InfoHub Logo

1954 jyly Ýkraınanyń Rossıaǵa qaıta qosylýynyń úsh júz jyldyǵy toılandy. Sol toıǵa Qazaqstannan barǵandardyń biri — Sábıt Muqanov.

Qaıda júrse de qalamy qolynan túspeıtin jazýshy kele salyp, segiz-toǵyz baspa tabaqtaı kól-kósir ocherk jazdy. Sol ocherkti men «Ádebıet jáne ıskýsstvo» jýrnalynyń kezekti sanyna daıyndadym. Eń aldymen, kólemin tort baspa tabaqqa túsirdim. Onyń ústine, asyǵystaý jazylǵandyqtan, dolańdaý shyqqan dúnıeni jaqsylap turyp redaksıaladym. Sábıt jýrnalǵa keter jańa nusqany oqyp shyǵyp, razy ekenin tanytty.

— Bala, redaksıalaǵanyń durys bolǵan.

Ocherk terilýge ketti. Men bolsam, úlken aǵaǵa az da bolsa qyzmet etkenimdi, ol qyzmetimdi úlken aǵanyń qabyldap razy bolǵanyn maqtan etip júrdim. Biraq bul qýanyshym uzaqqa barmady. Jýrnal jurtqa tarardyń aldynda qaıshyǵa kelip tússin: Ýkraınanyń Rossıaǵa qaıta qosylýy. Al Sábıt bolsa, qaıtasyz qosylýy dep basa bergen. Sábıt jibergen qateni men de baıqamappyn. Ýkraınanyń Rossıaǵa qosylýy — dep tarta berippin. Sol qate jóndelip, ocherk qaıta terilýge tıisti. Moınyma ájeptáýir aqsha minetin túri bar. Endi qaıttym? Qınala-qınala Sábeńe telefon shyldyrattym. Oıym — ózinen ketken qate bolǵandyqtan, shyǵynyn da ózi kóteretin shyǵar ǵoı baıaǵy. Osylaı da osylaı. Meni tyńdap alǵannan keıin, Sábıt jaýaby tym qysqa boldy:

— Durys...

Muqanovtyń osy «durysy» maǵan myń somǵa tústi.

---