InfoHub Logo

Memleket basshysynyń úshinshi jańǵyrýǵa arnalǵan bıylǵy Joldaýy aıasynda jýrnalıs mamandardyń ekonomıkalyq bilimin kúsheıtý kerek, dep málim etti QR Bilim jáne ǵylym mınıstri Erlan Saǵadıev. Bul týraly QazAqparat habarlaıdy.

«Árıne, jýrnalıserdiń ekonomıkalyq bilimin kóterý kerek. Sebebi bıylǵy Joldaý aıasyndaǵy barlyq sharalardy xalyqqa túsinikti tilde jetkizgen asa mańyzdy. Ol - bir. Ekinshiden, qarapaıym xalyqtyń ekonomıkany jaqsy bilgeni sol ekonomıkanyń ózine de paıdaly. Sondyqtan buqaralyq aqparat quraldary salasyndaǵy mamandardyń ekonomıka boıynsha arnaıy bilimderin kúsheıtken jón», - dedi Saǵadıev QazAqparat tilshisine bergen suxbatynda.
Al «Jýrnalıserdi daıarlaý jaǵynan qandaı da bir ózgeris bola ma?» degen suraqqa mınıstr: «Árıne. Olarǵa arnaıy kýrstardy engizemiz. Sosyn bizde akademıalyq erkindik aıasynda joǵary oqý oryndaryna oqý baǵdarlamalaryn ózgertýge múmkindik beriledi. Olar ózdigimen maman daıarlaý júıesin túzete alady», - dep jaýap berdi.

Aıta keteıik, QR Aqparat jáne komýnıkasıalar mınıstrliginiń keńeıtilgen alqa májilisinde mınıstr Dáýren Abaev ta saraptamalyq jýrnalısıkany damytý máselesine basa nazar aýdarǵan bolatyn. Sebebi qazaqstandyqtar tele-radıo salasynda kásibı jýrnalıserdiń tapshylyǵy máselesin jıi kóteredi. Al baspasózde saraptamalyq materıaldar az. «Ústimizdegi jyly memlekettik aqparat quraldary aldynda birqatar mindetter tur. Eń aldymen saraptamaǵa, taldaý materıaldaryna kóptep kóńil bólý kerek. Óıtkeni búgingi tańda aqparat óte tez taratylady. Sondyqtan sol aqparattardyń mazmuny men sapasy saı bolýy tıis», - dep atap kórsetti Abaev.

---