InfoHub Logo

Bilemin, adam ómiri saǵynyshtan turady. Dinar úıdiń ret sanyna qarady. Jolaıyryqtan ádemi “Lamborghini” avtomobıli ótip barady. Muńdy saǵynysh — ǵumyrdyń aınymas serigi. Áýeli, kóńildi saǵynysh bıleıdi, sosyn, ańsap-zaryǵýdyń azapty kúıin, mehnatyn, beınetin keshesiń, keıin, úkilegen úmit, sáýleli oıdan kúder úzgen toryǵýdyń aqyry sherli qamyryqqa ulasady.

Álde qumartqan sezim únemi eske salyp otyra ma eken. Beınesi kómeski tartyp, jadyna uıalaǵan aıaýly júzi umytylyp bara jatady da, qapylysta bulyńǵyr sulbasy aıqyndalyp kóz aldyna kele qalady. Umyta almaı-aq qoıdym, dedi ol, uzaq qapa sozylmaly dertke aınaldy, júrekten súıip unatýdyń sońy, shynymen, ýaıym-qaıǵy, muń-zarǵa aparyp soqty.

Shamsi-Hamar Shevchenko jaqtan kórindi. Dańǵyldy quldaı, jaılap basqan ol “Bıskvıt” jazǵy alańyńa qaraı bettegen aq quba arýǵa qarsy júrdi, kóshedegi alasapyran tolqyndy jaıaý keshti. Ary-beri tolqyǵan nópir seńdeı soǵylysty, joldyń shetine iligip, tarydaı shashyldy, san tarapqa neken-saıaq bet túzep, býlvarlarǵa, dańǵyldarǵa quıylyp, aǵylyp ketip jatyr. Qapadar jurt kókireginde baıansyz murat, ekiudaı sát, jasyryn tilek, alaıda, bireýdiń úkilegen úmiti, beıtanys armany basqaǵa qyzyqty bola bermese kerek. Dinar ańsarynyń ózine qaraı kele jatqanyn túsindi. Jaqyndaǵan saıyn kóńildegi mahabbaty túrlenip sala berdi. Áýeli jazǵyturym ıis ańqydy, tóńirekti jasyl reń basty, sosyn dúnıe shymqaı qyzyl túske boıaldy, endigi kezek álem sarǵaıyp ketti, Shamsi-Hamar taqaǵanda, saǵynyshy qara jamyldy.

— Armysyz, Dinar, — dedi ol.

— Qaıyrly kún, jan qalqa Shámshiqamar — dep júzinen ópti Dinar.

— Ózgeripsiń, daýysyn da ózgerip ketipti, — dedi Shamsi-Hamar.

— Saǵynyshtan daýys ózgeredi eken.

— Ne isteıin, jylap jibereıin be, aıypqa buıyrmashy.

— Uzaq kúttim seni.

— Ystanbulda qatty jalǵyzsyradym.

— İzdediń be?

— Iá, qatty kórgim keldi, biraq qaıda ekenińdi bilmedim. Ásirese, keı ýaq, eńseli aq úıdiń daǵaradaı keń, jatyn bólmesinde, tún ortasynda, tátti uıqymnan kenet shoshynǵandaı, oıanyp ketkenimde, ózegimdi qyp-qyzyl shoq qaryǵandaı bolýshy edi, ornymnan súlesoq kóterilip, tósektiń shetine otyryp alyp, shamnyń túbinde eki qolymmen betimdi basqan kúıi, aǵyl-tegil jylaıtynmyn, nege meni súıgenimnen aıyrdyń dep, syrtqa shyǵyp, qara túnek aspanǵa tesilip uzaq qaraıtyn edim.

— Kúnim, meniń qalaı qamyqqanymdy bilseń ǵoı.

— Qaıran, Dinar.

— Tań atqansha Almaty bar-kafelerin kezip júretinmin, birinen shyǵa salyp, ekinshisine bas suǵatynmyn, biraq, sol kezde sen úshinshi restoranda bılep júrgendeı kórinetinsiń.

— Múmkin, tórtinshi, álde besinshisinen tabylatyn ba edim.

— Iá, altynshysyna da bardym, bir kúni seniń Almatyda joq ekenińdi túısindim, sosyn, páterimnen attap basyp shyqpaı qoıdym, esikti ishten bekitip alyp, kúni-túni sharap ishetin boldym.

— Sen jalǵyzdyq taqsyretin tartyp júrgende, Ystambuldyń bir túkpirinde seni oılap eńiregennen etegim jasqa tolyp otyratyn.

— Bizdi kim aıyrdy? — dep surady Dinar.

— Bilmeımin, — dedi Shamsi-Hamar.

Ekeýi tastan órilgen alańqaıdy júrip ótip, “Bıskvıt” kafesine keldi. Jazǵy ústelder esik aldynda qatar-qatar tizilip tur, ár tustan qadaý-qadaý kelýshiler kórinedi, jópeldemede Dinardy bir muń bıledi.

— Úmitimizdi aıtaıyq, — dedi Dinar.

— Sosyn, shýaqty kúnderimizdi eske alamyz.

— Iá.

— Estelik saǵynyshty oıatady, biraq, saǵynyshtan qamyryq týady, — dedi Shamsi-Hamar, — eshteńe aıtpaıyq.

Olar eń shetki dastarqanǵa baryp otyrdy.

— “Kofemanıa”, — dedi ol.

— Úmit bıskvıti, — dep kúldi Shamsi-Hamar, — sosyn, estelik bıskvıti, saǵynysh bıskvıti, muń bıskvıti.

— Kóktem kitaby —“Kofemanıa”,

— “Fransýzskıı poselýı”— Jaz kitaby.

— “Imperıa frýktov” — Kúz kitaby.

— “Tıramıssý” — Qys kitaby.

— Ia, navernoe, ýtopaıa na dno vashıh ogromnyh glaz, býdý chývstvovat sebá schastlıvym...

Estelik bıskvıti “Kofemanıa” túsindeı úmitti, sáýir saǵynyshyn

oıatady, saǵynyshty qarasha kúsheıtedi, jazdyń asy — jasynda qapysyz tanyǵan “Fransýzskmı poselýı” bıskvıti, “Imperıa frýktov” — jemis-jıdektiń bereke aıy, molshylyq aptalary, yrys maýsymy, biraq, jeltoqsanda “Tıramıssýdy” ańsap, qaıǵy oılap, muńǵa batamyz, betine usaqtap týrap shabdaly, júzim, almurt salǵan, dámi kórkinen asqan, til úıirgen bıskvıt ataýly baý-baqshadan aldymyzǵa syrǵyp jańa túskendeı, jan-jaǵyna jupar shashady.

Bilemin, adam ómiri saǵynyshtan turady. Muńdy saǵynysh — ǵumyrdyń aınymas serigi. Qapyda súıgen jardan jazataıym kóz jazyp qalǵan jolaýshy, ádette, jer moıny qashyq, jyldarǵa sozylǵan uzaq sapardan eline qaıtqanda, eńseli úıdiń bosaǵasynda, tórinde jaıǵasqan, tolǵan kisini kórgende, taý etegin jaılaǵan jabaıy jemis aǵashtaryndaı, ústinen alma ıisi ańqyp, kireberiste ańyryp, seziminen adasyp turady.

Almaty, 2007 — 2017 jyldar

---