InfoHub Logo

Elde kásip joq. Qar ketisimen tyrbanyp bir-eki jer egin salsa, jazǵy kásipti sonymen bitti dep sanaıdy. Kóleńkege jatyp, aıran-shalabyn iship, uzaq kúndi tek jatýmen kesh qylady. Ózi qarap jatqan soń, jumys istegendi jaqtyrmaıtyn ádeti ǵoı, qıt etse orystardy ermek qylady:

— Apyrmaı, orys degen jan tynyshtyǵyn bilmeıtin "maqulyq"-aý. Shildeniń ystyq kúninde shyjyp jumys istep júrgeni. Búıtip tapqan maly qurysyn! — deıdi.

Orystyń kásibi ónimdi. Egindi kóp salǵan soń, kúzdi kúni astyqty kóp alady. Jazdaı damyl kórmeı, tyrbanyp shóp jıady. "Jan tynyshtyǵyn" bilgish qazaqtyń bir-eki jer egini qys ishýine jetpeı qalyp, bir kúni dorbasyn qoltyǵyna qysyp tamyryna barady.

— Aı, tamyr, meniki un bitken. Sen maǵan bıdaı ber, meniki saǵan jer beredi!..

Mine, ońaı saýda!

Az ǵana jeriniń tańdaýyn almaqshy bolyp orys bıdaı beredi. Qazaqtyń tańdaýly jerine salǵan soń, orystyń egini taǵy bitik bolady!..

Jalqaý eldiń baqqany kóbine áńgime-ósek. Áńgimesiniń de túr-túri bar. Jazǵyturǵy kezde jańbyrdy áńgime qylýshy edi:

— Bıyl qoıan ǵoı. Egin-pishen bolmas-aq. El shubyrady ǵoı,— dep kúrsinedi.

Egin-shóptiń bolmasyn, eldiń shubyratynyn bilse, kún buryn nege qam qylmaıdy? Kásip qylyp qysqy azyqty taýyp alýdyń qamyna nege kirispeıdi? Joq, ony oılaǵan adamdy kóre almaısyń. Qysty kúni bala-shaǵa ashtan óledi eken dep jazǵy ystyqta jandy neǵyp qınasyn!

Beri kele áńgimeniń túri ózgerdi. Áskerlikke daıyndaýǵa jastardy alý naýqany keldi. Onymen qabat shabyndyq jerdi bolý jumysy bastaldy. Jurt "qoıannyń ýaıymyn" tastaı berip, betti osyǵan burdy:

— Salaýmalaıkúm!

— Álıksalam. E, ne habar? Balalardy ne ǵylypty? Soǵysqa aıdamaı ma eken?

— Balalar amandyq deıdi. Oınatady deıdi. Tańerteń sýǵa túsedi deıdi. Túste bórte beredi deıdi...

— Aı, orysta aqyl bolsaıshy! Tekke áýre qylyp, balalardy almaı-aq qoısa qaıtedi eken?!..

Budan keıin bóliske kóshedi:

— Nemene, sizderdiń jerlerińizdi bóldi me?

— Bolystan bireýler shyǵyp, bólemiz degen bolyp júr edi. Soǵan adam bolmady bilem. Ásheıin áýreshilik qoı. Baıaǵydan beri orysty aralastyrmaı da shabyndy bólip shaýyp júr edik qoı...

— Myna Bólekbaı aýyly úı basyna bólip alypty degen habar bar, odan ne bildińiz?

— Oı, shyraǵym-aı, ol aýylda ne bolmas deısiń. Aýylynda komenes bolǵan soń, solaı bolady ǵoı...

Bul — ymyrashyl, ata jolyn buzbaıtyndardyń keńesi. Osy keńes eldiń kóbinde bar. Kóleńkede jatyp, uzaq kúndi kesh qylý úshin osyny ermek qylady. Kertartpalyqpen kúni ótedi...

Áskerlikke alynǵan jastar elge keldi. Shabyndyq bólisi ótti. Endigi ermegi ne?

Saspańdar, el tabar. Shabyndyqtan týǵan birtalaı daý bar. Kúzge sheıin sol ermek. Kúzge qaraı, egis shyqpasa, ashtyq ermek bolmas pa eken?

---