtalyp ótti.

Atap aıtsaq, mamandardy daıarlaý barysynda eńbek naryǵy men jumys berýshilerdiń suranystaryn eskerý úshin kolejderge akademıalyq erkindik beriledi.

«Aqsha stýdentpen birge júredi» prınsıpi boıynsha qabyldaý tetigin engizý kolejdiń básekege qabilettiligin jáne kolejder arasyndaǵy básekelestikti arttyrýǵa múmkindik beredi. Eger qazir óńirlik bilim basqarmalary konkýrs ótkizip, memlekettik bilim berý tapsyrysy boıynsha kolejderge qansha oryn beriletinin anyqtasa, bolashaqta bul sheshimdi stýdentterdiń ózderi qabyldaıtyn bolady. Stýdentter qaı kolejdiń básekege qabiletti jáne jaqsy bilim beretinin ózderi tańdaıdy», — dedi Bilim jáne ǵylym mınıstri.

Óz kezeginde «Qazaqmys» korporasıasy» JSHS basqarma tóraǵasynyń orynbasary Ádilet Barmenqulov kolej pedagogterine jan-jaqty qoldaý kórsetiletinin atap ótti. Osylaısha, «Úzdik pedagog» respýblıkalyq konkýrsyna qatysqan pedagogterdiń árqaısysy korporasıa tarapynan 200 myń teńge kóleminde syıaqy beriledi.

Sondaı-aq Qaraǵandy oblystyq máslıhatynyń depýtaty, mesenat Bekzat Altynbekov óz sózinde «QR kolejderiniń TOP 100 stýdenti» baıqaýynyń jeńimpazdaryn 100 myń teńgege deıingi aqshalaı syılyqtarmen jáne «WorldSkills» álem chempıonatynyń jeńimpazyn bir mıllıon teńge kólemindegi syıaqymen marapattaýǵa daıyn ekenin jetkizdi. Elimizdegi kolejderdiń úzdik pedagogterine qazaqstandyq salalyq bilim jáne ǵylym qyzmetkerleri kásipodaǵymen saýyqtyrýǵa arnalǵan 17 joldama berilgenin de aıta ketken jón.

---