InfoHub Logo

Jaqynda «Oktábr balalary» gazetiniń kollektıvi jas aqyn-jazýshylarmen áńgime jasady. Oǵan Qazaqstan jazýshylary II seziniń delegattary jáne oblystardan kelgen aqyn-jazýshylar qatysty. Ordendi aqyn - jazýshylar — Asqar Toqmaǵambetov, Áljappar Ábishev joldastar boldy.

Áńgime ekinshi sıeziń qaýlysyna sáıkes Qazaqstanda balalar ádebıetin órkendetip, balalardyń tilegine saı shyǵarmalar berý jóninde boldy.

Bul jóninde biraz joldastar ezderiniń usynystaryn berdi.

Gýrev oblysynan kelgen ókil Tilekov Járdem joldas: aýdan, oblystardaǵy ádebıet krýjogynyń jumystary týraly aıtty. Ádebıet krýjoktaryna úlken kómek kerek ekenin jas ádebıetshilerdi tárbıeleýde olarmen tyǵyz baılanys jasap, jas ádebıetshilerdiń tvorchestvolyq ósýine kúnbe-kún járdemdesip otyrýǵa usynys jasady.

Qaraǵandy oblysynan kelgen Qulbaev joldas: krýjoktarda jas avtorlarǵa kómek berýde, olardy ádebıet teorıasymen qarýlandyrýda «Oktábr balalary» gazetiniń betinde avtorlarǵa konsýltasıalar berip otyrýdy aıtty. Ásirese kórkem ádebıettiń teorıalarymen, onyń ishinde basty janrlary: proza, poezıa, pesalardyń túrli salalaryn tanystyrýdy «Oktábr balalary» gazeti tájirıbe júzinde qolǵa alý kerektigin, jas avtorlarǵa, jańa jaza bastaǵan pıoner mektep oqýshylaryna úlken kúsh ekendigin usynys etip engizdi.

Shyǵys Qazaqstannan kelgen jas aqyn Sádý Mashaqov joldas gazet betinde sapaly áńgimelerdiń, óleńderdiń basylýyna zer salý jóninde keıbir gazette basylatyn shyǵarmalardyń til jaǵynan, sújet jaǵynan aqsap jatatyndyǵyna toqtala kelip, jastardyń qyzyqty tili, kórkem sújeti baı shyǵarmalar jazylýyna kómek retinde gazet arqyly klasıkterdiń shyǵarmalarymen jáne sovet aqyn-jazýshylarymen tanystyrýdyń qajettigin áńgimeledi.

Sonymen birge jas talanttardy ózderiniń shyǵarmalary arqyly kópshilikke tanystyrýdy, olardyń shyǵarmalaryn gazette bastyrý jóninde qadaǵalap otyrýdy gazet kollektıvi esine alý kerek dedi.

Ońtústik Qazaqstannan kelgen Malqarov joldas jańa jaza bastaǵan jastarǵa konsýltasıanyń kerek ekenin, olarǵa úzbeı keńes berip otyrýdy, olardyń tvorchestvolyq ósý jolynda gazettiń ınısıator bolýyna toqtaldy.

Ordendi aqyn Asqar Toqmaǵambetov Qazaqstanda qaýlap ósip kele jatqan jas bóbekterdiń tilegine san shyǵarmalar berýdi aıtty.

Asqar joldas jas balalardy tárbıeleýde olarǵa túsinikti, ózderiniń tilimen jazylǵan ádemi, qyzyq shyǵarmalar berýdi qolǵa alý kerek, olardy qoldap eski muralarmen týysqan respýblıkalardyń mádenıetimen tanystyrýdy qolǵa alý árqaısymyzdyń mindetimiz bolsyn dedi.

Pıoner aqyny, jas tilshimiz — Qapan Ahmetqalıev óziniń sóılegen sózinde aýdandaǵy jas talanttardy tvorchestvo jaǵynan tárbıelep ósirýde, olarmen úzbeı baılanys jasaýda «Pıoner» jýrnalynyń oblys, aýdan jastarynan qol úzip ketkendigin aıtty. Tek onda redaksıanyń mańaıyndaǵy, Almatydaǵylardyń ǵana shyǵarmalarymen shuǵyldanyp qoımaı, barlyq oblysqa kóńil aýdarýdy, tilshilerdi kóbeıtip óz oqýshylarynyń tilegine saı jumys isteýdi aıtty.

Joǵarydaǵy pıoner jýrnalyna aıtqan jaǵdaıdy «Oktábr balalary» gazeti de eske alýy kerek dedi.

Komsomol baspasynyń dırektory Tabýnov joldas shama kelgenshe jastarǵa járdemdesetindikterin, olardyń shyǵarmalarynan komsomol baspasynyn kúshimen jınaq shyǵarý jóninde, ásirese balalar tvorchestvosyna balalar úshin jasalatyn shyǵarmalarǵa nazar salyp, jumys isteýdi usyndy.

«Oktábr balalary» gazetiniń kollektıvi pıonerler men mektep oqýshylarynyń tilegine sáıkes kórkem tildi, tereń sújetti áńgimeler, qyzyq poemalar, ertegiler, sapta júrgende ánge qosyp aıtatyn jaqsy óleńder jazýdy aqyn-jazýshylarǵa usynys etip qoıdy.

Jáne aqyn-jazýshylardyń shyǵarmalaryn óziniń eń jaqsy eń jas oqýshylary pıonerler men mektep oqýshylaryna jetkizip, olarǵa taratyp otyrýda «Oktábr balalary» gazetiniń kollektıvi árqashan da daıyn ekendigin bildirdi.

Sonymen qatar, bizdiń aqyndarymyzdyń, jazýshylarymyzdyń «Oktábr balalary» gazetiniń avtory bolýdaǵy mindeti, otanymyz týraly, partıa týraly, halqymyz týraly, tarıhı oqıǵalar týraly jáne halyq muralary týraly balalar kópshiligine túsinikti tilmen, qyzyqty etip jetkizip berý kerek delindi.

Bul aıtylǵan usynystardy aqyn-jazýshylar qýanyshpen qarsy aldy. Keleshekte «Oktábr balalary» gazetimen tyǵyz baılanys jasap turmaq boldy.

Oktábr balalary»

1939 j. 12 ıýl, № 50.

---