InfoHub Logo

Men óz oblysymyzdaǵy bir mekeme bastyǵynyń kabınetinde otyr edim. Bir ýaqytta aq óńdi, doǵa muryn, shashy quljanyń múıizindeı ıirim-ıirim bolyp qulaǵyn jaýyp ketken bireý kirdi de, meniń qarsy jaǵymda turǵan kresloǵa syzyla kelip otyrdy.

— Bizdiń hatshymyz Atarmanov, — dep tanystyrdy mekeme bastyǵy.

— Qara-eke, — dep Atarmanov kózin tómen saldy. – Qara - eke, álgi Qaraǵandyǵa júrý máselesimen... Sony anyqtap alsam ba dep... sheship berseńiz jaqsy bolar edi... — hatshy kúmiljip baryp toqtady.

Mekeme bastyǵy shyqshytyn qozǵady. Sodan keıin ájim úımelegen shegir kózin hatshysyna aýdarmaı qadap, biraz yńyldap otyrdy da, jáı ǵana:

Sársenbi kúni júrip ketkeniń durys bolar, — dep tizginniń ushyn usyna sóılep, maǵan aıtyp otyrǵan sharýa jaıyn jalǵaı berdi. Baıqaımyn, osyndaı qaraýyndaǵy adamdaryna yryq bergensip, erkine salǵansyp otyryp, óz degenin istetkizetin adam ǵoı deımin. Sol bosań aıtqan, bylq etkize salǵan sóziniń ózinde de kesim jatqandaı sezildi maǵan.

Men kelgen sharýamdy bitirip, ketýge aınaldym. Mekeme bastyǵy shegir kózin taǵy da hatshysyna qadady.

— Al, Atarmanov, sonymen qashan júretin boldyń?

Hatshy shylymyn sóndirip kúl salǵyshqa tastady da, shalqaıa otyrdy. Sodan keıin:

— Aldaǵy sársenbide júremin. Jumys bar munda. Tez oralýym kerek, — dep óz betimen is sheshetin reýshte, sharýa qamyn oılaǵansyp kesip sóıledi.

Bastyq sál ǵana ezý tartty. Men bylaı shyǵa bere «búrokrattar osy hatshy sıaqtylardan shyǵady-aý» dep oıladym.

---