InfoHub Logo

Balalardyń jazda kóńildi dem alýy úshin, olardyń kelesi oqý jylyna tyń, jańa kúshpen kelip kirisýine úlken jaǵdaı jasalyp, balalar úshin aýasy keń, orman-toǵaılary jaqsy jerlerden kórkem lagerler ashyldy. Mektep balalary sol lagerlerde dem alady.

Balalar! Árıne, bul senderge istelip otyrǵan úlken qamqorlyq, úlken jaǵdaı. Sondyqtan sizder mádenıetti dem alýǵa tyrysyńyzdar!

Demalysty kúni-túni uıyqtaý, bolmasa kúni-túni oınaý dep túsinbeý kerek... retimen oınap, retimen uıyqtaý kerek. Sonymen katar árbir qyzyqty, kerekti nárselermen de shuǵyldanǵan jón.

Árıne, sender oıyndy óte jaqsy kóresińder. Árkim, de sizderdiń jastaryńyzda, sizderdeı ýaqyttarynda oınaýdy óte jaqsy kóredi. Biraq oıynda da, iste de ýaqytty durys paıdalaný kerek. Al neler aqyl ıeleri: kósemderdiń, aqyn-jazýshylardyń, profesor, akademıkterdiń, ataqty ushqyshtardyń ómirin, balalyq shaǵyn alsańyzdar óte qyzyq. Olar bala shaǵynan bir nárseni bilýge, úırenýge áýes bolǵan, olar ádebı kitaptardy qyzyǵa oqıtyn bolǵan.

Mysaly, gýmanıs jazýshy Maksım Gorkıı bala shaǵynda kitapty sondaı súıgen, ol kitap talǵamaı qolyna túskeniniń bárin oqıtyn bolǵan. Ol jastaıynan kitapty eń jaqyn dos, en jaqyn joldas etti.

Minekı, osyndaı uly adamdardyń balalyq shaǵynda istegen isterin ónege etip ózderińiz solarsha tárbıelenýge umtylǵandaryńyz durys. Ádebıet kitabyn úzbeı kep oqyǵandaryńyz jón.

Sizder qys boıy oqydyńyzdar, mektepterińizde ádebıet úıirmeleri boldy. Sizder onda uıymdasyp jumys istedińizder.

Endi jaz lagerlerde de sizder ádebıet úıirmesin uıymdastyryńyzdar. Lagerdegi ádebıet úıirmesi óte qolaıly, óte kóńildi bolady. Óıtkeni sizder ádebıet kitaptaryn oqısyzdar. Ózderińiz óleń, áńgime jazasyzdar. Solardy ný ormandardaǵy, aıaqqa jibekshe oralyp jatqan kókoraı shalǵyn ústinde otyryp talqylasańyzdar, qandaı tamasha!

Lagerde ylǵı mektep oqýshylary biryńǵaı bolyńyzdar. Sizder úıirmeni mekteptegideı lagerde de uıymdastyrýlaryńyzǵa bolady. Úıirme jumysyn kórkem jazǵa, demalysqa arnańyzdar. Jasyl ormannyń syrt kórinisin, onyń hosh ıisin, ondaǵy saıraıtyn ánshi qustardy sýretteńizder. Mine, jaz lagerde osylardy kózben kórip, erkin otyryp, biraz jasaısyzdar. Jáne oǵan tolyq múmkinshilik bar.

Sondyqtan lagerde ádebıet úıirmesin uıymdastyryp oqyǵan kitaptaryńyzdy talqylańyzdar. Jazǵan óleń, áńgimelerińizdi úıirmede tekserip, jaqsylaryn redaksıaǵa jiberip turyńyzdar.

Demalys ýaqytynda, lagerde bolsyn, basqa jerde bolsyn ádebıetpen shuǵyldaný meılinshe qajet, qyzyq kitaptardy oqý úlken paıdaly nárse.

Ádebıet kitabyn oqyǵannan sharshap dem ala almaı qalam dep túsinbeý kerek. Ádebıet kitaptaryn tesele oqý kerek, súıip oqý kerek. Ózderińizge kerekti kitaptardy tańdap ala bilý kerek.

Sizder oqyǵan kitaptaryńyzdyń ishinde unatqan geroılardyń obrazdaryn jazdygúni lagerde, mektepte uıymdasqan úıirmelerińizdiń jumystaryn jáne sol úıirmede talqylanǵan, ózderińiz unatqan jaqsy óleń, áńgimelerińizdi redaksıaǵa jiberip otyrýlaryńyzǵa bolady.

---