InfoHub Logo

Ábýtalap kárıanyń qalaǵa qonys aýdarǵanyna kóp bola qoıǵan joq. Aýyldaǵydaı emes, mundaǵy tirlik arsy-gúrsi, qym-qýyt pa deısiń. Kóp qabatty úıdiń turǵyndary tańertemen jumystaryna ketedi. Keshke qaraı oralysymen úıdi-úılerine kirip, esikterin tars bekitip, qaıtyp kórine qoımaıdy. Kóleńke uzaryp, ińir qarańǵylyǵy qoıýlanǵansha esik aldyndaǵy aǵash oryndyqtardyń birine jaıǵasyp jan-jaǵyna qarap otyrady. Bul jerde de nemerelerin oınatqan birdi-ekili kempir-shaldan ózge eshkim kózge shalynbaıdy.

Birazdan baıqap júr, bular turatyn ekinshi qabattaǵy qarama-qarsy páterdegi kishkentaı ul kárıanyń qasynan úndemeı óte shyǵady. Ózi pysyq bala sıaqty. Tap-tuınaqtaı kıinip, qońyr sómkesin arqalap tympyń-tympyń ketip bara jatqanymen, úlken adammen sálemdesýdi bilmeıdi. Kip-kishkentaı bolyp, ol da asyǵys.

Kún besinge taıaǵan mezgil. Asyǵa adymdap qasynan óte bergen uldy kárıa toqtatty.

— Áı, balam kishkene aıaldashy!

Kishkentaı ul kidirdi.

— Atyń kim?

— Ashat.

— Qaı synypta oqısyń?

— Tórtinshide.

— Sabaǵyń qalaı?

— Jaqsy.

— Bestik baǵalaryń kóp pe?

— Ia, ata! Bir sabaqtan tórtim bar.

— Áke-shesheń úlken kisimen amandas dep aıtpaı ma?

— Aıtady.

— Endeshe, nege amandaspaısyń?!

Ashat jaýap qaıtarmady. Basyn tómen tuqyrtyp turyp qaldy.

— Já, qysylma! Onda bylaı eteıik. Sen osy jerde tur, men úıden shyǵyp kele jataıyn. Meni kórgende Assalaýmaǵaleıkým dep daýsyńdy shyǵaryńqyrap amandas, jaraı ma?

— Jaraıdy.

Kárıa podezge enip, uzamaı qaıyra shyqty. Ony kórgen Ashat:

— Assalaýmaǵaleıkým, ata! — dedi daýystap.

— Ýaǵaleıkýmassalam! Órkeniń óssin shyraǵym! — dedi kárıa.

Ábýtalap ata bul jattyǵýyn erinbeı bes ret qaıtalady.

Arada úsh kún ótti. Ábýtalap aqsaqal esik aldynda otyrǵan. Ákesine erip esik aldyna shyqqan Ashat kárıany kóre sala:

— Assalaýmaǵaleıkým, ata! — dedi júgirip kelip.

— Aınalaıyn, úlken jigit bol! — dedi ata rıza peıilmen.

— Siz týraly estigem, - dedi Ashattyń ákesi. — Syrtyńyzdan jaqsy bilemiz. Ózim de tanysaıyn dep júr edim.

— Oqasy joq shyraǵym! Tanysyn, tanymasyn jasy kishi adamdardyń, onyń ishinde balalardyń úlken kisige sálem berýi — adamgershilik! İzet — iltıpat! Osyny esterińde ustańdar! Al, Ashat qulynshaq, qolyńdy jaı, bata bereıin!

— Ashat pen ákesi qoldaryn jaıdy.

— Jortqanda, balam jolyń bolsyn!
Ómir jasyń uzaq bolsyn!
Qataryńnan ozǵan óren bol,
Teńizdeıin tereń bol!
Aqylyń assyn,
Yqylasyń tassyn!
Saǵyń synbasyn,
Baǵyń nurlansyn!
Allahýákbar!
Áýmın!

Sodan bastap Ashat úlken kisilerdi kórse sálemdesip júretin boldy.

---