InfoHub Logo

Bir kún Jırenshe sheshen jolaýshy kele jatyp, bir aýyldyń tusyna kelse, aýyl men eki arada ózen sý bar eken. Onyń ótkeli qaı jerde ekenin bile almaı sasyp turǵanda sýdyń ar jaǵyna sý alǵaly shelegimen bir qyz keledi. Jırenshe daýystap:

— Bul ózenniń ótkeli qaıda? — dep qyzdan suraıdy. Qyz:

— Anaý jaqta bir ótkel bar — alys ta bolsa jaqyn. Berirek bir ótkel bar — jaqyn, jaqyn da bolsa alys, — deıdi. Bul ne degen sóz ekenin ańǵarmaı Jırenshe jaqyn degen ótkelge baryp, júrip ketip edi, sýdyń orta jerine barǵanda aty balshyqqa jyǵylyp, ústi-basy bylǵanyp, qaıtadan qaıtyp shyqty. Sonan soń alys ta bolsa jaqyn degen ótkelge baryp op-ońaı ótip, ar jaqtaǵy qyzdyń úıine keldi. Onda kelgen
soń Jırenshe qyzǵa qarap:

— Janym, qarnym ashyp alystan keldim. Tamaǵyńnyń táttisin ber, — dedi. Qyz aıtty:

— Bir tamaq bar ashshy, ashshy da bolsa tátti. Bir tamaq bar tushshy, tushshy da bolsa ashshy, — deıdi. Sonda Jırenshe:

— Ashshy da bolsa tátti degen tamaǵyńdy ákel, — deıdi. Qyz turyp baryp bir ýys tuz alyp bir aıaqqa salyp Jırensheniń aldyna qoıdy. Jırenshe muny kórip:

— Janym, qur tuzdy qalaı jeıin, — dedi. Sonda qyz tuzy joq qara kóje quıyp berdi. Jırenshe aqyldy, danyshpan kisi edi. Oılap otyryp bul tuspalǵa túsindi. Jáne óziniń úı ıesiniń bergen mázirin kútpeı, tátti tamaǵyńdy ber dep suraǵynan uıaldy. Sol bergen astan Jırenshe qyzdyń esti ekenin ańǵaryp, aqyrynda ózine qatyndyqqa aıttyryp aldy deıdi.

---