InfoHub Logo

Biz bir jyly kóktemde demalys alyp, súıikti qalamyz Almatyǵa keldik. Qalanyń taý jaq shetinen jalǵa alǵan úıimiz de qolaıly bolyp shyqty.

Tuńǵysh qyzymyz Janna onda jetige tolǵan edi. Týǵan kúnine arnap bir kishkene syılyq jasamaq boldym. Janna ekeýmiz qalaǵa bardyq. Qaıtar jolda kóshede gúl ustap otyrǵan kempirden bir shoq gúl satyp alyp edim. Janna oryndamaǵan bir ýádemdi oıyma saldy. Buryn birneshe kún buryn men oǵan: «Taýǵa shyǵamyz, qyzǵaldaq teremiz», — degen edim.

Balata ótirikshi bolýdan jaman bar ma! Basqa bir usaq sharýalardy bylaı qoıyp, kelesi kúni Janna ekeýmiz taýǵa shyqtyq.

Bergi bette qyzǵaldaq gúlin taba almadyq. Qala adamdary terip ketipti. Al basqa gúlderdiń áli sheshek jara qoımaǵan shaǵy eken.

Biz ári astyq. Uzaq júrdik. Qıly-qıly tóbelerdi kezdik. Biraq qyzǵaldaqqa kezdese almadyq. Kóńilsizdik basty. Asa bir renishti túrde úıge bettedik. Qazir Janna bir qushaq gúl kóterip kele jatsa... Shirkin-aı, onda qyzym sharshaǵanyn da umytyp ketken bolar edi-aý! Úıge barǵan soń, taýǵa qalaı shyǵyp, qalaı túskenimiz de, gúldi qalaı tergenimiz de jatqan bir jyr bolyp aıtylmas pa edi. Saıan da, kórshi úıdiń balalary da Janna áńgimesin tyńdap aýzyn ashyp, ańyryp qalmas pa edi! Átteń ne kerek, ákele jatqan gúlimiz joq.

Ózimiz de bir shyǵynǵa ketken ekenbiz. Kólbeý betkeıdi qıalap tómen túsip kelemiz. Sharshap, shaldyǵa túsip kelemiz. Sol jaqta bıik bir aq basty tik kúz tur. Kún kózin de qalqalap, tóbemizden tóne túsip tur.

— Papa, sharshadym, aıaǵym dirildeıdi, búgile beredi, — dedi qyzym.

— Osy tóbege shyqqanǵa sharshap qaldyń ba? Al myna quzǵa shyqqandar da bar ǵoı. Sen túgil solar da sharshadym dep aıtqan emes, — dedim men Jannanyń kóńilin tabam ba dep.

Janna joǵary, quzǵa qarady.

— Oı, oı oı!!!

— Ras aıtam. Tipti solardyń ishinde qyzdar da bolǵan.

— Da, papa?! Oı, oı oı! Sharshadym dep aıtpaǵan sonda da, á?

— Iá, aıtpaǵan.

— Oı, oı, oı! — dep Janna basyn shaıqaı berdi. Men qyzymnyń kóńilin aýlaǵanyma qýanyp, ilgeri kóz saldym. Kenet, aldymyzda eki júz qadamdaı jerden bir kishkene tómpeshik kórindi. Kóz jaýyn alar qyzyl gúlge tunyp turǵan tómpe! Qýanǵandyǵym sondaı «Qyzǵaldaq» degen sóz de aýzyma túspeı qaldy. «Jannalap» alǵa qaraı qolymdy silteı berdim. Onyń da kózi shalyp qalǵan eken. Sharshaǵanyn da umytyp ketken. Júgire jóneldi. Men de adymdaı basyp kelemin.

Janna tóbeshikke baryp jetken boıda - aq gúlge qolyn soza berip qalt turyp qaldy. Sodan keıin tómpeni bir aınalyp tústi de, maǵan qaraı júrdi.

Men oǵan anadaıdan:

— Jannajan, kidirme, julyp ala ber. Úıge tez qaıtaıyq, — dep daýystap kelemin. Qyzym bul sózime qulaq aspady.

Men jaqyndap kelgende,sybyrlap qana:

— Mola! — dedi. — Papa, bul qyzǵaldaqty julmaıyqshy.

Kelip qarasam, shynynda da mola eken. Basyna qoıylǵan kishkene ǵana qulpy tasta:

«Rásh Sadyqova. Jıyrma eki jasta. Qapylysta shyńnan qulap opat boldy. Máńgi-baqı qosh bol, qazaqtyń taza jandy, er júrek qyzy.

«Saparlas dostarynan» degen jazý bar eken. Men qyzymdy baýyryma qystym da, mańdaıynan súıdim. Aqylyna razy bolyp súıdim. Ekeýmiz taǵy da ilgeri júrdik. Janna bolsa, jańaǵy ıesiz taýda jalǵyz qalǵan mola jaıyn suraıdy. Al men bolsam, ómirdiń kúrdeliligi jaıly, adam mahabbaty jaıly oılap kelemin.

Iá, Ráshtaı er qyzdyń molasynda jelektep ósip turǵan myna Qyzyl gúlder múmkin Janna sıaqty sábıler mahabbaty shyǵar. Kim bilsin ony!

---