InfoHub Logo

Bıyl pılottyq negizde Ulttyq biryńǵaı testileý aýdıtorıalarynan onlaın-translásıa júrgiziletin bolady. Bul týraly «ANTIKOR» ortalyǵy alańynda ótken onlaın-dıalog barysynda QR Bilim jáne ǵylym mınıstrligi Ulttyq testileý ortalyǵynyń dırektory Dıdar Smaǵulov aıtty.

Naqtyraq aıtqanda, «Adal Kómek» jobasy aıasynda QR Bilim jáne ǵylym mınıstrligi Ulttyq testileý ortalyǵynyń dırektory Dıdar Smaǵulov akademıalyq ádildikti nyǵaıtý jáne UBT kezinde qoǵamdyq baqylaýdy kúsheıtý maqsatynda onlaın-dıalogqa qatysty. Málim etilgendeı, bıyl UBT maýsym aıynyń sońy men 5 shilde aralyǵynda ótedi. Bıyl shamamen 120 myń túlek jáne orta arnaýly bilimi bar 15–20 myń azamat UBT tapsyrady.

Qazirgi Ulttyq testileý ortalyǵy qujattardy qabyldaý jumystaryn atqarýda. Bıyl alǵash ret UBT-ǵa qatysýǵa ótinishter Ent2020.testcenter.kz saıtynda (10 mamyrǵa deıin) onlaın rejımde qabyldanady. Bilim jáne ǵylym mınıstrligi UBT-ny dástúrli formatta qaǵaz túrinde ótkizýdi josparlap otyr.

Dıdar Smaǵulovtyń aıtýynsha, koronovırýstyń taralýyna baılanysty qosymsha sanıtarlyq shekteý sharalary qabyldanady. Mysaly, eger buryn aýdıtorıalarda 150-ge jýyq adam bolsa, qazir olar áldeqaıda az bolmaq. Olardyń arasyndaǵy qashyqtyq uzartylyp, jeke qorǵanys quraldaryn (maskalar, qolǵaptar, antıseptıkter) paıdalaný mindetteledi. Bul sharalar bilim alýshylardyń qaýipsizdigi úshin QR Densaýlyq saqtaý mınıstrligimen birlesip qabyldanǵan.

«UBT-ǵa daıyndaý úshin Ent2020.testcenter.kz saıty ár pán boıynsha tegin testileýdiń 70 nusqasyn ornalastyrdy. Ortalyqtyń bastamasymen Sybaılas jemqorlyqqa qarsy is-qımyl agenttigi Arnaıy monıtorıń tobynyń múshelerimen birlese otyryp, bilim berý uıymdarynyń testileýge daıyndyǵy men ony ótkizýdegi qyzmetin baqylaý, sondaı-aq uıaly telefondarmen kirýdi boldyrmaý maqsatynda ótken jyldan bastap baqylaý júrgizedi», — delingen Sybaılas jemqorlyqqa qarsy is-qımyl agenttigi Nur-Sultan qalasy boıynsha departamenti parasattylyq basqarmasy taratqan baspasóz baıanynda.

Sonymen qatar spıker testileý ótetin barlyq aýdıtorıadan onlaın translásıa júrgizý pılottyq jobasy týraly aıtty. Osylaısha, kez kelgen adam prosesti baqylap, testileý kezinde ereje buzý faktilerin baqylaı alady. Al anyqtalǵan jaǵdaıda ortalyqqa habarlaýǵa bolady. Bul júıe avtomatty rejımde smartfondardy paıdalaný faktilerin anyqtaıdy.

---