InfoHub Logo

Elimizdiń barlyq mektepterin dástúrli bilim berý túrine kóshirý máselesi pysyqtalyp jatyr. Bul týraly Májilis depýtattarynyń resmı saýalyna QR Premer-Mınıstri Asqar Mamınniń jaýabynda aıtylǵan.

«Jańa oqý jylyna daıyndyq máselelerin jan-jaqty saraptaý, qoǵammen keńinen talqylaý qorytyndysynda, sonymen qatar árbir óńirdegi epıdemıologıalyq ahýaldy eskere otyryp, Bilim jáne ǵylym mınıstrligi bilim berýdiń ár túrin (qashyqtan, shtatty jáne aralas) paıdalaný týraly sheshim qabyldady. Búginde 3,4 mln bala (onyń ishinde 2 613 428 bala qashyqtan rejımde, 252 343 bala mektepterde shtatty bilim berý rejıminde, 546 776 bala kezekshi synyptarda) mektepte bilim alyp jatyr», — dedi Premer-Mınıstr.

Onyń atap ótýinshe, qashyqtan oqytý túrin túsindirý úshin ata-anaarmen qosymsha jumystar uıymdastyryldy. Atap aıtqanda, 20 tamyz ben 17 qyrkúıekte jalpyrespýblıkalyq ata-analar jınalysy, al 21 tamyzda jalpyrespýblıkalyq synyp saǵat ótkizildi. Oqý prosesiniń qaýipsizdigin qamtamasyz etý úshin Densaýlyq saqtaý mınıstrligi Sanıtarlyq ereje ázirlep bekitti. Erejede bilim berýdiń barlyq túrlerin eskere otyryp, bilim nysandaryna qoıylatyn talaptar qamtyldy. Qashyqtan oqytýdy engizýge óńirlerdiń basym bóligindegi mektepterde bala sanynyń kóptigi de túrtki boldy.

«Dúnıejúzilik densaýlyq saqtaý uıymynyń málimetinshe, 12 jastaǵy jáne odan úlken jastaǵy balalar koronavırýs ınfeksıasynyń taralýynda belsendi ról oınaıdy. 2020 jyldyń 4 qazanyndaǵy jaǵdaıǵa sáıkes, mektep oqýshylary arasynda koronavırýs ınfeksıasyna shaldyǵýdyń 136 jaǵdaıy tirkeldi. Onyń ishinde 51 bala bastaýysh kezekti synyptarda, 85-i qashyqtan oqıdy», — dedi Asqar Mamın.

Úkimet basshysynyń atap ótýinshe, búginde Germanıa, Reseı, Ulybrıtanıa, Polsha, Fransıa, AQSH, Ońtústik Koreıa, Úndistan syndy elder koronavırýstyń jyldam taralýyna baılanysty dástúrli túrde bilim beretin mektepterdi karantınge jaýyp jatyr.

«Degenmen, Memleket basshysynyń tapsyrmasyna sáıkes, qazirgi ýaqytta beıindi memlekettik organdar kezeń-kezeńmen jumsartý jáne dástúrli bilim berý túrine oralý máselesin zerdelep jatyr», — dedi Premer-Mınıstr.

---