InfoHub Logo

Ápkeli-sińili Ebıgeıl men Brıttanı Hensel — batyldyq pen tabandylyqqa naǵyz úlgi bolatyn jandar. Olar osy álemmen jáne ózara qarym-qatynasty jaqsy saqtaı otyryp, qazir ómirden lázzat alyp, ózderin basqalarmen birdeı sezinedi.

Adamdar AQSH-tyń Mınnesota shtatynan shyqqan alty jasar Ebıgeıl men Brıttanı Henseldi (Abby and Brittany Hensel) alǵash ret Opra Ýınfrıdiń teledýmanynan baıqady.

Sodan keıin olar kógildir ekranǵa qaıta shyǵyp, Joined for Life (2003) derekti fılmi arqyly kórermen kózaıymyna aınalǵanǵa deıin uzaq jol júrip ótti.  

Egizderdiń jaǵdaıy olardyń barlyq dene músheleriniń: júrek, asqazan, ókpe, julyndarynyń jup bolýymen eleń etkizdi.  

Soǵan qaramastan, dárigerler ápkeli-sińili qyzdardy ekige bólse, bireýiniń ómirine qaýip tónetinin aıtty. Olardyń aıtýynsha, otadan keıin ekeýi de aman qalǵan kúnniń ózinde, tirshilik etý qabiletteri tómen ketedi eken.

Sondyqtan Ebıgeıl men Brıttanı birge qaldy. Olar únemi birge júrip-turýdy jáne tutas bir dene sıaqty úılesimdi áreket etýdi úırendi.

Eseıe kele olardyń tamaqtan bastap kıim tańdaýǵa deıingi talǵamdary da ózgere bastady. Mysaly, Brıttanıdiń aıtýynsha onyń ápkesi úıde otyrǵandy unatady, al ózi qydyrǵandy jaqsy kóredi. Ol matematıkany unatsa, Ebbı ónerge jaqyn.

Biraq mundaı talǵam talasy olardyń tolyqqandy ómir súrýge degen maqsattaryna kedergi bolǵan emes. Qyzdar kólik júrgizý kýáligin aldy, Betle Ýnıversıtetin aıaqtady, al qazir bastaýysh mektep oqýshylaryna matematıkadan sabaq beredi. Ázirshe, kelisim boıynsha bir adam retinde.

Qyzdar osylaı ómir súrip jatyr. Ebbı denesiniń oń jaǵyn, al Brıttanı sol jaǵyn baqylap, barlyq qıyndyqty birge jeńip keledi. Egizder úshin jeke ómirleri qozǵalmaıtyn kúrdeli taqyryp bolǵandyqtan, ápkeli-sińili qyzdar qazirgi jaǵdaılaryna shúkirlik etedi.

Ómirge qushtar, ónerli qyzdar óz jumystaryn jaqsy kóredi jáne saıahatqa jıi shyǵady.  

Olar áriptesterimen jaqsy til tabysady jáne balalardyń da kóńilderin tabady. Jáne kún saıyn aınalasyndaǵy adamdardyń osyndaı ereksheligi bar adamdar jaıly túsinikterin ózgertip otyrady. 

---