InfoHub Logo

Kóregen bolý

Bıll Geıts jastaıynan kompúterdiń mańyzdylyǵyn jáne adamdardyń ómirinde oıyp oryn alatyndyǵyn jaqsy uǵyna bilgen adam. Jaqyn dosy Maıkrosofttyń qurýshy ortaǵy Paýl Allenmen jıi pikir almasyp, osynyń saldarynda keleshekte árbir adamnyń úıinde jáne jumys ornynda ózine tán kompúteri bolatyndyǵyn boljaı alǵan. Qurǵan fırmalarynda osy negizge sáıkes adamdardyń jumys isteýine, ózderin jetildirýine kómekshi bolatyndaı ónim shyǵarýdy maqsat etken.

Eńbekqorlyq

Bıll Geıts aqyldylyǵymen qatar óte eńbekqor adam. Aqyldy, zerek bolý jetkiliksiz, oǵan qosa eńbekqor bolý kerektigin alǵa tartady jáne jumyskerlerden de osy qasıetti talap etedi.

Aqyldy qyzmetkerlermen jumys isteý

Baǵdarlama jazý eń joǵarǵy sektorlardyń biri bolǵandyqtan bul salada kezdeısoq adamdarmen jumys isteı almaıtyndyǵyn, aqyldy, zerek adamdarmen jumys isteýi kerektigin oılap, jumysqa aqyldy adamdardy alýǵa tyrysady. Aqyldy adam kim degen suraqqa ózi qysqasha bylaı jaýap beredi: «Aqyldy adam árnárseniń jeke-jeke aıtylýyn qajet ettirmeıtin adam. Aqyldy adam izdenedi, tabady, jetildiredi, jańa nárseler oılaıdy, oılaǵanyn qoldanymǵa engizedi.» Maıkrosoft qyzmetker alý úshin kóp konkýrs, izdenis ótkizedi. Oıyndaǵy adamdy tapqanǵa deıin bir qyzmetti bos qaldyrǵan kezderi kóp bolady.  

Qyzmetkerlerine úles berý

Bıll Geıts ózin qosa eseptegende qyzmetkerlerine joǵary, astronomıalyq jalaqy taǵaıyndamaıdy. Maıkrosofttyń eshbir qyzmetkeri álemdegi eń joǵary jalaqyly adamdardyń qataryna kirmeıdi. Munyń ornyna zerek adamdardy qyzyqtyrý úshin olarǵa úles berýde. Sonyń saldarynda Maıkrosoft qyzmetkerleriniń birshamasy mıllıarder, úshten biri mıllıoner bolyp tabylady.

Qyzmetkerlerin baǵalaý

Maıkrosoft eń aqyldy adamdarmen jumys isteýdi qalaıdy jáne olardy joǵaltqysy kelmeıdi. Bıll Geıts bir maqalasynda jumystan shyqqan árbir qyzmetkeriniń artynan «ol nege jumystan shyqty, nege ony qanaǵattandyra almadyq, qaı jerde qate jiberdik?» degen suraqtarǵa jaýap izdeıtinin aıtady. «Qyzmetkerler Maıkrosofttyń eń qadirli bolmysy. Qyzmetkerler muny jaqsy biledi. Jumys barysynyń árbir sátinde muny sezinedi. Sondyqtan Maıkrosoftta qyzmetten bosaý AQSH-taǵy ortasha kórsetkishten eki ese az kezdesedi.»

Naryqtaǵy ózgeristerdi baqylaý

Jyldam damıtyn sektorda keri qalý - joıylý degen maǵynaǵa keledi. Bıll Geıts eshbir salada naryqtan keri qalǵysy kelmeıdi. Keri qalǵan jaǵdaıda qatesin tez túsinip, qajetti sharalaryn qamdaıdy. Máselen 1984 jyly Eıpl fırmasy makentoshty shyǵarady. Grafıkalyq operasıalyq júıe bolǵandyqtan Maıkrosofttyń operasıalyq júıesinen óte ústem edi. Maıkrosofttyń analogy bir jyldan keıin shyqty. Windows atty bul jańa júıe sátsiz boldy, alaıda Bıll Geıts qamyqpady. Tabandy eńbektiń arqasynda 1990 jyly shyǵarǵan 3.0 óte úlken tabys ákeldi. Osyǵan uqsas mysal ınternet máselesinde oryn aldy. Bıll Geıts ınternettiń damýyn jetkilikti túrde baqylaı almady. Internetke qatysty ónimderdi jetildire almady, keri qaldy. Munyń nátıjesinde tarıhta alǵash ret Maıkrosofttyń aksıalary «Únemi tabys ákeletin aksıalar» tiziminen túsip qaldy. Biraq Bıll Geıts qatesin túsinip, bir jyl ishinde ınternetpen baılanysty kóbeıtip, ónimderin eń qomaqty túrde ınternetke baılanystyra bildi.    

Naryqty túrlendirý

Bıll Geıts pen Maıkrosofttyń urany «standarttardy biz ornatamyz». Maıkrosofttyń tarıhy osy uranǵa saı ártúrli mysaldarǵa toly. Máselen Basic, DOS, Windows júıeleri naryqtaǵy eń keńinen taraǵan ónimder qatarynda boldy.  

---