InfoHub Logo

–    Óskende Google kompanıasynda jumys istegim keledi. Aqparattyq tehnologıany jaqsylap meńgerip, kóp aqsha tabamyn. Aılyǵym joǵary bolǵasyn otbasyma qalaǵan zatyn alyp beremin. Biraq únemdeý kerek. Otbasy búdjetin durys basqarsam ǵana shyǵynnan kiris kóp bolady.

–    Men bolsam, aldaǵy ýaqytta depozıtke aqsha salamyn. Bank oǵan aqsha salǵanym úshin syılyq retinde maǵan qosymsha aqsha beredi. Sol jınalǵan qarajatqa Disneyland-ke baryp, qydyrar edim.

–    Ata-anam kún saıyn 200 teńge beredi. Ol aqshaǵa bálish pen sýsyn alamyn. Keıde tamaq ishkim kelmeı, aqsha jınaımyn. Úıde aqsha salatyn qorapsham bar. Artylǵanyn soǵan salamyn. Osylaısha anama 8 naýryzǵa gúl aldym.

Senseńiz, bul – mektep oqýshylarynyń dıalogy. Sirá, qandaı saýatty dersiz. Buryn balany aqshaǵa jolatpaıtyn bolsaq, búginde zamannyń talaby osyndaı. Aıaq attasań – aqsha deıtin kezeńge qadam bastyq. Sondyqtan balalardyń qarjy týraly saýatyn arttyrý kerek. Osy maqsatta Bank Hoým Kredıt 2014 jyldan bastap bastaýysh, orta jáne joǵary synyp oqýshylaryna qarjy saýaty jaıly aýqymdy baǵdarlama usynǵan edi. Maqsaty – halyqtyń ekonomıkalyq jáne áleýmettik saýatyn arttyrýǵa, qaryzǵa túsý qaýpin tómendetýge, turaqty qarajat kózderin damytýǵa jáne jalpy ekonomıkalyq ál-aýqatty kóterý. Osylaısha, Qazaqstannyń 18 óńirindegi Banktiń barlyq bólimshelerinde qarjylyq saýattylyq boıynsha tegin semınarlar men ashyq kúnder uıymdastyryldy.

Sonymen birge Bank Hoým Kredıt – Global Money Week halyqaralyq qozǵalysyn qoldaıtyn ekinshi deńgeıli biregeı bank. Osy yntymaqtastyq aıasynda Bank Qazaqstannyń barlyq aımaqtarynda besinshi ret Global Money Week-ti GMW-2018 ótkizdi. Sonymen birge osyǵan deıin Global Money Week qatysýshylary semınarlarǵa Banktiń shaqyrýymen qatysqan bolsa, endigide bilim berý mekemeleriniń tarapynan úlken qyzyǵýshylyq týyp otyr. Demek, seń qozǵalyp keledi degen sóz. Sońǵy jyldary «Qarajat álemine saıahat» baǵdarlamasyna 10 myńnan astam adam bala qatysqan.

Global Money Week sheńberinde kúni keshe 14 mamyr kúni S.Begalın atyndaǵy memlekettik balalar kitaphanasynda Bank qyzmetkerleri men qarjy saýaty jaıly trenıń júrgizýshi mamandar mektep oqýshylaryna qarjy álemine saıahat jasady. Orys jáne qazaq mektepteriniń oqýshylary aqshanyń shyǵý tórkini jaıly aqparattan bastap, búdjet, kiris, shyǵyn, jalaqy, halyqaralyq valútalar jáne osy syndy ózge de mańyzdy qarjy taqyrybyndaǵy termındermen tanysty. Shara barysynda balalar trenerdi tyńdap qana qoımaı, óz oılaryn da ashyq bildirdi. Bir qyzyǵy, valútalar týraly kópshilik jaqsy biledi eken. Amerıka dollary, Qytaı ıýany, Taıland baty, Reseı rýblin sýretinen-aq tanydy. Búdjet josparlaýdyń mańyzyn osy trenıńten keıin balalar tipten jaqsy túsingen syńaıly. Óıtkeni kýrstan shyqqan balalardyń júzinde jańa jospar, maqsat pen armannyń izi kóringendeı. Bıznes bastap, tabys tapqan tanymal tulǵalardyń beınesin de kópshilik jazbaı tanydy. Stıv Djobs, Djoan Roýlıng, Bıll Geıts jáne t.b shara qatysýshylaryna mol motıvasıa syılady.

«Atalǵan sharany Bank Hoým Kredıt jyl saıyn uıymdastyryp turady. Tipti ıgi dástúrge aınaldy desek, artyq emes. S.Begalın atyndaǵy kitaphana Global Money Week halyqaralyq qozǵalysyn qoldaıdy. Oǵan dálel retinde bul sharany úshinshi jyl birlesip uıymdastyryp jatqanymyzdy aıta alamyz. Búginde eresekterdiń ózi qarajatyn jóndi basqara almaıdy. Sonyń saldarynan túrli keleńsiz oqıǵalarǵa tap bolyp jatatynymyz bar. Endeshe, búgingi balalar sol qatelikterdi jibermeýi úshin jastaıynan saýattaný kerek. Ózdere kúndelikti beriletin aqshany retimen jumsaý, únemdeý, aqsha tabýdyń ońaı emesin biler bolsa, erteń eresek ómirge jaqsy beıimdeleri anyq» deıdi kitaphana qyzmetkeri Rázıa Tájıeva. Shara sońynda balalarǵa qarjy taqyrybynda jazylǵan oqýlyqtar tabystalyp, estelik sýretke tústi. Kóńildi kúımen tarqasqan balalar mundaı sharanyń taǵy uıymdastyrylýyn qalaıtyndaryn jetkizdi. Mundaı suranysty kórip, jobanyń ǵumyry uzaq bolatynyn baıqaǵandaımyz.  

---