InfoHub Logo

Nebary 40 jyl buryn Dýbaı injý jınaýshylar qonys tepken meken bolǵan edi. Al búginde ol – Birikken Arab Ámirlikterin kóriktendirip turǵan álemdegi eń iri ári fýtýrısik qalalardyń biri. Aspanmen tildesken ǵımarattar, djetpakpen ushatyn órt sóndirýshiler, ár qadamyńda ushyrasatyn joǵary tehnologıalar Dýbaıdy naǵyz qıaldaǵy bolashaq qalasyna aınaldyryp turǵandaı. Dese de Birikken Arab Ámirlikteri Jer betindegi mundaı ǵalamat qala qurylysyn azsynatyn tárizdi. Endigi olar Marsty baǵyndyrýdy josparǵa alyp otyr. Kúni keshe ótken memleket basshylarynyń samıtinde Birikken Arab Ámirlikteriniń premer-mınıstri men vıse-prezıdenti Muhammed ıbn Rashıd Ál Maktým Mars betinde shaǵyn qala turǵyzýdy maqsat etken jańa joba jóninde málimdedi. Atalǵan jobaǵa tek BAÁ ǵana emes, basqa da memleketter atsalyspaq. Sebebi munshalyqty aýqymdy joba úshin halyqaralyq yntymaqtastyqtyń mańyzy zor.

«Biz qashan da uly isterge talpynýdamyz, sondyqtan men jáne aǵam Muhammed ben Zaıd (BAÁ tuńǵysh prezıdenti jáne Ábý-Dabıdiń murager hanzadasy) adamdy Marsqa attandyrý boıynsha jahandyq umtylysqa qosylýdy jón kórdik», - dep málimdedi Ál Maktým.

Mundaı aýqymdy ári batyl joba 2017 jyly jarıalanǵandyqtan, Mars betindegi alǵashqy qalaǵa Mars 2017 degen ataý berilmek. Árıne, qalanyń qurylysy alys bolashaqta bastalatyny sóziz. Ony BAÁ basshysy da jaqsy túsinedi.

«Búgin tek jobanyń dánin ekkendeımin. Al atalǵan bastamanyń jemisin kóretin urpaǵymyz bolady», - deıdi memleket basshysy.

Mars 2017 qalasy aýmaǵy boıynsha amerıkalyq Chıkagomen birdeı bolady dep josparlanýda. Al ózge ǵalamshardaǵy qalaǵa 600 000 adam qonys tebe alady.

BAÁ-niń qarjylyq múmkindikterine qaramastan, Marsty baǵyndyrýǵa arnalǵan ózge de jobalar tárizdi, atalǵan jobanyń da júzege asýy kúmán týǵyzady. Joba jóninde jarıaǵa jar salý bir basqa, al ony iske asyrý – bir basqa másele. Deı turǵanmen, eger Birikken Arab Ámirlikteri iske shyndap kiriser bolsa, jobanyń shyndyqqa aınalýy ǵajap emes. Sondyqtan Marsty baǵyndyrýdy arman etken Ilon Masktyń qapyda qalmaǵany jón.

 

 

---