InfoHub Logo

Eginge qamdanatyn ýaqyt jetti. Mine, qazir naýryz aıy týdy. Jaz jaqyn. Ýaqyt tynbaı ilgeri júrýde. Eshkimniń erinshektigine zaman toqtap, qarap turmaıdy.

Pysyq, kúshti adam zamannan keıin qalmaı, mezgilinde úlgirip, tirshilik retinde kerekti isterin istep qalady. Shaban, álsiz, jalqaý adam zamanǵa ilese almaı, mezgilinde úlgere almaı, ár nárseden kem qalady.

Qazaqstannyń eli jalqaý. Zamannan keıin, artta qalǵan el. Biraq sen jalqaý ekensiń dep, júrip bara jatqan zaman toqtap turmaıdy.

Kimde-kim jalpy ónerli adamzattyń qataryna kirmek bolsa, tynbastan eńbek qylý kerek. Jalqaýlyqty qaldyrý kerek. Tirshiliktiń negizi — eńbek. Eńbekpen ǵana adam jaqsy turmysqa jetpek.

Mine, endi eginge qamdanatyn ýaqyt jetti. Eginge erteden qamdaný kerek. Qazaqstan halqy shaban, jalqaý. Sol shabandyqtyń, jalqaýlyqtyń saldarynan nadan ám ónerli eldiń báriniń artynda qalǵan. «Shaban úırek buryn ushar...» dep qazaq maqal aıtsa da, sol úırek qurly «buryn ushýdy» bilmeıdi.

Ózi eńbek qylmaǵan adamǵa eshkim de járdem qylmaıtynyn qalyń qazaqtyń kedeıleri biletin boldy. Endi shabandyqty tastap, eginge daıyndalý kerek.

Qazaqstan úkimeti bul rette qolynan kelgen járdemin aıamas. Onyń qylǵan járdemi jalpy qalyń ashardyń bárine jetpeıdi.

Qazaqstannyń jer-sýyn basqaratyn komısarıaty óziniń tapqan segiz júz myń puttaı tuqymyn gýbernıa-gýbernıaǵa bólip jiberip otyr. Máskeýden taǵy da jerdem surap jatyr. Járdem ala alsa, taǵy da gýbernıa-gýbernıaǵa bólip jibermek.

Biraq bul jetpeıdi. Qazaqstanǵa 3 mıllıon puttaı tuqym kerek. Jalǵyz járdem beretin Máskeýdiń ózinde de tuqym az.

Mine, sol sebepti jalpy halyqtyń ózi erte bastan qamdanyp, tuqym taýyp, jalǵasyp, ushtasyp, mezgilinen buryn egin salýǵa daıarlanýy kerek.

«Jatqanǵa jan jýymaıdy...», jazǵy eginge qamdanatyn ýaqyt jetti!

Bul týraly gýbernıadaǵy, ýezerdegi, eldegi eńbekshi halyqqa shyn kyzmet qylamyn degen azamattar erterek oılanyp, erinbeı, tynbaı halyqqa jarmalanyp, qolynan kelgen túrli járdemderin, aqyldaryn berip, jalpy aýyl halqym jumyla egin isine kiristirýge barlyq kúshterin salýlary kerek.

Jalpy halyqtyń sharýasy túzelmese, Keńes úkimetiniń de isi túzelmeıdi. Joǵarǵy Keńes úkimetiniń nusqasy osy.

Buǵan tereń oı jiberý kerek.

Shyndap, erinbeı erteden eginge kirisý kerek. Bul ár azamattyń boryshy.

1924 jyl

---