InfoHub Logo

Ózdiginen ushatyn apparattar elimizdiń shalǵaı aımaqtaryna sálemdemeler taratyp, poshta qyzmetin jeńildetýge kómektesip jatyr. Bul týraly «Qazposhta» AQ Mańǵystaý oblystyq fılıalynyń dırektory Mahabbat Seıtova digitalkz.kz saıtyna bergen suhbatynda málimdedi.

«Bizdiń baǵyttarymyzdyń biri — logıstıkalyq ınfraqurylymdy modernızasıalaý. Osy rette,  Qazaqstanda drondar iske qosyldy. Ol shamamen 8 kılogramm júkti kótere alady. Onyń arqasynda aýyldaǵy aǵaıynǵa taýarlaryn jetkizip bere alamyz. Ádette onymen gazet-jýrnaldar men sálemdemeler tasymaldanýda. Osylaısha avtomobıl joldary nashar aımaqtarǵa ózdiginen ushatyn apparattar taýarlardy jetkizip berip, poshta qyzmetin jeńildetýge óz úlesin qosýda», — dedi M. Seıtova.

Al, Mańǵystaý oblysy bolsa ushqyshsyz apparatqa muqtaj emes eken. Qazirgi tańda sálemdemeler men taýarlar avtokólik arqyly tasymaldanýda.

«Oblysta dron qosylǵan joq. Sebebi, Mańǵystaý oblysyndaǵy jol-kólik trassasy jaqsy. Sol sebepten avtokólikter arqyly joldanady. Al, eger qıyndyqtar týyndaıtyn bolsa drondardy iske qosýymyz múmkin», — dedi ol.

Onyń aıtýynsha, postamattar men jóneltim sýpermarketteriniń ashylýy  óz kezeginde ýaqyt únemdeýge járdemdesip jatyr.

«Qazirgi tańda «Qazposhta» jóneltimderdi sýpermarketter nemese postamattar arqyly jetkizedi. Kez kelgen tutynýshy óziniń taýary týraly aqparatty sms arqyly nemese saıtymyzdan kóre alady. Sonymen qatar, zatyn alýǵa kelgen árbir turǵyn kem degende 2-3 mınýt ýaqytyn jumsaıdy. Al, buryn 20-30 mınýt ketetin. Nege deseńiz, ol kezde Qazposhta bólimshesine tikeleı kelip alatyn», — dep atap ótti fılıal dırektory.

Sondaı-aq, ol sıfrlyq tehnologıalardyń turǵyndarǵa jaılylyq pen sapaly qyzmetti usynatynyn basa aıtty.

«Sıfrlandyrýdaǵy basty maqsat — turǵyndarǵa kórsetiletin qyzmettiń sapasyn jaqsartý. Biz óz qyzmetimizdiń turǵyndarǵa jaıly bolǵanyn qalaımyz, ol úshin bizge sıfrlyq tehnologıalar kómektesedi», — dep túıindedi «Qazposhta» AQ Mańǵystaý oblystyq fılıalynyń dırektory.

Aıta keteıik, «Sıfrlyq Qazaqstan» memlekettik baǵdarlamasynyń aıasynda Qazposhtaǵa birshama ózgerister engizildi. Sondaı-aq, onyń aqparattyq portaly arqyly kóptegen qyzmetterdi alýǵa bolady. Atap aıtsaq, elektrondy konvert, basylymǵa onlaın jazylý, QR-kod arqyly gazetterdi jetkizýdi baqylaý qyzmetteri kórsetiledi. Buǵan qosa, elektrondyq poshta qyzmeti damyp keledi. Ol boıynsha kez kelgen mekenjaıǵa elektrondyq hatty joldaýǵa bolady. Al, taýardy aýyldyq eldi mekenderge jyldam ári ońaı jetkizýdegi máseleler dron arqyly sheshilýde.

---