InfoHub Logo

Bir kúni uzaq júrip komandırovkadan keldim. Áıelim esikti ashty da:

— Súıinshi, Taılan, — dep kúle turyp qaldy. — Ie?

— Joq, ákel súıinshimdi. Áıtpese, aıtpaımyn.

— Jaraıdy, qalaǵanyńdy al.

— Saǵyntaı basqa qyzmetke aýysty, — dedi joldasym.

— Ras pa? — deppin men qýanǵandyǵymnan. Saǵyntaı bizdiń kóńildes joldastarymyzdyń biri. Men komandırovkaǵa júrer kezde ony oblystyń bir jaýapty qyzmetine aýystyrady degen sóz bolǵan.

— Bul qyzmetke aýystyrsa, aıta júretindeı etip toı jasaımyn, — dep kúlip edi Saǵyntaı. Toıyn qoıshy onyń. Saǵyntaı sıaqty jas jigittiń óskenine, úlken qyzmetke joǵarylaǵanyna nege qýanbaıyn. Aldym da telefon soqtym.

— Ay, Saǵyntaımysyń? Amansyń ba, eı? Al qyzmet ornyń qutty bolsyn.

Ar jaqtan qulaǵyma tosańdaý pań daýys estildi.

— Bul kim bolar eken?

Men qysylyńqyrap qaldym. Saǵyntaı qońyr daýysty, shapshań sóıleıtin jigit bolatyn.

— Bul qaıdan?

— Qaıda zvonıt etip turǵanyńdy bilmeseń, nege zvonıt etesiń, — dedi jańaǵy daýys aıyryqsha bir salqyn leppen.

— Men qatelesip kettim ǵoı deımin-aý osy? Maǵan Saǵyntaı kerek edi. Saǵyntaı Ókimbaev.

— Ie, men Ókimbaev, — dedi telefondaǵy jigit. Sodan keıin ar jaǵyndaǵy bireýlerge sóılep ketti. Men ańyryp qaldym.

— Iá, Ókimbaev tyńdap tur. Ne aıtaıyn dep edińiz? — Telefonnan qaǵaz sybdyry estildi.

— Aý, sen Saǵyntaımysyń?

— Ie, bul kim edi?

— Tanymaı qaldyń ba? Taılan ǵoı. Jańa ornyń qutty bolsyn.

Odan ún joq.

— Alo, alo. Saǵyntaı...

— Ie, Taılan, tyńdap turmyn. Ne sharýań bar edi?

— Komandırovkadan kep turǵanym osy. Seni quttyqtaıyn dep... — dep kúmiljidim. Sodan keıin taǵy da «Osy ras Saǵyntaı ma?» dep túıtkildenip qaldym.

— Al, sen ras Saǵyntaısyń ba osy, álde oınap turǵan basqa bireý me?

— Taılan, — dedi telefondaǵy pań daýys. — Oıyn-oıyn ǵoı. Al qyzmet babynda «sen, sen» dep dikekteýińdi qoıatyn bol budan bylaı.

— Áı, qoıshy. Seniń osy bir qýlyǵyń-aı.

— Ras aıtamyn. Sońy bolsyn munyń.

Men birdeme deıin dep oılana berip edim, Saǵyntaı trýbkany tastap jiberdi. Telefon «túk - túk» dep óz ánine basyp ketti.

Apyr-aý, bul kádýilgi men biletin Saǵyntaı ma? Qoı, basqa bireý shyǵar...

---