InfoHub Logo

Byltyr eldi reformalarymen dúrliktirgen Bilim jáne ǵylym mınıstri Erlan Saǵadıev bıyl sala aıtarlyqtaı ózgeriske ushyramaıdy degen edi. Alaıda, 2017 jyly bilim salasynda talaı jańalyq bolyp, halyq arasynda qyzý talqyǵa tústi. Baq.kz tilshisi keıingi kezde maqtaýdan góri synǵa jıi ushyrap júrgen bilim taqyrybyna sholý jasap, 2017 jyly osy salada bolǵan ózekti máselelerdi eske salypty, sony nazarlaryńzǵa usynamyz.

Alǵashqy qońyraý 1 qyrkúıek kúni soǵylmady

Bıyl elimizde alǵashqy qońyraý ádettegideı 1 qyrkúıekte emes, 2 qyrkúıek kúni soǵyldy. Sebebi, 1 qyrkúıek Qurban aıt meıramyna sáıkes kelip, oqý jyly 2 qyrkúıekte bastaldy.

Jańa oqý jylynda birinshi synypqa 380 myń bala bardy. Bul byltyrǵy jylmen salystyrǵanda 10,5 myń balaǵa kóp. Al, barlyq oqýshy sany 2,9 mıllıonnan asty.

2016 jyly elimizde jańartylǵan bilim mazmuny kezeń-kezeńmen engizile bastaǵany belgili. Bıyl osy baǵytta jumys jalǵasyp, 2, 5 jáne 7-synyptar jańa oqý baǵdarlamasyna kóshti.

Nólinshi synyp engizildi

2017 jyldan bastap birqatar balabaqsha men mektepke nólinshi synyp pılottyq rejımde engizildi. Nólinshi synypty tolyǵymen 2019 jyly engizý josparlanyp otyr. Ony mektepte jáne balabaqshada oqýǵa bolady.

Álippe qaıta oraldy

2017 jylǵy oqý jylynan bastap Álippe mektepaldy daıarlyq tobynda oqytyla bastady. Bıyl kóptegen balabaqsha men mektep Álippeni pılottyq rejımde ótkizemiz dep usynystaryn túsirdi.

«Saýat ashý» «Ana tili» dep ózgertiletin boldy

Birinshi synypta oqytylatyn Saýat ashý pániniń ataýy 2019 jyly Ana tili dep ózgertiletin boldy. Osylaısha, kóptiń kóńilinen shyqpaǵan Saýat ashý ataýyn qulaǵymyz úırengen Ana tili pánine aýystyrý týraly sheshim qabyldandy.

Oqýlyqtar men jumys dápterlerine qatysty daý ýshyǵa tústi

Qoǵamda oqýlyqtardyń arnaıy jumys dápterlerin satyp alý kerektigi narazylyq týdyrdy. Dápterlerdiń qymbatshylyǵyna qaramastan Saǵadıev tek oqýlyqtarǵa aqsha bólinetinin, al dápterlerdi jergilikti ákimder áperý kerektigin aıtty.

Astanada biryńǵaı mektep formasy engizildi

Bıyl Astana mektepterinde qoıý kók tústi biryńǵaı kıim úlgisi bekitildi. Degenmen, elordalyq oqýshylar jańa formaǵa burynǵysy eskirgende birtindep kóshe alady.

Birneshe pándi mýzeıde ótkizý sheshildi

BǴM kelesi oqý jylynan bastap geografıa, dúnıetaný, Qazaqstan tarıhy pánderiniń keminde eki saǵatyn mektep syrtynda - mýzeıde, JOO mýzeıleri men ǵylymı ınstıtýttarda oqytýdy josparlap otyr.

Oqýshylardyń úı tapsyrmasy qysqardy

Oqýshylardyń úı tapsyrmasyn qysqartatyn buıryq shyqty. Bilim mınıstrliginiń buıryǵymen bekitilgen nusqaýlyqtar oqýshylardyń úı tapsyrmasyn azaıtýdy kózdeıdi.

Túsiniksiz oqýlyqtar halyqtyń ashýyn keltirdi

BAQ pen áleýmettik jelide mektep oqýlyqtarynyń mazmunyna narazylyq bildirgender kóbeıdi. Ustazdar men ata-analar vıdeoúndeý de jasap jatty. Mundaı oqýlyqtar qatarynda 5 jáne 7-synyptarǵa arnalǵan orys tili kitaptary da bar. Bul oqýlyqtardaǵy Ivan Ýrgant týraly tapsyrma men «I-pyzáva» ertegisi kóptiń ashýyn týǵyzdy.

Bekbolat Tileýhan Erlan Saǵadıevti jekpe-jekke shaqyrdy

Májilis depýtaty Bekbolat Tileýhan oqýlyqtardyń sapasyna syn aıtyp, mınıstrdi baspasóz betinde jekpe-jekke shaqyrdy. Al, Saǵadıev jekpe-jekke shyǵý Úkimettiń jumysy emes ekenin aıtty. Mınıstrdi bıyl qoǵam qaıratkeri Muhtar Taıjan da teledebatqa shaqyrǵan edi.

Muǵalimder úı-úıdi aralamaıtyn boldy

«Endi muǵalimder úı-úıdi aralamaıdy» dedi Erlan Saǵadıev. Osylaısha, mınıstr ustazdardy óziniń qyzmetinen basqa sharýalarǵa mindetteýge tyıym saldy. Mınıstrlik ustaz eńbegin basqa maqsatta paıdalanýǵa tyıym salatyn birqatar buıryq pen qaýly shyǵarýǵa kiristi.

Aǵylshyn tilinde sabaq beretin muǵalimderge ústemaqy tólenetini belgili boldy

2019 jyldan bastap aǵylshyn tilinde sabaq beretin muǵalimderge 25 paıyz ústemaqy tóleý týraly sheshim qabyldandy. Bıyl aǵylshyn tili kýrstaryna 12 myń muǵalim jazylyp, 500 synyp aǵylshynsha oqytyla bastady.

Ustazdar 8 naýryzda gúlsiz qala jazdady

Áleýmettik jelide «mektep qabyrǵasynda ustazdarǵa gúl nemese syılyq berýge tyıym salynady» degen aqparat tarady. Bilim jáne ǵylym mınıstrligi bul málimetti joqqa shyǵardy.

Kásiptik bilim tegin berile bastady

2017 jylǵy qyrkúıekten bastap elimizde Barshaǵa arnalǵan tegin kásiptik-tehnıkalyq bilim berý jobasy engizildi. Osylaısha, joba aıasynda jastar tehnıkalyq, aýyl sharýyshylyq, servıs jáne qyzmet kórsetý mamandyqtary boıynsha kolejderge emtıhansyz, suhbattasý qorytyndylary boıynsha qabyldana bastady.

Ulttyq biryńǵaı testileý formaty jańardy

Osy jyldan bastap túlekter emtıhandy eki ret tapsyratyn boldy. Olar - mektep túlekteriniń qorytyndy attestasıasy men joǵary oqý oryndaryna túsý emtıhandary. Byltyrdan bastap UBT-dan óte almaǵandar emtıhandy qaıta tapsyrý quqyǵyna ıe bolǵan edi.

UBT-dan qulaǵan túlekter tegin oqyp, shákirtaqy alatyn boldy

Ulttyq biryńǵaı testileýden óte almaı qalǵan mektep túlekteri tehnıkalyq-kásiptik bilim berý oryndaryna tegin oqýǵa joldandy. Shákirtaqy da taǵaıyndaldy.

UBT suraqtary qoǵam narazylyǵyn týdyrdy

Test suraqtarynda Ermek Tursynov, Baıan Esentaeva, Nurtas Adambaı, Gennadıı Golovkın sıaqty shoý-bıznes pen sport ókilderiniń júrgeni jurt narazylyǵyna dýshar boldy.

«Altyn belgi» ıegerlerine qatysty shý shyqty

Bıyl UBT-da joǵarǵy bal jınaǵan talapkerler, onyń ishinde «Altyn belgi» ıegerleriniń grantsyz qalýyna baılanysty shý shyqty. Osy joly «Altyn belgilikterge» grantty JOO, ákimdikter men mınıstrlikter bóldi. Al, 2018 jyly «Altyn belgi» alǵandarǵa UBT-da teń bal jınaǵanda ǵana artyqshylyq berilmek.

Latyn qarpin engizý jumysy muǵalimderden bastalatyn boldy

Bilim jáne ǵylym mınıstri latyn qarpin engizý jumysy muǵalimderden bastalatynyn aıtty. «Eń aldymen biz muǵalimderdi daıarlaýymyz kerek. Ustazdar jetkilikti bolǵanda jumysty odan ári jalǵastyramyz» dedi Saǵadıev.

Bilim mınıstri Erlan Saǵadıev «bıyl kúrdeli reformalar bolmaıdy» dese de, bilim salasy birqatar ózgeristi bastan keshirdi. Al, 2018 jyldyń qandaı jańalyq ákeletinin ýaqyt kórseter.

---