InfoHub Logo

Aqjol shabdar atym bar, Aqshamǵa azan aıtyp, allahý ákbar degende, Almatydan shyǵyp La-ı-la-ha-ıl-la-la degende Qarǵalyny qaq jaryp, Uzynaǵashqa bardym. Sol jerden bir aýyz tıip attanyp, bulań quıryqpen qazan qaınap jatqanda, Qazan qalasyna bardym. Qazan qalasynda bir jomart adam bar edi. Baıaǵy qonaq keldi dep atymdy shaýjaıynan ustaı aldy, — depti.

(Almaty ýezi Baıjaras uly Raqmetqalıdan)

Ótirikti aıtqan jaqsy,

Qostaýshysy tabylsa

Eki ótirikshi biri bastap, biri qoshtap, el aralap, ótirik aıtpaqshy bolypty. Bireýi bir kún ilgeri júrip, el aralap qonǵan, tústengen jerine, jolyqqan adamyna ótirik aıta bermekshi bolypty. Ekinshisi bir kún keıin júrip júrip, sol jónmen aldyńǵy ótirikshiniń aıtqanyn rastamaqshy bolypty.

Ótirik bastaýshy bir aýylǵa kelip qonypty. Aýyl adamdary: «Jaqsy-jamannan ne til bar?» — dese, ótirikshi: «El aman, jurt tynysh. Jalǵyz-aq kókti kóbeleı, aspandy aralaı kóship bara jatqan eldi kórdim», — depti. El nanbapty.

Endi kelesi keshke sol aýylǵa qostaýshy ótirikshi kelip qonypty. Aýyl adamdary taǵy da: «Jarqynym, jaqsy-jamannan ne til bar, keshe bir qonaq, kókti kóbeleı, aspandy aralaı el kóship bara jatyr eken deıdi. Onan ne bilesiń?» — deıdi. Qostaýshy: «Bolsa-bolar, óıtkeni aspannan anda-sanda kóregeniń saǵanaǵy túsip bara jatqanyn kórdim», — depti. Bul ótirik sodan keıin laqap alyp elge tarap ketipti.

Kelesi kúni ótirikti bastaýshy endi bir elge kelgende, taǵy da estigen-bilgendi suraǵanda: «Bóten aıtarlyq sóz joq, jalǵyz-aq jolda bir úlken kól órtenip jatyr eken», — depti. El nanbapty.

Endi kelesi keshte aldyńǵy ýádemen qostaýshy ótirikshi kelip qonypty. Aýyl adamdary taǵy da: «Jarqynym, jaqsy-jaman ne til bar. Keshe bir qonaq kelip, jolda bir kól órtenip jatyr dep ketti. Onan ne bilesiń?» — deıdi. Sonda qostaýshy: «Jolda bir kepken kóldiń tabanynan pisken balyq jep, qaıran bolǵan edim. Mynaýyńyz sol jer bolar», — degen eken. Bul tapqyrlyqqa rıza bolǵan el: «Ótirikti aıtqan jaqsy, qostaýshysy tabyl-sa», — dep mátel etip ketipti.

---