InfoHub Logo

«Kitaphana - bilim men ǵylymnyń, mádenıettiń ortalyǵy. Kitaptyń ıisi men tynyshtyq jaılaǵan kitaphanalar- kitapsúıer qaýymnyń súıikti mekeni» dep beker aıtylmasa kerek. Bilimge qushtar barsha jannyń osyndaı  rýhanı ortasynyń biri de biregeıi- Almaty qalasyndaǵy Ál-Farabı  atyndaǵy kitaphana. Ál-Farabı atyndaǵy QazUÝ-dyń  oqý jáne ǵylymı úderisterin aqparattyq-kitaphanalyq qyzmetpen qamtamasyz etetin qurylymdyq bólimshesi sanalatyn bul ortalyq-  QR Ulttyq kitaphanasynan keıingi elimizdegi aýqymdy kitaphana. Kitaphananyń ózindik ereksheligi- tórt qabattan turatyn ǵımaratyndaǵy ár qabattyń «Ál-Farabı», «Uly dala», «Alash», «Máńgilik el» atty arnaıy ataýlary bar.

Birinshi qabatynda Ál-Farabı ortalyǵy men murajaıy, ekinshisinde oqý zaly , úshinshisinde  elektrondy zal, al tórtinshi qabatynda zamanaýı úlgidegi  4 konferensıa zaldary ornalasqan.  Budan  bólek, magıstranttar zaly, gazet pen jýrnaldyń 250  ataýyn  tabýǵa bolatyn merzimdi basylymdar zaly, sondaı-aq,  XVI-XIX ǵasyrlyq sırek kitaptar men qoljazbalar saqtalǵan qundy basylymdar zaly bar.
Al 2017 jyly ashylǵan Tuńǵysh Prezıdent zaly Qazaqstannyń táýelsiz memlekettiliginiń qalyptasý jáne nyǵaıý tarıhy boıynsha aqparat aýqymyn jasaý, únemi tolyqtyrý jáne saqtaý mindetterin atqaratyn mádenı-aǵartýshylyq ortalyq bolyp sanalady. Bul zaldyń ashylý qarsańynda kitaphana qyzmetkeri Aqmaral Amangeldiqyzy arnaıy Aqordaǵa baryp, Elbasynyń kitaptaryn, sonymen qatar, ózge de qundy muralaryn alyp kelgen. Álem elderiniń kitap buryshynda  Japonıa, Qytaı, Aýǵanstan jáne t.b. elderdiń ádebı muralary saqtalǵan. Sonymen qatar, bul jerden Amerıkadan shyqqan eń alǵashqy gazettiń kóshirmesin de taba alamyz.
Búginde kitaphanadaǵy  kitap qory 2 mln-nan  asady. «Bolashaqqa baǵdar:rýhanı jańǵyrý» baǵdarlamasynyń aıasynda qolǵa alynǵan «Jańa gýmanıtarlyq bilim. Qazaq tilindegi 100 jańa oqýlyq» jobasynyń júzege asýyna, ıaǵnı,  kitaptardyń aýdarylyp, jaryqqa shyǵýyna  kitaphana úlken  úlesin qosyp otyr. Taǵy bir  artyqshylyǵy -  munda elimizde tek eki jerde ǵana kezdesetin skanerlik qyzmettiń ozyq úlgisi- « Kirtas kabis 3» jańa tehnıkasynyń bolýy.  Bar-joǵy 1 saǵat ishinde 3000 bettik kitapty elektrondy nusqaǵa kóshiretin bul qurylǵy oqyrmandarǵa kitapty onlaın túrde oqýǵa múmkindik beredi.  

Ál-Farabı atyndaǵy kitaphana oqý ordasynyń aqparattyq, bilim berý jáne mádenı ortalyǵy retinde qyzmet kórsetip, kópshilik qaýymdy asa baı kitap qorymen jáne elektrondy resýrstarmen qamtamasyz etip keledi.

---