InfoHub Logo

Jambyldyń usaq-túıek óleńderinen bólek alǵashqy aýyzǵa ilingen jeri — Saıqal degen qyzben aıtysqany. Bul qyzben Jambyl Talas boıynda kezdesedi.Saıqaldyń atyn estip, Jambyl bir toıda ádeıi izdep barady. Jambyldyń sol elge kelip ózimen kezdesýge izdenip júrgenin bilip, qyz da ázirlenedi.

Qyz otyrǵan úıge Jambyl basa-kóktep kirip keledi, qyz Jambyl ekenin bilip, jalań aıaq kók saýyr kebistiń basyn ilip otyr eken, kósilgen aıaǵyn jımaı óleńdetip qoıa beripti.

«Jip aıyl, qur quıysqan, kıiz terlik,
Iapyr-aý, bir sony eldi jańa kórdik,
Jıylǵan aqsaqal men bozbalalar,
Qalaısha bul Jambylǵa jaýap berdik?»,

depti.

Jambyl otyra berip:

«Arqanyń jardaı bolar sary nary,
Ketpeıdi Alataýdyń jazda qary.
İstikke shanyshqan sıraqtaı qup-qý qylmaı,
Qýartpaı tabanyńdy tartsańshy ári!», —

deıdi. Ekeýi kóp aıtysady. Aıaǵynda qyz daraqy ádepsiz óleńge barady. Odan Jambyl da aıanbaıdy. Bir kezekte qyz:

«Eı, Jambyl, kóılegim kók, dambalym kók,
Kel daǵy, jaqsy kórseń, k.....di óp,
Óp degenge bul Jambyl ólip ketti,
Anyq ópsin, qarap tur, jıylǵan kóp», —

depti.

Sonda Jambyl:

«Eı, Saıqal, kóılegiń kók, dambalyń kók,
Uıaty joq qyz sózi keledi tik,
Buryn ópse k....di aǵań ópsin,
Bir jyryqqa bir jyryq keledi dóp».

deıdi.

Óıtkeni qyzdyń aǵasy jyryq eken. Qyzdyń aǵasy ashýlanyp, janjal shyǵarady. Qyz sóz aıta almaı bógelip qalady. Qyz jeńilip, Jambyl jol alady. Jambyldyń ataǵy elge jaıylyp ketedi. Bul aıtysty el jattap áketedi.

Muny aıtqan Amanqul Joldybaı balasy — Amangeldi kolhozynda, qazirde jasy alpysqa kelip qalǵan adam. Bul kisi: «Shýbaı degen kisiniń aıtqanynan uqtym, Shýbaı oıynnan óleń shyǵaratyn adam edi», — deıdi.

---