InfoHub Logo

Qatar ósip turǵan eki Bıdaıdyń biriniń basy kún ótken saıyn aýyrlap ábden ıilip ketti. Al qasyndaǵysy basyn kóterip tip-tik tur. Ony Shyrmaýyq orap alǵan. Bir kúni tik turǵan Bıdaı Shyrmaýyqqa:

— Kún ótken saıyn ókpemdi qysyp, órmelep qaıda barasyń? — dep surady.

— Seni basyp ótip anaý Kúnbaǵysqa jetsem deımin, — dedi Shyrmaýyq.

Sonda basy ıilip ketken Bıdaı sózge aralasty.

— Jyl saıyn boıy boıshańǵa jetem dep tyrashtanasyń, biraq kúz túsip ketip jylda-jylda armanyńa jete almaı qýrap qalasyń. Kesiriń kópke tıip jatyr. Sen ókpesin qysyp, Bıdaıdy ósirmeı tastadyń. Al ol ósip, órkendep, urpaǵyn kóbeıte almaı tur. Maqsatyńa jetý úshin joldaǵynyń bárin taptap, janshyp ketýińdi qashan qoıasyń? – dep renjidi.

— Qap, bálem, kelesi kóktemde me, seni orap ábden qyspasam ba, al óziń ne bitirip tursyń? — dedi kijinip Shyrmaýyq.

— Men ókinbeımin, kelesi kóktemde men bir jerde emes, myń jerde ósem. Urpaǵym kóp. Sonyń bárin oraýǵa seniń jibiń jete me, eń birinshi sony oılasaıshy, — dedi.

— Jetedi! Bıdaıdy tuqymymen qurtam! — dep aıqaılady Shyrmaýyq.

Shyrmaýyqtyń daýsyn estip qalǵan Adam bulardyń qasyna keldi. Ol Shyrmaýyqty kórip:

— Qap, Bıdaıdy ósirmeı tastapty-aý, — dep Shyrmaýyqty túbimen julyp alyp tastady.

Tik ósken Bıdaı:

— Óziń úshin ózgege jamandyq oılaımyn dep jarty jolda qalaı mert bolǵanyńdy bilmeı qaldyń-aý, beıshara, — dedi.

Ólermen kúıde jatqan Shyrmaýyq:

— Sen pisip, urpaq taratyp úlgermeısiń, kúz túsip ketedi, — dep tistendi.

Arada biraz ýaqyt ótkende tik ósken Bıdaıdyń da basy ıilip ketti. Endi onyń qýanyshynda shek joq. Áp-ádemi bop jasaryp ketken. Al anadaı jerde qap-qara bop qýrap Shyrmaýyq jatty.

---