InfoHub Logo

Ata-ájesiniń baýyrynda ósken Úsen uqypty bala. Qaı qashan kórseńiz, kıimi tap-taza, muntazdaı bolyp júrgeni. Ústine qylshyq jýytpaıdy. Onyń mundaı múttaqym ádeti atasynan juqqan.

— Adamnyń sózi de, is-qımyly da, kıgen kıimi de ózine qonymdy hám jınaqy bolǵany lázim! Tazalyq pen shıraqtyq kisi kórki, — deıtin atasy ylǵı.

Úsenniń atasy ol sózderdi aıtyp qana qoımaıdy, ózi de aıtqan ýájinen alshaq ketpegen, bes ýaqyt namazyn qaza qylmaıtyn taqýa, hám adal kisi.

Áý basta Úsen taza, jınaqy degen sózderdiń maǵynasyn túsingenimen, «kórik» sózin asa uǵyńqyramaıtyn. Aldyńǵy jyly mektep qabyrǵasyn attaǵanda, kitaptan oqyp bildi. Túsine bilgen janǵa kitap baǵa jetpes qazyna ǵoı!

...Keshqurym. Keń dańǵyl boıyndaǵy avtobýs aıaldamasynda kólik tosqan adamdar kóp. Mektepten shyqqan Úsen tympyń-tympyń etip keldi de, eresek adamdardan aýlaqtaý ońasha baryp turdy.

— Kúz aıy bolǵanymen, ystyq qaıtar emes, — dedi qysqa jeń jeıde kıgen, buıra bas aǵa qasynda turǵan serigine moıyn buryp.

— Ras aıtasyń. Jaryqtyq aýa-raıy kúzge uqsamaıdy. Jańbyr jaýmaǵaly da birtalaı ýaqyt. — Uzyn boıly, jalań bas aǵa da ystyqtaǵan sıaqty. Kástómin sheship, qaryna ildi.

— «Aspan aınalyp, jerge túsip tur», deýshi edi kárıalar. Sol ras, — dedi buıra bas aǵa qalta telefonyna úńilip. — Mássaǵan! Kútkenimizge jarty saǵat! Qaıda, bar bolǵyr kólik?!

— № 55 marshrýttyń yzasy ábden ótti. Ylǵı osy! Zaryqtyryp qoıatyny-aı!

— Tamaǵym qyshyp barady. Táýir shylymyńnan shegeıik, júr bylaıyraq, — dedi uzyn boıly aǵa dosyna.

Eki aǵa temekilerin tutatyp, áńgimelerin aıtyp turǵanda kóp kúttirgen № 55 avtobýs anadaıdan kóringen. Úlken aǵalar tartyp turǵan temekilerin óshirmesten laqtyra saldy. Taǵatsyzdanyp turǵan kisiler salon toly jolaýshylarǵa qaramastan, birin-biri ıterip, syǵylysyp, topyrlap enip jatyr. Úsen kelesi joly mineıin dep asa umtyla qoımady. Ornynan tapjylǵan joq. Kenet kishkentaı balanyń nazary jerge laqtyrylǵan temeki tuqylyna túse ketti. Tolyq sónbegen shóp arasyndaǵy tuqyl byqsyp jatyr. Alda-jalda eshkim baıqamasa, qýraǵan shóp tutanyp órtke ulasýy múmkin-aý! Qaıtse bolady?!

 Úsen jaqyndap bardy da, aıaǵymen myjyp, taptap eńkeıip jerden kóterdi. Ony-muny qoqys tastaıtyn túbek izdep edi, kózine túse qoımady.

Kisilerdiń kóptiginen esikteri jabylmaǵan avtobýs áli ornynan qozǵalǵan joq. Júrgizýshi aǵa esikke qysylyp, baspaldaqta turǵan jolaýshylardyń jerge túsýin ótinip, qaıta-qaıta dybys kúsheıtkish qurylǵy arqyly habarlaǵanyn elep-eskerip jatqan jan joq. Uıaldy ma eken, álgindegi temeki tuqylyn laqtyrǵan eki kisi jáne birer jolaýshy kelesi avtobýsqa otyrmaqshy bolyp jerge tústi.

— Shylymdy shala-pula shegip edik, ákelshi taǵy, — dedi buıra bas aǵa.

 Osy kezde olardyń qastaryna taqap barǵan Úsen:

— Mynaý sizderdiki me? Men shóp arasynan jańa taýyp aldym, — dedi.

— Myna bala qaıtedi, eı?! Kim, neni laqtyrmaı jatyr?! Jáne biz senen shylym tuqylyn suradyq pa? Bar, jaıyńa tur, — dedi uzyn boıly aǵa kishkentaı ulǵa ashýlana qarap.

— Nege laqtyrdyńyz?! Men bárin kórip turdym. Sóıtýge bola ma eken?!.

Taqyldap, shynyn aıtqan balanyń saýalyna úlkender jaýap qaıtarǵan joq. Sol sátte kóshe burylysynan № 55 marshrýt kórindi.

Úlkendermen birge Úsen de avtobýs salonyna umtyldy.

---