InfoHub Logo

"Jaqsy sóz - jarym yrys". Osy naqyldy kúnde estımiz ǵoı, shynynda. Biraq, bir ókinishtisi, baıybyna bara bermeımiz. Bir sátsizdikke ushyraı qalsaq, ómirden túńilip, dúnıede bardyń birin qaldyrmaı tildep otyrǵanymyz sosyn...

Al siz áli kúnge deıin sózdi qudyretti degenge senbeısiz be? Endeshe óz basymnan ótken myna oqıǵamen bóliseıin.

8-synypta T.Áýbákirov aǵamyzdyń suqbattaryn jıi oqıtynmyn. Sodan erekshe áser alyp, ǵarysh týraly óleń jazdym. "Ǵarysh, ǵarysh, ushyp ketsem dúnıeni silkindirip" dep bastalatyn.

Arada 2 jyl ótti. Jazǵy demalysta edim. Jumysynda otyryp, anam qońyraý soqty. "Almatyǵa lagerge barǵyń kele me?"deıdi. Qýana-qýana kelistim. Jolǵa daıyndyq bastaldy.

Almatyǵa da jettik. Ómirimde birinshi ret kelýim. Aspanmen talasqan aq basty taýdy kórip, aýzym ashylyp qaldy. Quddy bir kartına dersiń. Tek tabıǵat sýretshiniń qolynan shyqty demeseń, biz kórip júrgen sýretterden bir de bir aıyrmashylyǵy joq.

Kóp ótpeı qala syrtyndaǵy qalashyqqa kelip, ornalastyq. Kelgennen soń mán-jaıdy bilsek, eshqandaı da lager emes eken ol jer. Biz "respýblıkalyq jas ǵaryshkerler men astronomdardyń 1-sletine" kelgen ekenbiz. 

Jaratylystaný baǵytyndaǵy ǵylymdarǵa múlde beıimim joq meniń munda qalaı tap bolǵanym ózime de beımálim boldy sol sátte. Sóıtsek, bizdi jibergen oblystyń ózi istiń anyq-qanyǵyna kóz jetkizip jatpaı, irili-usaqty saıys-jarystarda kózge túsip júrgen oqýshylardy jibere salǵan eken.

Sóıtip, meniń Almatydaǵy alǵashqy on kúnim esten ketpesteı bolyp ótti. Observatorıada boldyq. Juldyzdy aspandy baqyladyq. Eń keremeti, teleskoppen ǵalamsharlardy tamashaladyq.

Endi meni sonaý alystan munda ertip kelgen ne deısiz ǵoı? Sóz qudireti. Osy oqıǵa bolardan 2 jyl buryn jazylǵan ǵarysh týraly óleńim. Shynynda, astronomıadan múlde beıhabar myna meniń ol jerge qalaı tap bolǵanym tańǵajaıyp emes pe?..

Hafız aıtady: "Sizdiń sózińiz siz sonyń ishinde turatyn úıińizge aınalady". Sondyqtan, sózimizge abaı bolaıyq, tek jaqsy nárseler aıtyp júreıik, sonda bári jaqsy bolady.

Uıqasbaeva Aqbota

---