InfoHub Logo

Bir kúni telefon shyldyr ete qaldy. Kótersem, Sábıt Muqanovtyń ózi.

— Qolyń bos bolsa, kelip ketseń qaıtedi? Men jańa ǵana poezdan tústim.

Jazýshynyń Qyzyljar jaǵyna ketkenin biletinmin. Elden áldebir habar ákeldi me degen oımen júgirip barmaımyn ba. Esikti Sábıttiń ózi ashty da, kabınetine bastady. Maǵan oryndyqty kórsetip, ózi dıvanǵa jaıǵasty da, dombyrasyn alyp tyńqyldatyp sál otyrdy. Óńi synyqtaý ma, qalaı? Qaıtse de kóńildi emes. El jaqta jaısyz bir oqıǵa bolyp qalmady ma eken dep, qaýip bılegen men:

— Qalaı, aman-saý baryp keldińiz be? — dep suraýym muń eken, úlken basymen botadaı bozdap qoıa bergeni. Men sasyp qaldym. Kókirekke sher bolyp tunǵan ashshy qaıǵy óksik bolyp syrtqa shyǵyp jatqan sekildi. Jas balaǵa uqsap kópke deıin solyǵyn basa alsynshy.

— Qorlanyp keldim, Safýan, — dedi Sábıt bir kezde kemseńdep. — Óz elim, óz jerimde budan artyq qorlyq bolmaıtyn shyǵar?!

— Nemene, el basshylary oılaǵan jerden shyǵa almady ma? — dep dal bastadym men ne suraýdyń jolyn tappaı.

— Joq, Qyzyljar jaqsylap qarsy aldy ǵoı. Taıly-taıaǵy qalmaı shyǵaryp ta saldy. Soǵan kóńilim kóterilip, bir kezde kýpeden shyǵyp, terezege qarap dálizde tur edim, restoran jaqtan kóringen eki jas jigit óte almaı keptelip qalǵan bolyp, tý syrtymnan syǵyp, meni aınaldyryp ózderine qaratty da: «Á, qaryn jaqsy eken, jaqsy, jaqsy», — dep qarnymdy sıpalap, qarqyldaı kúlip ári júrip ketti. Soltústik Qazaqstannyń qazirgi jastary Sábıt Muqanovyn osylaı qurmettedi.

Jasy ulǵaıǵan adam bolsa da, jany názik jazýshynyń myna jerdegi kóńil kúıin artyǵymen túsinip, ne aıtarymdy, qalaı jubatarymdy bilmeı dal boldym.

---