InfoHub Logo

(Qazaq jáne uıǵyr qyzdary Berikbala, Hasıet jáne Abıdanyń joldaǵan hatynan úzindi)

Jas jaýynger Baýbekke!

Sizdiń «Meniń ómir súrgim keledi» atty maqalańyzdy bas qosyp shyn yntamyzben oqydyq. Sodan keıin dostarym Hasıet pen Abıdanyń usynysymen osy hatty jazyp otyrmyn. Bizder Almaty oblysynyń Eńbekshiqazaq aýdanyndaǵy aýyspaly Qyzyl tý alǵan «Oktábr» kolhozy janyndaǵy jańasha orta mektebinde oqytýshy bolyp isteımiz.

Sizdiń «Meniń ómir súrgim keledi» degen tilegińizge dúnıe júzindegi progresshil - adam balasynyń bári ortaq. Onyń ishinde Oktábr revolúsıasynan keıin týǵan, jańa

dúnıe quryp, baqytty turmysqa aıaq basqan Sovet eliniń mıllıondaǵan jas urpaqtary ortaq. Biz de sol jastarmyz, biz baqyttymyz. Sizdiń Jannańyz sıaqty biz de qazaq halqynyń jas jaýyngerleriniń súıgen jarymyz.

Ózińdeı jas dostarymyz maıdanda, biraq dál qazir olardan esh habar joq. Biz olardy saǵynamyz, kútip te otyrmyz, aman-esen kaıtyp oralady degen úlken úmitimiz de bar.

Keı ýaqytta tereń oıǵa batyp ketemiz. «Sýyq habar» kelip qala ma dep te eriksiz oıǵa túsemiz. Oıdy aqylǵa jeńgizetin bolsaq, olardyń dúnıe júzindegi adam balasynyń qas dushpany — jyrtqysh fashıserdi jeńip kelýlerin, jeńbeı qaıtpaýlaryn tileımiz. Biz de siz sıaqty jaspyz. Biz de ómir úlesin tolyq alǵanymyz joq. Ómir úlesimizdiń biri — súıgenimiz bolsa, bular siz sıaqty qan maıdanda ózderinin, týǵan elin jaýdan qorǵaýda. Ómir úlesiniń eń úlken týǵan eline — qoǵamǵa eńbek sińirý bolsa, biz áli aıtarlyqtaı eńbek sińirgen joqpyz. Sebebi biz jańa ǵana Sovet mektebin bitirip, ómirge jańa aıaq basqan, bolashaqta uly baqytty kezdegen jastarmyz.

Dosymyz, qurdasymyz, Baýbek!

Osy hatty jazyp otyrǵanda kolhozshylardyń jalpy jınalysy bolyp, onda predsedatelimiz bylaı dedi:

«Bizdiń kolhoz úkimetke astyq quıý josparyn tolyq oryndap shyqty. Tapsyrmadan tys 900 sentner dán berdik, kerek bolsa maıdan úshin, ózimizdiń baqytymyz úshin taǵy da beremiz!»

Búl sóz bizdi sheksiz úmitke bóledi. Sebebi: keń baıtaq Sovet elinde mıllıondaǵan tonna astyq shyǵady, jer qaıysqan mal ósýde, jer-anamyzdan jumysshylardyń qurysh bolat qaılalary temir, kómir, altyn, mys, qorǵasyndy myń batpandap shyǵaryp, munaıdy darıadaı aǵytýda. Mine, munyń bári maıdan úshin, bári bolashaq, baqytymyz úshin jasalyp jatqany anyq.

Biz, oqytýshylar, jas jetkinshekterdi jaýdan qaıtpaıtyn qaharman etip tárbıeleýge týǵan el aldynda ant etemiz.

«Bári jaýdy jeńýge, bári maıdan úshin» degen uran jalpy elimizdiń urany. Búl uran maıdandaǵy jaýyngerlerimizdi jeńiske, fashıserdi qurtýǵa bastaıdy. Sizdiń jaýdy jeńip, Komýnıstik partıadan alǵys alyp, ómir súre berýińizge tilektespiz. Janna dosyńyzdy taýyp baqytty turmysqa jetýińizge tilektestik bildirin, osy hatty joldaýshy Berikbala Musaeva.

---