InfoHub Logo

Kóp ýaqyttan beri áýeli kúnbatys Eýropanyń, sońǵy ýakyttarda kúlli jer-dúnıeniń proletarıaty, jumysker-jalshylary qaýly jasap, 1-Mamyrdy merekemen ótkizip keledi.

Kópten beri jer-dúnıeniń jumysker-jalshylary jaýlasyp, arbasyp kele jatqan baılardyń jumystaryn qoıyp, óz aldynda top jasap, bastaryn qosyp óz kúshterin synaıtyn kún — 1-Mamyr kúni.

Jer-dúnıedegi ár halyqtyń, ár memlekettiń proletarıaty (jumysker-jalshylar) orys, nemis, fransýz, arab, qytaı bir-birimen yntymaqtarynyń, tilekteriniń bir ekendikterin bildirip, shyn kóńilden týysqandyq júreginen bir-birine jer-kókti jańǵyrtyp, kúńirentip, urandap sálem jiberetin kún — 1-Mamyr.

Jer-dúnıeniń baılary toptanǵan, urandasqan jumysker, jarlylardan qaýiptenip, qorqyp qaltyraıtyn kún — 1-Mamyr.

Kúlli jer-dúnıeniń baılary, pańdary kóp keshikpeı táj taqyttarynan, baılyqtarynan, úkimetterinen aırylýlaryn sezetin kún — 1-Mamyr.

Rossıanyń jumysker jarlylary baılaryn, myrzalaryn, jandaraldaryn jeńip, úkimetti óz qoldaryna alyp, ámirlerin júrgizip, kúlli jer-dúnıeniń jumysker jalshylaryna kósem bolǵanyna 4-shi jyl boldy. Rossıa proletarıatynyń jumysker-jalshylarynyń isin kórip, dúnıeni jańǵyrtyp otyrǵan urandaryn estip, jer júziniń proletarıaty tolqyp qozǵalýda, baılary, patshalary qorqyp, saqtanyp, qaltyraýda, kemege mingenderdiń jany bir degendeı, orys, qazaq, nemis, fransýz, aǵylshyn, qytaı, japon jumysker-jalshylarynyń, jarlylarynyń tilekteri, jandary bir; ám jer-dúnıeniń býrjýa, baılarynyń, patshalarynyń tilekteri, jandary bir.

Búgin 1-Mamyrdy — jer-dúnıeniń jumysker jalshylarynyń zor meıramyn — biz, qazaqtyń jumysker eńbekshilderi de qushaqtarymyzdy jaıyp qarsy alyp, zor shattyqpen meıramdaımyz.

Búgin biz de kúlli jer-dúnıeniń proletarıatynyń jańǵyrtyp salǵan urandaryna daýystarymyzdy qosyp, jer júziniń jumysker-jalshylaryna, jarlylaryna shyn kóńilden, týysqandyq júzinen zor shattyqpen sálemderimizdi jiberemiz! Sálem, baýyrlar! Sálem!

Búgin 1-Mamyr zor meıram kúni, jumysker-jalshylardyń, kóp jyl qorlyq kórgen jarly sorlylardyń azattyq, bostandyq úshin qurban bolǵan baýyrlarǵa týysqandyq, joldastyq ekenimizdi qol qýsyryp, taǵzym qylyp jiberemiz! Sálem!

Esten ketpes joldastar, sálem, baýyrlar!

Jasasyn, jer-dúnıeniń jumysker, jalshy-jarlylarynyń birlik-yntymaǵy!

Jasasyn, jer-dúnıeniń jumysker, jalshy-jarlylarynyń azattyq, bostandyq úkimeti!

Jasasyn 1-Mamyr meıramy!

1921 jyl

---