InfoHub Logo

Mundaı jaǵymsyz qasıetter óz boıyńyzdan tabylady ma, tekserip kórińiz.

1. Únemi aqyl berip júresiz

Ózderin keremet sarapshy sanap, eshkim suramasa da «qundy» keńesterin ońdy-soldy shashyp júretin adamdar ádette aqyldan jurdaı bolady. Eger adam bárin bilip boldym, álemge aqıqatty ózim-aq jetkize alamyn degen oıda bolsa, jaǵdaıy qıyn.

Onda ol óz qatelikterin baıqaýdy doǵaryp, basqalardy únemi synap-mineýmen júredi. Nátıjesinde, óziniń bárine qol jetkizgenine senimdi bolý saldarynan, damýydan artta qalady. Al ózimen kelispegen adamdardy «oıy taıaz, nadan adam» dep esepteıdi. Biraq, túptiń túbinde bul úshin qatty ókinetin bolady.

Aqyldy úırenýdi, aqymaq úıretýdi jaqsy kóredi.

Anton Chehov

2. Únemi ózińizdiń aqymaq emes ekenińizdi dáleldeýge tyrysyp júresiz

Bir qaraǵanda bári jaqsy sıaqty. Biraq ishińizden ózińizdi jegideı jep júresiz. Dostaryńyz ben áriptesterińiz betińizge basqasha sóılegenimen, artyńyzdan basqa áńgime aıtatyn sıaqty kórinedi. Al siz olarǵa aldyn-ala soqqy berý úshin, ózińizdiń aqymaq emes ekenińizdi dáleldeýge bilek sybanyp kirisesiz.

Óz bilimi men qabiletine senbeıtin adamdar syrtqy qoldaýǵa jáne jeke basynyń qasıetterin moıyndaýǵa qatty muqtaj bolyp keledi. «Aqyldy adam óz maqtaýyna laıyq bolǵanda qýanady, al aqylsyz adam ózgeniń marapatyna kóńili semiredi» dep beker aıtylmaǵan bolar.

Óziniń aqymaq ekenin túsingen aqymaq — aqymaq emes.

Fódor Dostoevskıı

3. Boljaý qabiletińiz óte nashar

Órisi tar adamdar keń oılaı almaıdy, bolyp jatqan jaǵdaıdy, onyń ishinde óz ómirine qatysty jaǵdaılardy saraptaýǵa, boljam jasaýǵa umtylmaıdy.

Mundaı shekteýlilik trendterge degen qyzyǵýshylyqtyń joqtyǵynan jáne ómirdiń jańa jıekterine kóz júgirtýdi qalamaýdan, tipti odan qorqýdan paıda bolady. Jaıly uıańyzdan eshqaıda shyqqyńyz kelmeıdi. Biraq, ókinishke oraı, bul sizdiń damýyńyz ben múmkindikterińizdi shekteıdi.

Aqyldy adam aldynan sheksiz múmkindikterdi kóredi, al aqymaq bar nárseni ǵana múmkin dep esepteıdi.

Denı Dıdro

4. Ózgeniń aqyly sizdi yzalandyrady

«Aqymaq aınalada aqyldylardyń jınalyp qalǵanyn birinshi baıqaıdy» degen jaqsy sóz bar. Eger sizdiń aınalańyzǵa yzańyzǵa tıip, «ózderinshe bilgishsinip júretin» adamdar jınalyp qalsa, bul jaqsy nyshan emes.

Ádette, aqyldy adamdar basqalardyń jetistikterin qýanyp, kemshilikterine kóz juma qaraıdy. Al aqymaqtar kemshilikterdiń bárin qalt jibermeı, salystyrǵandy jaqsy kórip, únemi basqalardy synap-minep júredi.

Eger dańǵoılyq bireýdi baqytty etken bolsa, onda ol adam shúbásiz aqymaq bolǵany.

Jan-Jak Rýsso

5. Siz áýeli aıtasyz, sodan keıin oılanasyz

Mundaı jaman ádet únemi úlken qıyndyqtar týdyrady. Aqymaq adamdar tóbeden túskendeı sóıleı salady da, abaısyzda aıtylǵan sózdiń qandaı saldary bolatyny jaıly oılamaıdy. Al oılanbaı aıtylǵan sóz bireýdiń júregine qanjardaı qadalýy múmkin.

Bul ádette tereń oılana almaıtyn, mán-jaıdy bezbendep, qorytyndy shyǵara almaıtyn adamdarǵa tán. Al odan basqa adamdar zardap shegedi. Osydan keıin, siz týraly qalaı jaqsy oılasyn.

Dórekilik – aqymaqtardyń tapqyrlyǵy

Andre Morýa

6. Siz aıtqanyńyzdan qaıtpaıtyn qyrsyqsyz

«Aqyldy — oıyn ózgerter, aqymaq – aıtqanynan qaıtpas» degen sóz bar. Birbetkeıliktik, qyrsyqtyq, óziniń qateleskenin moıyndamaý, qatelikke qatysty shyndyqty qabyldamaý — jaqsy emes.

Kóbinese mundaı adamdar oqıǵaǵa qatysty birbetkeı qorytyndylar shyǵaryp, áleýmettik jelilerde óz oıynyń durys ekenin aýzy kópirgenshe dáleldep, pikir bildirgenderde jerden alyp, jerge salady. Mundaı adamdarmen sóz talastyrý beker. 

Aqymaqqa óziniki durys emes ekenin dáleldeýdiń eń jaqsy joly, oǵan bárin óz qalaýynsha isteýge múmkindik berý.

Genrı Ýıller Shoý

---