InfoHub Logo

Aldaǵy oqý jylynan bastap 3, 6 jáne 8-inshi synyp oqýshylary oqýlyqtardy planshetke júktep oqı alady. Bul týraly búgin Ortalyq komýnıkasıalar qyzmetindegi baspasóz máslıhatynda QR BǴM Mektepke deıingi jáne orta bilim departamentiniń dırektory Sholpan Karınova aıtty.

«QR Bilim jáne ǵylym mınıstrligi jańartylǵan bilim mazmunyn engizý jáne oqýlyqtardyń sapasyn arttyrý boıynsha júıeli túrde jumys  júrgizýde.  Aldymyzdaǵy oqý jylynda 3, 6 jáne 8-synyptar jańartylǵan bilimge kóshedi. Boljam boıynsha 800 myńnan  astam oqýshy osy synyptarǵa keledi  dep kútilýde. Bizdiń maqsatymyz atalǵan oqýshylardy sapaly oqýlyqtarmen qamtamasyz etý», - dedi ol.

Onyń aıtýynsha, mınıstrlik tarabynan oqýlyqtardy ázirleý, aprobasıadan  ótkizý jáne bilim mekemelerin oqýlyqtarmen qamtamasyz etý boıynsha normatıvtik-quqyqtyq negizdemege ózgerister  engizgen. Jańa qaǵıdaǵa sáıkes barlyq mektepterdegi bilim deńgeıi boıynsha oqýlyqtar synaqtan ótkiziledi. Sonymen qatar mektepterge arnalǵan oqýlyqtar men oqý ádistemelik keshenderdi jazatyn avtorlyq quramda mindetti túrde ǵalym, ádisker, mektep muǵaliminiń bolýy bekitildi.

«Sonymen qatar baspalarǵa oqýlyqtardyń elektrondy nusqasyn qosa  berý mindetteldi. Bul oqýshylardyń olardy planshetterge nemese telefonǵa júktep paıdalanýyna múmkindik beredi. Oqýlyqtardyń kólemi men formatyna baılanysty ata-analar tarapynan syn boldy. Osyny eskerip, muǵalimdermen jáne ata-analarmen kelisip, mınıstrlik oqýlyqtardy ázirleýshi baspaǵa usynymdar jasady. Kelesi oqý jylynan bastap ár mektep oqýshylardyń sanyna, naqty qajettilikke baılanysty oqýlyqtar alady», - dedi Sholpan Karınova.

QazAqparat

---