InfoHub Logo

Halyqaralyq balalardy qorǵaý kúnine oraı el aýyzynda «batyr bala» atanyp ketken 13 jastaǵy mańǵystaýlyq Darhan Ámirhanǵa qurmet kórsetildi. Sońyna ergen bir inisi men úsh qaryndasyn órtten aman alyp shyqqan 7 synyp oqýshysyna belesebet, baǵaly syılyqtar jáne tótenshe jaǵdaılar departamenti basshysynyń alǵys haty tabystaldy.

Sharaǵa «Nur Otan» partıasy, «Jas Otan» jastar qanaty, depýtattar, assambleıa músheleri jáne BAQ ókilderi qatysty.

Oqıǵa osy jyldyń 26 sáýirde Túpqaraǵan aýdany Saıyn Shapaǵatov aýylynda oryn alǵan. Bes bólmeli úıde turǵan Bolatovtar otbasy eki er jáne úsh qyz bala tárbıelep otyr. Sol túni ákesi men anasy úlken uly Darhanǵa balalarǵa baskóz bolýdy tapsyryp, ózderi jumysta bolǵan.

«Túngi mezgilde úıdiń ishin qaıta-qaıta aralap, quddy bir tótenshe jaǵdaı oryn alatynyn júregim sezgendeı boldy. Bir ýaqytta uıyqtap ketippin. Túsimde tilsiz jaýmen arpalysyp jatqan ekenmin. Uıqydan oıansam kóz aldymda úıdiń ishi qara tútin bolyp jatqan eken. Soǵan qaramastan inim men úsh qaryndasymdy úıden aman alyp shyǵyp, kórshiniń úıine aparyp tastaǵan soń, birden órt sóndirý qyzmetine habarlastym», - deıdi batyr bala Darhan Ámirhan.

Órt sóndirýshilerden belgili bolǵandaı, shaqyrtý 02:12 ýaqytynda túsken. Mamandar tilsiz jaýdy tez arada aýyzdyqtaǵan.

Darhannyń ákesi Baqytjan Bolatov bir kásipkerdiń kóligin jalǵa alyp otyr eken. Oqıǵa bolatyn túni ol jumysta bolǵan, al kóligi isten shyqqan. Al anasyn balabaqshada túngi kezekshilikke jumysqa shaqyrtqan. Sóıtip úıde úlken 13, al kishkentaıy 3 jastaǵy balalar ózderi qalǵan.

«Aldymen Alla, sodan soń balam Darhanǵa rızamyn. Kim biledi, olar úıden shyǵa almaı qalǵanda bes balamnan aıyrylyp qalýym múmkin edi. Balamnyń batyrlyǵyna tánti boldym. Men qaısar balammen maqtanamyn», - dep aǵynan jaryldy Darhannyń ákesi Baqytjan.

«Nur Otan» partıasy MOF tóraǵasynyń birinshi orynbasary Nurı Týmyshev bolsa batyr balanyń ákesi Baqytjan Bolatovqa alǵys hat tapsyrdy.

Al órttiń sebebi naqty neden ekendigi ázirge belgisiz. Mańǵystaý oblysy tótenshe jaǵdaılar departamentiniń órt sóndirý jáne avarıalyq qutqarý qyzmeti memlekettik mekemesiniń basshysy Erlan Máýlenov bolsa, toqtyń qysqasha tuıyqtalýy degen aldyn-ala boljam jasap otyr. Sonymen qatar órt nátıjesinde keltirilgen materıaldyq shyǵyn mólsheri de jaqyn kúnderi belgili bolmaq.  

Aıta ketý kerek, órtke oranǵan úıdiń ishinde quran kitap ǵana janbaı qalǵan, basqa zattardyń bireýide paıdaǵa aspaıdy.

Qazir Bolatovtar otbasy ýaqytsha saraı jaldap turyp jatyr. Órtke oranǵan bes bólmeli páterden túk qalmaǵan. Otaǵasy bolsa úıin jańadan turǵyzýǵa kirisip ketken. Múmkindiginshe aýyl ákimdigi, kórshi-kólem, týysqandary jáne halyq barynsha kómek qolyn sozýda. Qasıetti Ramazan aıynda kópbalaly otbasyǵa jańa úıdi salýǵa kómek kórsetilse nur ústine nur bolary sózsiz.

Kámshat İzbasarova

QR Jýrnalıser Odaǵynyń múshesi

Aqtaý qalasy

---