InfoHub Logo

Qazaqstannyń batys oblystarynda keń úrdis alǵan — kórisý. Jyl saıyn naýryzdyń 14-inen bastap jazylmaǵan zań boıynsha jasy kishiler úlkenderge kórise baryp, batasyn alady.

Bul árkimniń óz úıinen bastalady. Tańerteń tura salyp, áke-shesheńe, úıdegi ózińnen úlken adamdarǵa qol berip amandasasyń. Olar: «Jas qaıyrly bolsyn, ómiriń uzaq bolsyp, áli talaı kórisýge jazsyn!» — dep bata beredi. Bul dástúrli kórisý, ıaǵnı jyl jańarǵandaǵy birinshi kezdesý, adamdardyń byltyrdan bergi birinshi kórisken kúni. Osy kúnnen bastap byltyrdan beri kórispegen adamdar bir-birimen qol berip, úlken adamdar qushaqtasyp, tós túıistirip, amandasyp, kórisý yrymyn jasaıdy. Úlkeni kishisine mindetti túrde «Jas qaıyrly bolsyn!» aıtady. Iaǵnı «jalpy qaýymǵa jańa jyl keldi, adamdarǵa bir jas qosyldy, osy jas qaıyrly bolyp kelsin, keler jylǵa aman-esen jeteıik» degen tileý. Al, ótken jyldan beri kezdespegen adamdar qashan kezdesse de (naýryz bastalǵannan keıin apta, aı ótýi múmkin)  bir ret kórisýi shart. Bir jylǵa jeterlik bir kórisý. Bul alysta turatyndar nemese jolaýshylap júrgen haqynda.

Al, aýyl adamdary naýryzdyń birinen (qazirgishe 14-inen) jas balalardy «aýyldaǵy qarıa adamǵa, óz áýletiniń úlkenine baryp kórisip kel» dep baǵyttap otyrady. Soǵan oraı ol úlken kisiniń úıi de: «Jyl keldi ǵoı, erteń kórisýge balalar kelip qalar», — dep dastarqanyn qamdap, úı ishin qonaq kútkendeı jınap otyrady. Bunyń naýryz kójege, aıtqa eshqandaı qatysy joq. Taza jyl basyndaǵy tuńǵysh kezdesý kúni. Aqsaqal adamdarǵa balalar ǵana emes, jas jigitter, eresek adamdar da barady. Balalar batasyn alyp, kámpıt, baýyrsaq, qurtyn qolyna ustap, kelesi úlken úıge shyǵyp ketse, jigitter nemese úlkender jaǵy tize búgip, úı ıesine ótken jyldan bergi bitirgen isin, nemese qolǵa alǵaly júrgen sharýasyn aıtyp, áńgime-dúken quryp qalýy múmkin. Al boıjetken qyzdar aýyldaǵy ismer, kópti kórgen analarǵa, jeńgelerge kórise barady. Sol úıde toqý, tigý, aspazdyq óner jaıly, taıaýda ýaqyty belgilenip qoıylǵan qyz uzatý toıy bolsa, onyń jasaý-jabdyǵy jaıly sóz qozǵalady. Mundaı belgili sheberler de kórisýshilerdi arnaı kútip otyrady.

Ulys kúni kári-jas qushaqtasyp kórisken,
Jańa aǵytqan qozydaı jamyrasyp kelisken.
Shaldar bata berisken, saqtaı gór dep teristen!
Jas qaıyrly bolsyn aǵaıyn!

Oqýǵa keńes beremiz:

Kórisý

---