InfoHub Logo

Adam kózin kórkem tabıǵaty men ásem ǵımaraty arqyly jaýlaıtyn, adam sanasyn bilimi men biliktiligi arqyly nurlandyratyn qara shyńyraq QazUÝ-dyń ózgelerge uqsamas ózgeshelikterin aıtyp taýysý múmkin emes shyǵar sirá...

Bul bilim men ǵylym ordasy – kirgen boıda janaryńdy alyp taýlarynyń shyńyna súırep, boıyńa bir kúsh berip, kózińdi toıdyrar kórikti tabıǵatymen kez-kelgen jandy ózine qaratady. Ár mezgildiń ýaqytynda kelip turar qustary da, bıik ǵımarattardy aınala ushyp, ózińdi eleń etkizedi!    

Sapyrylysyp, arly-berli júrip jatqan stýdentteriniń arasynan ózge túgil, ózińdi joǵaltýyń áp-sátte! Sebebi, bul bilim ordasynda, bolashaqtyń damýyna óz úlesin qosýǵa asyq bolyp júrgen bilimpaz stýdentter óte kóp. Biraz aınala júrseńiz, shetel azamattaryn da jol boıynan keziktiresiz. Óıtkeni, bul bilim ordasynda kórshi eldermen qatar, shetelden kelgen bilimdi stýdentter qatary da barshylyq. Sonymen qosa, álemniń ozyq elderine baryp, tájirıbe men teorıany qatar damytyp jatqan stýdentterdi de osy oraıda qosa ketken abzal.
 
Jaz mezgilinde, qaq ortasynda turǵan sýburqaǵy sýyn shashyp, jazdyń jadyrańqy ekenin ańǵartyp turady. Jan-jaǵy tolǵan kóz toıdyrar, muryn jarar ásem gúlder men alyp aǵashtar hám jasyl tústi kóz alar shyrshalar. Ǵımarattar ishindegi eń alyby sanalatyn, kún shýaǵyna óziniń alyp kóleńkesin túsirip, kesh batqanda jaryǵyn berip turatyn – rektoratty aıtsańyzshy... Basynan bastap, taý betkeıine qaraǵan jaqqa deıin qorshalǵan, úlkendi-kishili, uzyndy-qysqaly bilim fakúltetteri. Sol fakúltetterge qarama-qarsy turǵan – Ó.A. Joldasbekov atyndaǵy stýdentter saraıy. Syńǵyr daýsy bar ıakı kez-kelgen aspaptyń qulaǵynda oınap, sahnany saıratamyn degen stýdentterge úlken múmkindik jasalynǵan. Árkez ishi – erekshe kóńil-kúı syılaıtyn merekelik konsertter men uly tulǵalarmen, mándi de sándi suhbattar júrgiziletin salıqaly keshterden bosamaıdy.

QazUÝ-dyń eń kórkem ári janaryńdy jaýlar ǵımarattarynyń biri – ál-Farabı kitaphanasy. Esik aldy bilim qýǵan stýdentter men bilimine bilim qosýǵa asyq bolyp júrgen, ustazdardan bosamaıtyn bul kitaphanadan, izdegenińniń bárin taba alasyń. Tipti, ishinde júrek jalǵar jeri de bar. Alyp áınekti terezelerine qarap, bilimińdi tolyqtyryp, oıyńdy qaǵaz betine túsirip, óziń izdegen bilim quraldaryn alyp, beımaral jumys jasaýyńa bolady. Kerek deseńiz, elektrondy kitaptar arqyly da jumysyńyzdy tez aıaqtaýyńyzǵa bolady. Oqımyn degen árbir tulǵaǵa, bul jerden jan-jaqty kómek pen múmkindik jeterlik.

Sál joǵary kóterilseńiz, stýdentterge kómek kórsetetin «Keremet» dep atalatyn ǵımaratqa jetesiz. İshine kirseńiz tátti taǵamnan bastap, stýdentterge kerek zattar satatyn dúkenderdi de, ásem bolam deıtinderge sán salondaryn da, kitap oqyp, janyn jadyratatyn stýdentterge kitap dúkenderin de, tipti em qondyratyn emhanasyn da, kóre alasyz. Al, bul ǵımaratty qorshalaı turǵan, stýdentter úshin jyly oryn men ystyq estelikter qaldyratyn – jataqhana. Jalpy qarap tursańyz, bul oqý ornynda bári zamanaýı, bári qazirgi ýaqytqa saı jasalynǵan. QazUÝ-dyń budanda basqa aýyz toltyra aıtar erekshelikteri jeterlik!

Kezinde de, qazirde de árkimniń qoly jete bermeıtin jáne tańdana da, maqtana da aıtatyn ustazdyq etken Muhtar Áýezov syndy qazaqtyń uly jazýshylary men halyqaralyq sport sheberi Ermahan Ybraıymov syndy ataqty tulǵalardyń aıaq izderi basylyp ótken bul bilim ordasynda, kez-kelgen jannyń bilim nárimen sýsyndaǵysy keletini daýsyz.

QazUÝ – rasymende bilimgerge jańa múmkindikterge jol bastar ǵylym men bilim ordasy! Bul ordadan alǵan árbir bilimde, árbir áserde hám lepte, adam jadynda máńgige erekshe bolyp saqtalary haq! Osyndaı erekshelikterimen, ásem Almatynyń kórkine kórik qosyp turǵan ǵylym men bilim ordasy – ál-Farabı atyndaǵy Qazaq  Ulttyq Ýnıversıtetine sizdi de shaqyramyz! Jaıdarly júzińiz ben shýaqty kózińizben, osy aıtylǵandardy bir tamashalap ótińiz!

Marat Sholpan Ál-Farabı atyndaǵy QazUÝ-dyń, fılologıa jáne álem tilderi fakúltetiniń, qazaq tili men ádebıeti mamandyǵynyń 2-kýrs stýdenti.

Ádebı keńesshi: Ramazanov Talǵat Bekbolatuly.
Ál-Farabı atyndaǵy QazUÝ-dyń oqytýshysy, doktorant.

---