InfoHub Logo

Búgin Májilistegi Úkimet saǵatynda oqýlyqtardaǵy kemshilikterdi talqylaý máselesi boıynsha depýtat Bekbolat Tileýhan QR Bilim jáne ǵylym mınıstri Erlan Saǵadıevti jekpe-jekke shaqyrdy, dep QazAqparat habarlaıdy.

Álippeni qaıtarý máselesine toqtalǵan depýtat, «Saýat ashý» - saýasyzdyqty joıý degendi bildiredi... Burynǵydaı qala berse, onyń qandaı qaıshylyǵy bar. «Álippe» degen sóz sımvoldyq, beıneli ataý. Bul ataý qanymyzǵa sińgen. Ol - Ahmet Baıtursynovtardan kele jatqan ataý. Osy oraıda búkil zıaly qaýymnyń talabyn aıtatyn bolsaq, «Saýat ashý» aty men ataýyn qurtyńyz da, «Álippeni» bizge qaıtaryp berińiz. Aıaq astynan birdeńi bastap ketesizder de, keıinnen qoǵamnan qarsylyq bolyp jatady. Elbasy Joldaýynda barlyǵyn aqylmen saralap, qabyldaýǵa shaqyrdy ǵoı. Endeshe, bastamalarǵa aqylmen muqıat qarańyzdar. Eń birinshi oılanyp alyp, sosyn isteý kerek»,-dedi.

Osy oraıda depýtat oqýlyqtardaǵy kemshilikterge toqtaldy.

«Ereke, osy máselege kim jaýap beredi? (Erlan Saǵadıevke qaratyp aıtqa sózinde). Álde baspa jaýap bere me nemese mınıstr jaýapty ma?! Naqty kim jaýap beredi? Kerek bolsa, oqýlyqtardy alyp kelemin de, soraqy nárselerdi birinen soń birin qoıdaı toǵytamyn... Balalar myna oqýlyqtarǵa qarap otyryp, zárezap bolady. Óıtkeni, óte aýyr, kitapty adam oqý múmkin emes. Balanyń jasy eshqandaı eskerilmegen. Ekinshi synyptyń balasyna jetinshi synyptyń oqýshysynyń deńgeıindegini jazyp berý rýhanı qaskúnemdik . Sabaqtastyqtyń joqtyǵynan, urpaǵymyzdy múgedek qylyp jatyrmyz»,-dep narazylyǵyn aıtty B. Tileýhan.

«Ereke, buǵan qazir jaýap berińiz. Qazir jaýap bere almasańyz, baspasóz betinde sizdi jekpe-jekke shaqyramyn jáne sizdiń jeńip ketýińizge shyn júrekten tilektespin. Ókinishke qaraı, jeńilip qalasyz-aý. Óıtkeni, eshqandaı ýáj joq. Erteń halyqtyń, saılaýshyldardyń aldynda biz jaýap berýimiz kerek», - dedi depýtat.

Óz kezeginde E. Saǵadıev oqýlyqtardaǵy kemshilikterge mınıstrlik jaýap beretinin atap ótti.

«Jyl saıyn úsh júzden astam oqýlyqtardy daıyndap otyrmyz. 5 myńnan astam muǵalimder osy sharalarǵa qatysyp otyr. Ár oqýlyq daıyndaý kezeńinde alty aı saıtta tur. Osy oraıda bul merzimde kemshilikterdi atap, qandaı ózgertýler engizý kerektigi turǵysynda ár adamnyń usynys jasaýǵa quqyǵy bar. Endi erterek qarap, usynystardy engizbeısizder me?! Qatelikter túzetildi ǵoı. Eger oqýlyqta kemshilikter qalsa, kerek bolsa, oqýlyqtardaǵy qatelikterdi izdeýge ázirmin», - dep jaýap qaıyrdy mınıstr.

---