Basynda qý aǵashtyń taqıań tur,
Aq kúmis, adyra qalǵyr, jarqyrap tur!
Kelmeseń sol barǵannan, jalǵyzym-aı,
Artyńda qalǵan apań ańyrap tur.
Jetkende jeti jasqa quran bildim,
Moldaǵa seni oqytqan qunan berdim.
Artynda apasy joq, sińilisi joq,
Qalyńdy jalǵyzyma nege berdiń ?!
Aıtamyn, aıt degennen atym tusap,
Tusap qoıǵan jerinde tursyn jýsap.
Kelgende elý beske, sumyraı Báten,
Týar ma endi bala Balǵynǵa uqsap?!
Qaraǵym, aınalaıyn, qandaı edi,
Baýyrsaq maıǵa pisken, nandaı edi.
Maqtasam ózimdi-ózim, bolar elim,
Balanyń ózi qurby mańdaıy edi!
Qaraǵym, aınalaıyn, uly kentim,
Sarǵaıdy sanamenen aqsha betim!
Bolǵanda qys ortasy, syǵyr oıbaı,
Buzyldy jalǵyzyma kurǵan kentim.
Aq eshki kelip jatyr laǵyna (qulaǵyna),
Sút bergen aq úrpinen shyraǵyna.
Qosylyp, kel ekeýmiz, zarlanaıyq.,
Allanyń túser me eken qulaǵyna?!
Tapqany aq eshkiniń - egiz laq,
Bireýi laǵynyń - salpań qulaq.
Aq eshki, kókke qarap, kádeńdi je,
Tabarsyń esen bolsań taǵy da laq.
Aq eshki, sen de muńdy, men de muńdy,
Jaratty bir jaratqan beseý (bı saý) sumdy.
Aq eshki, kókke qarap, kádeńdi je,
Qudaıym berer me eken bizge de uldy?!
Boıynan Dosqananyń el ótedi,
Shapannan jalań qabat jel ótedi.
Syǵyr-aı, men zarlanbaı, kim zarlansyn,
Balǵynnyń endi maǵan aıy ótedi!
Dosqananyń baýyry jalǵyz tamady,
Aıamaǵan bir Kudaı jalǵyzdy alady.
Elý beske kelgende, sumyraı Báten,
Jalǵyzynan aıyrylyp ańyrap qaldy.

---