InfoHub Logo

Bazar Úkıev terisi súıegine jabysqan, aryq, qasqabas kisi. Keńes úkimeti dáýirinde aýdandyq atqarý komıtetiniń jalpy bóliminde isteıdi. Birde qyzmetke kele jatsam, aýatkomnyń janyndaǵy baq ishinde terekke súıenip tur eken. Sálemdeskennen keıin:

— Bazeke, qalaı?, — dedim.

— Oı, nesin aıtasyń inishek, qatty sharshap turmyn, — dedi.

— Tynyshtyq pa ózi, ne istep sharshap júrsiz?

— Óz aramyzda qalsyn, men myna aýdandyq atqarý komıtetine jurttyń jeńil mashına surap jazǵan aryzyn tirkep te otyramyn. Barlyq is papkilerin jańalap, bylǵary qapty jańa jýrnal ashyp, oǵan ótinish berýshilerdi ádemilep tirkep qoıǵanym sol edi, bastyq shaqyryp alyp, ótinish berýshilerdiń aty-jóni jazylǵan jýrnaldaǵy tizimniń aldyńǵy jaǵyna bir adamdy qos deıdi. Jýrnaldy kórsetip, qalaı qosamyn, tizimniń sońy jaǵyna tirkeıin desem, ózime ursyp, olaı bolsa jańa jýrnal ashyp, tizimdi qaıta kóshirip, álgi kisini eń aldyna tirkep, jaz degen... jóne bul únemi qaıtalanyp turady, onymen qoımaı bol-bolǵa salyp asyqtyratynyn qaıtersiń, búgin túski asqa da barǵan joqpyn,-dedi kúrsinip.

— Sonda qalaı, siz tek jýrnaldaǵy tizimdi qaıta kóshirýmen otyrasyz ba?

— Otyrmaǵanda... bastyqtyń nusqaýy solaı... Jýrnaldy jylyna bes-alty márte jańalaımyn...

— Onyńyz qıyn eken, — dedim de jónime kettim.

Arada aıǵa jýyq ýaqyt ótkende Bazarmen álgi jerde taǵy kezdesip qaldym. Bul joly áneýgideı emes, kóńildi.

— Oý, Báke, kóńildisiz ǵoı?

— Iá, ótkende ózińe aıtyp em ǵoı, jýrnal jaıynda...

— Iá, esimde.

— Sol jýrnaly túskirdi qaıta kóshirmeýdiń ádisin taptym...

— Qalaısha?

— Endi jýrnaldaǵy tizimniń arasyn ańqıtyp, ashyq-ashyq ǵyp jazatyn boldym. Bastyqtyń qos degen adamyn qosyp, tirke degen jerine tirkep jaza salamyn, burynǵydaı qınalyp jatpaımyn. Bastyq ta rıza, maǵan da jeńil...

Ol osyny aıtyp, máz-meıram bop, aqtaryla kúldi-aı kep. Onyń oılap tapqan "ádisine" men de kúldim. "Ańqaý elge aramza molda" degen osy-aý...

---