(I. A. Krylovtan)

Toıǵan esek shópti ottap mańaıdaǵy
Sonyrqap shatqa ketti qaı-qaıdaǵy.
Tentirep ólkeni órlep kele jatyp,
Jolyqty bir bulbulǵa toǵaıdaǵy.

Senbisiń aqyn bulbul, jańa kórdim,
Atyńa jurt maqtaǵan qumar edim.
Bir saırap berseń, qalqam, ózim estip,
Ras pa eken jurttyń sózi, synar edim.

Ónerge saldy bulbul sonda ańyratyp,
Shyńǵyrtyp, shymyrlatyp, sorǵalatyp,
Myń túrli kúıge salyp tolqyntady,
Mańaıda jan bitkendi tańyrqatyp.

Qoı jatyr, qoıshy tyńdap turdy elbirep,
Kózine qyp-qyzyl bop jas móldirep.
Jel soqpaı, qus shýlamaı, bári jym-jyrt,
Ánge kóńil jiberip turdy eljirep.

Bulbul boldy, tosyp tur esek sózin,
Esek jerge qaratyp eki kózin:
"İsh pyspaı-aq tyńdarlyq bar ekensiń,
Áttegene-aı, bilmepsiń áteshti óziń!

Ekensiń án salýǵa sen-daǵy epti,
Sen biraz átesh ánin úıren!"— depti.
Bul syqyldy synshynyń sózin estip,
Kóz kórmeske bulbul da ushyp ketti.

Demeımin jurt maqtasyn,
Ia jaqsyn, ıa jaqpasyn.
Súıtse de mundaı synshydan
Qudaıym bizdi saqtasyn.

---