InfoHub Logo

Baıaǵy ótken zamanda bir qalashyqta álemniń eń sulý qyzy ómir súripti. Qyzdyń sulýlyǵy sonshalyq, ony kórý úshin óte alys shaharlardan, elderden óte baı, asqan kórikti, asyl tekti jigitter keledi eken. Úılenýge usynys jasaǵandardyń, hanzadalardyń, serilerdiń bireýin de unatpapty. 

Sol kúnderi osy mańda turatyn bir jigit te álgi qyzǵa ǵashyq bolyp qolyn surapty. Biraq qyz onyń da usynysyn qabyl etpeıdi.

Aradan uzaq jyldar ótedi. Álgi jigit basqa qalaǵa ketip, jańa ómir bastap, úılenip bala-shaǵaly bolady. Kúnderdiń kúninde buryn ózi turǵan kishigirim qalashyqqa joly túsedi. Kele jatyp jolda bir tanysyn kezdestiredi. Onymen áńgime barysynda buryńǵy ádemi qyz esine túsip, onyń jaǵdaıynyń ne bolǵanyn suraıdy. Sonda tanysy gúl baqshasy bar úıdi kórsetip, qyzdyń turmysqa shyqqanyn sol úıde turyp jatqanyn aıtady. Jigit: «Apyr-aı, kezinde eshkimge qaramaǵan bul qyzdyń kúıeýi kim boldy eken?» dep, tańyrqaı bastaıdy. 

Bir kúni jasyryn syǵalap júrip, kúıeýiniń úıden shyǵyp bara jatqanyn kóredi. Qyzdyń kúıeýi semiz, basy taz, túri de óte usqynsyz bireý eken. Onyń ústine baı da emes eken. Munyń mánisin bilgisi kelgen álgi jigit kúıeýi ketken soń úıdiń esigin qaǵady. Qyz esikti ashqanda, óziniń kim ekenin aıtyp, ne úshin mundaı adamǵa úılengenin suraıdy. Qyz oǵan: «Anaý turǵan gúl baǵynyń ishinen eń ádemi gúldi úzip ákelseń, jaýabyn aıtamyn. Biraq, bir ǵana shartym bar. Ádemi gúldi alý úshin ilgerileı alasyń biraq keri sheginbeısiń!» deıdi. 

Jigit júzdegen ádemi gúlderdiń ishine kirip aralaı bastaıdy. Birden kózine óte ádemi bir sary gúl túsedi. Ony endi alaıyn dep jatqanda sál ilgeride qyzyl-ala gúl kózine túsedi. Oǵan baryp qolyn soza bergende odan da ilgeride óte keremet qyzyl gúl shoǵyn kóredi. 

Osylaı eń ádemi gúldi tabamyn dep ilgerilep júre kele baqshanyń sońyna da jetedi. Keri shegine almaǵan jigit amalsyzdan sol jerden bir gúldi úzip, qyzǵa alyp barady. Baqshanyń eń ádemi gúlin kútip otyrǵan qyz japyraqtary solyńqy, óńsiz gúldi ákelgenin kóredi.

Sonda qyz jigitke burylyp bylaı deıdi: «Kórdiń be? Únemi eń jaqsysyn tabýdy qalaǵanyńda ómirińniń qalaı ótip ketkenin bilmeı qalasyń. Sońynda eń jamanyna da razy bolýǵa májbúr bolasyń. Sondyqtan jastyq shaǵyń qoldan ketpeı turyp qolda bardyń qadirin bilý kerek.»

---