InfoHub Logo

Balasyn jem izdeýge baýlyp júrgen Qumyrsqa pisip turǵan bıdaıdyń basyn ıip alyp jep turǵan shegirtkege kez boldy. Onymen:

— Assalaýmaǵaleıkým, Shegirtke, — dep amandasty da: — Oý, Adamnyń mańdaı terimen eńbek etip pisirgen bıdaıyn sen qalaı rahattanyp jep tursyń? — dep surady.

— Osynshama jerdi alyp jatqan bıdaıdyń bir túıirin jesem, Adamnyń nesibesi kemı qoımas. Jyldaǵy ádetim osy, jahandy jalpaǵymnan basyp kelem de, bıdaıdy jeı berem. Budan kedeı bolyp qalǵan Adamdy kórgen emespin, onyń kóılegi de kóp, kóńili de toq, — dep jaýap berdi Shegirtke.

Bastary julym-julym bop qalǵan bıdaılarǵa qarap turǵan Qumyrsqanyń kózine, anadaıda bıdaılardyń parsha-parshasyn shyǵaryp shashyp oınap kele jatqan Shegirtkeniń balalary tústi.

— Kórdiń be, balalaryń da sen sekildi ózgeniń nársesin urlaýǵa daǵdylanyp alypty. Erteń olar da balalaryn urlyqqa úıretetin bolady. Al, biraq urlyqtyń jaqsylyq ákeletini shamaly, – dep kúrsindi.

Qumyrsqanyń sózine ashýy kelgen Shegirtke:

— Daıyn astan attap ótip qaıda baryp jem izdeımin?! — dep aıqaılady da shyrt etip ushyp ketti.

Qumyrsqa odan ári júre berdi.

Sonda Qumyrsqanyń balasy:

— Apa, biz alys-alys jerlerge sharshap baryp ákeletinimiz bireýden qalǵan qaldyq. Nege sonshama janymyzdy qınap beınettenemiz. Al Shegirtke bolsa taza, jańa pisken dámdi bıdaıdy tańdap jep júr. Ol durys isteıdi. Toıyp alady da, qydyryp júre beredi. Al ekeýmiz tańnyń atysynan kúnniń batysyna deıin azyq izdeýmen bolamyz. Sondaǵy tabatynymyz mardymsyz birdeńe. Biz de bıdaıdyń birnesheýin alyp alaıyq, — dedi.

— Balam, áli-aq Shegirtke isiniń durys emestigine kóziń jetetin bolady, — dedi Qumyrsqa.

Júre-júre júgeri alqabynyń shetine shyqqan olar shashylyp qalǵan nannyń qıqymyn kórdi. Shamasy osy jerde otyryp bireý nan men sýsyn ishken sekildi.

— Balam, minekeı, mynaý nan. As patshasy, — dedi Qumyrsqa qıqymdardyń ishinen eń irisin tańdap alyp jatyp, — bul álgi Shegirtke jep turǵan bıdaıdan jasalady. Adamdar óte eńbekshil halyq. Olar bıdaıdy sol kúıinde jemeı, ony óńdep osyndaı tátti taǵam jasaıdy.

Ań-tań qalǵan balasy qıqymnyń bir túıirin aýzyna salyp kórip:

— Iá, shynymen de bal tatıdy, — dep tamsandy.

— Áliń jetkenshe arqalap al. Endi bul qıqymdardy bizden basqa eshkim kerek etpeıdi, sondyqtan esh qysylmaı ala berýge bolady, — degen anasy aldyǵa túsip júrip ketti.

Bular bıdaıdyń ortasymen júrip otyryp baǵanaǵy Shegirtkemen kezdesken jerge de jetti. Bir kezde Qumyrsqanyń qulaǵy yńyrsyǵan álsiz daýysty shalyp qaldy. Jalma-jan arqasyndaǵy azyǵyn tastaı salyp, daýys shyqqan jaqqa qaraı júgire jóneldi. Balasy da ilese berdi. Qarasa Shegirtke aıaqtary álsiz qımyldap, ólgeli jatyr eken. Qumyrsqanyń ter basyp ketken bet aýzyn kórgen ol:

— Dosym, sen durys aıtasyń. Adamdar bıdaılarǵa ý seýip tastapty. Qınalmaımyn, ońaı olja tabamyn dep júrip mine ajalymnan buryn óleıin dep jatyrmyn. Eger sen sekildi eńbektengenimde bulaı erte ólmes pe edim kim bilgen, — dep kózine jas aldy. — Eńbekteneıin desem osy eńbektiń jemisin kóretinime senbedim ǵoı. Aýyr jumystan qashyp osy kezge deıin ómir súrdim. Endi anaý balalaryma ósıetimdi aıta almaı bara jatyrmyn. Olar da men sekildi ómirlerin qur bosqa ótkizetin boldy, — dep ókingen Shegirtke kóz jumdy.

— Kórdiń be, balam, álginde sen de osy bıdaıdan urlap almaqshy bolyp ediń. Urlyq túbi qorlyq ekenine endi kóziń jetken bolar, — dedi anasy balasynyń júzine qarap, — «Eger boıyńda senim bolsa aýyr beınettiń ózi baqyt bolyp kórinedi», — dedi.

— Túsindim, túsindim, — degen bala anasynyń aldyna túsip, ıyǵyndaǵy aýyr júgin maqtanyshpen kóterip tompańdap ketip bara jatty.

---