InfoHub Logo

Minekeı, karantın jaǵdaıyndaǵy oqý jylynyń IV toqsany aıaqtaldy. Tótenshe jaǵdaıǵa baılanysty Qazaqstan mektepteri men joǵary oqý oryndary da jappaı qashyqtan oqytý formatyna kóshken edi. Osy oraıda, mektep oqýshylary úshin Online Mektep jobasy qashyqtan oqýdyń negizgi alańyna aınaldy.

Joba aıasynda 42 pán boıynsha 3 myńnan asa beınesabaq, 20 myńǵa jýyq jattyǵý men túrli tapsyrmalar ázirlenip, karantın kezinde mektepten qol úzip qalǵan oqýshylardyń bilimnen qol úzbeı, qashyqtan sapaly bilim alýyna múmkindik jasaldy. Búgin osy jumystardy qorytyndylaǵan QR Bilim jáne ǵylym mınıstri Asqat Aımaǵambetov karantın jaǵdaıynda 2 aı boıy demalyssyz jumys istep, beınesabaqtar ázirlegen mamandarmen kezdesip, olarǵa alǵys aıtty.

QR Bilim jáne ǵylym mınıstrligi túsirilimge qatysatyn muǵalimderdi iriktep, sabaq sapasyn qadaǵalasa, Bilim Media Group komandasy sabaqtardyń túsirilim, aýdıo jáne montaj jumystary men jalpy tehnıkalyq sapasyna jaýapty boldy. Jobaǵa jalpy 160 muǵalim, 40 ádisker jáne kompanıanyń 100-den asa qyzmetkeri qatysqan. Beınesabaqtardy daıyndaýǵa atsalysqan muǵalimderge qalamaqy, sonymen birge tótenshe jaǵdaı kezindegi jumysy úshin syıaqy berildi. Osy tusta mınıstr Asqat Aımaǵambetov bul joba úshin Mınıstrlik Bilim Media Group kompanıasyna qansha qarjy tólegeni týraly saýal kópshilik kókeıinde júrgenin, alaıda memleket búdjetinen eshqandaı qarjy jumsalmaǵanyn atap ótti. Joba Bilim Media Group bastamasymen, kompanıa qarjysy esebinen júzege asyryldy. Mınıstrlik uıymdastyrý jumystary men ádistemelik baǵyt boıynsha qoldaý kórsetti.

Beınesabaqtar 6 sáýir – 22 mamyr aralyǵynda respýblıkalyq «Balapan», «Elarna» telearnalarynan kórsetildi. Sabaqtardyń aýdıotranslásıasy «Qazaq radıosy» men «Klasıka» radıolary arqyly taraldy. Sonymen qatar beınesabaqtardy jobanyń YouTube arnasynan da kórýge múmkindik berildi. Al BilimLand.kz platformasynda sabaqtardy qaraý, ınteraktıvti jattyǵýlar men testterdi, úı tapsyrmalaryn oryndaý, muǵalimmen keri baılanys jasaý, jalpy tolyq elektrondyq oqytý qamtamasyz etildi. 

Bilim Media Group kompanıasynyń dırektory Raýan Kenjehanulynyń aıtýynsha, 6 sáýirden búginge deıin BilimLand.kz platformasyn 3,2 mıllıon adam qoldansa, portaldaǵy beınesabaqtardyń qaralymy 73,9 mıllıonnan asqan. Al jobanyń YouTube arnasy 2 jarym aıǵa tolmaıtyn ýaqytta 289 myń qoldanýshy jıyp, qaralym sany 15,3 mıllıonǵa jetken. «Bul – tótenshe jaǵdaıdaǵy memleket pen bıznes seriktestiginiń úlgisi, yntymaqtastyqtyń nátıjesi. Bizge senim bildirgenderińiz úshin alǵys aıtamyz jáne elimizdegi bilim sapasyn, qoljetimdiligin arttyrý úshin jumysymyzdy ári qaraı jalǵastyra beremiz», – dedi Raýan Kenjehanuly.

---