InfoHub Logo

Eshki — múıiz qýystylar tuqymdasyna jatatyn jup tuıaqty, kuıis qaıyratyn janýar. Úı eshkileriniń bastapqy tegine eshkilerdiń jabaıy eki túri (bezoar eshkisi, ıir múıizdi eshki), sondaı-aq joıylyp ketken S. rrissa túri jatady. Eshki — qolǵa alǵash úıretilgen janýarlardyń biri. Eshkiniń múıizi qyrly, dene bitimi jeńil, quıryǵy qysqa keledi.

Onyń túbiti, júni, terisi, eti men súti paıdalanylady. Eshkiniń sútti (megrel, zaane, orys eshkileri), júndes (angor eshki), túbitti (prıdon, orynbor, bashqurt eshkileri), sútti-etti júndes   (ózbek,   qazaq-qyrǵyz,   kavkaz,   býrát-mońǵol eshkileri) tuqymdary bar.  Eshki toǵyz-on jyl tirshilik etedi. Eshki bir — eki, keıde beseýden laqtaıdy. Jaqsylap kútse jylyna eki ret tóldeıdi. Tekesi 60-65 kg-ǵa deıin, eshkisi 40-60 kılograǵa deıin tartady. Jemdengen eshkiden 20-28 kg et, 4-6 kg maı, jeti-on aılyq laqtan 12 kg et, 1,5 kg maı alynady. Sútti eshkiler jylyna 450-550 kg, keıbir sharýashylyqtarda 1 t-ǵa deıin sút beredi. Sútiniń maılylyǵy 3,8-4,5%. Júndes tuqymdy eshki qylshyǵynyń uzyndyǵy 15-18 sm bolady. Eshkilerdi kóktemde, jyly aýdandarda ekinshi ret tamyz-qyrkúıek aılarynda qyrqady. Tekesinen 4 - 6 kg, eshkisinen 3 - 5 kg qyl alynady. Túbitti eshkiden 0,2 - 0,5 kg, keıde 2 kg túbit alynady. Eshki terisinen safıan, shevro sıaqty baǵaly bylǵary jasalady.