InfoHub Logo

(N. quramasy jaýyngerleriniń haty)

Qazaq poezıasynyń alyby, halyq ǵasyry qart Jambyl, Sizge, N. qazaq quramasynyń jaýyngerleri maıdannan jalyndy sálem joldap, qolyńyzdy qatty qysady. Biz jaýyngerler bul hatty árqaısymyz óz úıimizge jazyp otyrǵandaı sezimmen, adal júregimizben altyn kúnniń álemge nur shashqan jazyna kóz tige, súıikti qazaq dalasyn kózge elestete otyryp, Sizge joldaımyz. Sizdi ózimizdiń týǵan ákemizdeı ystyq. mahabbatpen saǵynyp eske alamyz.

Qajyrly ákemiz, Jambyl! Sizdiń «Balama hat» degen óleńińiz tań aldyndaǵy shyǵystyń maıda jelindeı jelpip bizge jetti. Bizdiń jigerimizdi tasytty. Biz bárimiz de, osy hatty jazyp otyrǵandar, batyr dostarymyz týraly Sizdiń tátti jyrlaryńyzdy taǵy da oqyımyz degen úmittemiz.

Tyńdańyz qart, uldaryńyzdyń únin:

Ákemiz Jambyl alystan,

Ǵasyrdy kórgen danyshpan,

Tyńdap qulaq salyńyz,

Uldaryńnyń maıdannan

Jaýyngerlik sálemin,

Qabyl kórip alyńyz.

Ulyńdy batyr sansyz myń

Jelindeı jelpip jeńistiń

Jetti sizdiń hatyńyz.

Joldaǵan sálem júrekten,

Jalyndy ushqyr tilekpen,

Kúsh berdi, qart atyńyz.

Ýa, qadirli ata jan,

Uly jolǵa attanǵan

Uldaryńa senińiz:

Jaýdy aıaýsyz qyramyz,

Turǵyzbastaı uramyz,

Tazarǵansha elimiz!

Kókoraı shalǵyn kólimiz,

Asý asqar belimiz,

Bosanǵansha jerimiz

Toqtamaımyz bir mınýt

Taýsylmasa demimiz!

Fashıs degen zulym jaý

Oınamaıdy, kúlmeıdi,

Adamnyń tilin bilmeıdi,

Kisi óltirý, qan ishý,—

Ózgeni kózge ilmeıdi.

Sóılesý kerek olarmen:

Qyzyl ottyń tilimen,

Kók zeńbirek únimen,

Ushqyr oqtyń sózimen,

Egeýli naıza ózimen,

Bolat qanjar júzimen,

Uǵady sony nemister,

Túsinedi shynymen.

Osyndaı sumnyń talaıyn

Keltirip tilge úırettik,

At artyna súırettik,

Az kelgenin azdyryp,

Bir-birlep tobyn sırettik.

Qyzyl otty qaq jaryp!

Jaýǵan oqqa qasaryp,

Dushpannyń jatqan jerine

İrkilmeı kirdi ol baryp

Júrekti batyr Buryshev

Granatyn qolǵa alyp.

Qas batyrsha tolǵanyp,

Birin ońǵa qulatyp,

Birin solǵa sulatyp,

Qyrǵyıdaı tıdi nemiske

Jańbyrsha oǵyn boratyp,

Batyr ulyń Baımurzın

(Ábdirahman óz aty)

Oıyp túser dushpanyn

Jigittiń ótkir bolaty.

Ejelgi jaýyn kórgende,

Asyǵyp sabyr taǵaty,

Qyryp salar qynadaı

Jetkende mezgil saǵaty.

Jaý qutylyp keter dep

Úzbeı sirá kúderdi,

Jyldamdyǵy najaǵaı,

Qyımyly jaı oǵyndaı,

Jasymaıtyn jigerli,

Bir urystyń ústinde

Nemistiń bes tankisin

Bir-birlep órtep jiberdi. »

Kók zeńbirek súıretken

Egesken jaýyn kúıretken

Ernazarov Myrzabaı,

Ulyńyz ol da asqan er.

Ushqan qusty iletin

Jeldeı júırik júgirer,

Aýyzdyqpen alysyp,

Túpke jekken Qarager,

Zeńbirekti tartatyn,

Kedergi bolmaı yldyı, ór.

Jaıaý ásker sońynan

Kómek berdi árqashan

Qanatsyz ushqysh jigitter.

Atqany aýmaı tıetin,

Ólik etip nemisti

Top-tobymen úıetin:

Talaıyn joıyp dushpannyń

Úsh tankisin qyıratty.

Jaýdy tynbaı óltirý

İsi edi onyń súıetin.

Qyraǵy qyrdyń qyrany,

Dalanyń or qoıany,

Taýdyń júırik bulany,

Nemisterdi eki júz

Otyz toǵyz óltirgen

Súleımenov Ybyraıym

Qazaqtyń batyr ulany.

Ashkeıuly Raıymjan,

Talaı batyr baýlyǵan,

Aqyldy basshy kapıtan,

Urysta salqyn sabyrly,

Qyrandaryn órbitip

Jeńiske bastap júrdi can.

Tolyp jatyr osyndaı

Qaharman batyr jigitter,

Ózińniń sheshen tilińmen,

Bulbuldaı tátti únińmen

Uldaryńdy kemeńger

Álemge aıqyn jyrlap ber!

Sum fashısi, atajan,

Qarys súıem ilgeri

Bastyrmaımyz, jeńemiz!

Siz arqyly halyqqa

Osylaı sert beremiz!

Hosh bolyńyz, qart ata,

Usyndyq, mine, qolymyz.

Talaı jyldap taǵy da

Saý-salamat bolyńyz.

Uldaryńnyń jeńisin

Kózińizben kórińiz.

Asyl sózben erlerdi

Elge jyrlap berińiz!

N. quramasynyń jaýyngerleri, komandırleri men saıası qyzmetkerleriniń tapsyrýy boıynsha: ordendi jas aqyn, serjant Nurshaıhov Ázilhan, qos ordendi mergen Súleımenov Ybyraıym, ordendi leıtenant Husaınov Máti, kapıtan Barmanqulov Oljabaı, medaldi mergen Mataev Zamanbek, kapıtan Sharıpov Qasym, medaldi serjant Mamyrbaev Álimjan, leıtenant Nazarov Islam, ordendi úlken leıtenant Isın Máýlen, qos ordendi úlken leıtenant Bilálov Ádil, áskerı dáriger Syrlybaeva Márıam, maıor Dosanov Ábdirahman, ordendi qyzylásker Ábdikárımov Birgebaı, ordendi qyzylásker Omarbaev Muqan, úlken leıtenant Maqambaev Nurdildá, kapıtan Qasymov Qanı, úlken leıtenant Áteev Shazada, kapıtan Dúısembekov Ǵaısa, kapıtan Isataev Ydyrys, medaldi leıtenant Omarov Beksultan, leıtenant Qabdýllınov Qalıjar, úlken leıtenant Rahymjanov Balabek, úlken leıtenant Qasqarýov Jylqybaı, medaldi úlken serjant Batalov Júsip, podpolkovnık Báıishev Saqtaǵan.

Maıdandaǵy Armıa

---